Read Chang Naga 1 SAMUEL 10 Bible Online

1 SAMUEL 10 - Chang Naga bible

1 SAMUEL 10

¹Kheijinei Samuelei onang thungdou sungbakei hoba kho haoeibü khua yeian jinkukei, hoba hao to sembung shepbei hoba laukei, “BUNYUBOUei haoeibü phetphanbü thüka leiyeibü lela no onang naangkukei aying lo?

²Ladang no kü jungka tat bangjung haulaje kheijinei nyi müt nyi Racheleibü heea Benjamin leilanga Zelzaa haplabü, hoba haoenei ka to laulabü: Gadu shuong laobou nyi lamjung haukei kho hapa, hoba chühashi, kabouei gadu thounoulabü phoan ka shanga damlabü kian lauda, ‘Kü shou shangabü ngei ai kümla?’”

³Kho phaia khüka no thedang ae hauashi hoba no Tabor yembu long jungto loulabü hoba khünei nyi müt sem Bethel to angko, müt cheei lonshou sem jungan, hoba lubü cheei wentek sem hoba lubü cheei ih shongmok che jungan, haüyolabü.

⁴Hobaje Haoenei ka la salem kulabü hoba ka la wentek sem kulabü, laobou nyi haoeneibü ik ka sungletlabü.

⁵Kho phaia Filistiabü sepai kishang Mühghaü shongh to no loulabü, hoba ladang no sangnyu thito loulaje, thuseibü tan che, kongkin, busen, laangkip kongkin, hoba kongkin haoen thedanga jungan louyenko nyi haüyolabü hoba haoenei thusei ngüh lauyoko kilabü.

⁶Hobaje BUNYUBOUeibü soushou ka thükto hau yaangbüei loulabü, hoba nyi haoen yoa tetenko laulabü hoba no lubü müt che la yeian aplabü.

⁷Hobaje ladang khübü tetsida ka jungto loulaje kaibü jihei sakkubü tegü kümshi, aishanga Mühghaü ka yoa kia.

⁸Hobaje no kü to shaang Gilgal to haulabü; hoba chühashi, ngo ka jungto juokbü lembü lemla hoba sangmai hakso lembü lemla louyenlabü, ngo ka jungto alou shongko hoba nyi ai kümla ka la alen shongko chalou nyet no haiteijan.”

⁹Hobaje Samuel ka bangla hao phai sepeijinei, Mühghaüei hao la maangpon haanbü che kukei; hoba khübü tetsida pendou khünyet chaloua haüthükkei.

¹⁰Hobaje haoen ladang shongh aeto loukei, chühashi, thuseibü tan cheei hao to haüyokei, hoba Mühghaüeibü soushou hanei hao thükto loukei, hoba haoei haoen yoa tetenko laukei.

¹¹Hobaje ladang shangied ngeyoan kibü shuongei maimaitham haoei thuseibü yoa tetenko joyoda dogo hapbei, mütshuongei cheei che to laukei, “Kisheibü shou to haüthükbü ho ai? Saul kei thuseibü yoa yoakei si?”

¹²Hobaje nyangko lobü cheei jongaikei, “Hobaje haoeneibü bou ao?” Hibü ho tetentanbü ngüh la yeikei, “Saul kei thuseibü yoa yoakei si?”

¹³Hobaje haoei ladang tetenko laubü thonan apbei, hao shongh khüto loukei.

¹⁴Hobaje Sauleibü bou nashoubouei hao hoba haoeibü sambü to laukei, “Kasi lato haukei?” Hobaje haoei laukei, “Gadu shuong lamla haukei, hoba künei haoen kho ühüpsi kün Samuel jungto loukei.”

¹⁵Hobaje Sauleibü bou nashoubouei laukei, “Sanoudambo Samuelei ka to ai laukei kü la lenbüma.”

¹⁶Hobaje Saulei haobou nashoubou to, “Haoei küsi to shangashatetnyu gadu shuong hapa dogo laukei.” Lausikei sangle kümsilei laobou shanga Samuelei joyokei haoei hao la alen.

¹⁷Kho phaia Samuelei mütshuong liko BUNYUBOU jungto Mizpa to ngakei.

¹⁸Hobaje haoei Israel shousi shuong to laukei, “Hai, BUNYUBOU Israel Mühghaüei lauda: Ngei Israelbü Ijep ka leiyenkei hoba Ijepbü ik ka hoba kan khonkutibü sangle pendou ik ka ngei kan khümenkei.

¹⁹Lausikei tat kanei kan thushed hoba maangshat pendou ka khümenbou Mühghaü asunglet, hoba kanei hao to laukei, ‘Aying lausikei kün thüka Choba che phobü.’ Tou hibü kan lolo BUNYUBOU thedanga kan chung chung hoba phang phang lenko loashi.”

²⁰Hibü Samuelei Israel phang pendou nyangko leijung loukei, hoba Benjamineibü chung pienkei.

²¹Hobaje haoei Benjamin chung haoen chempen chempen nyangko leian loukei, hoba Matrit chem- pen pienkei; hoba Kisheibü shou Saul pikei, lausikei haoenei hao lamjinei haoenei hao ühüp.

²²Hibü haoenei BUNYUBOU to “Toukei müt che loulabü akisai dogo phekei,” hoba BUNYUBOUei jongaikei, “Chühashi, haoei hao lolo on yoa hauakei.”

²³Hibü haoei laangjung haukei hoba khüka haoen yoka hao leian loukei, hoba ladang hao müt yoa lokei mütshuong toje phakshok ka thükae suokbou kikei.

²⁴Hobaje Samuelei müt pendou to laukei, “BUNYUBOUei ao pikei kanei hapakaoba lo? Khei müt pendou yoa hao phatko ao aki.” Hobaje müt pendouei ngekko laukei, “Mühghaüei Choba khümenshi!”

²⁵Kho phaia Samuelei mütshuong la Choba sangle kümthenleithen shanga lenkei, hoba tulaia dokei; hoba kho BUNYUBOU thedanga tentian phokei, hoba Samuelei müt pendou lulu chem to lintikei.

²⁶Hobaje Saul kei haoen chem Gibea to ngaikei. Hobaje BUNYUBOUei aoyoueibü maangpona meiyoukei, khübü maangkaangbü müt at hao yoto haukei.

²⁷Lausikei Bilieleibü shousi shuong atei laukei, “Ho mütei sen lai khümenla?” Hobaje haoenei hao la nyikukei hoba hao jungto jongsak jungan alouku. Lausikei haoei ngüh üangko kikei.