Read Chang Naga 1 SAMUEL 11 Bible Online

1 SAMUEL 11 - Chang Naga bible

1 SAMUEL 11

¹Tou lit che phaia Amonbü Nahashei leikei, hoba Jabesh Gilead shikei, hoba Jabeshbü müt pendouei Nahash to laukei, “Kün to theyolanyobü che kümashi, hoba künei no khangenlabü.”

²Hobaje Ammonbü Nahashei haoen to laukei, “Khei kaneibü mae nyek phekan apsi ong ngei kan yoa kho kümlabü. Hobaje ngei kho Israelbü thüka himou shanga tentian phokulabü.”

³Hobaje Jabeshbü jaishou shuongei hao to laukei, “Israelbü leilang pendou aeto ngühlang künbü shuong hautila shanga kün la chalou nyet onko labüma; hoba kho phaia kün khümenla aokei akilonga kün ka jungto longlabü.”

⁴Kheijinei ngühlang künbü shuong Gibeabü Saul jungto loukei, hoba khübü ngüh mütshuongeibü nouei ditko lenkei; hoba müt pendou ngüh longko haapbei.

⁵Hobaje chühashi, Saul khongthu ka masu shuong phaito loukei hoba Saulei laukei, “Mütshuong haapbü ho haoen khonsak ai?” Hobaje haoenei Jabeshbü mütshuongeibü ngüh kho hao la lenkei.

⁶Hobaje ladang haoei khübü ngüh ditkei Mühghaüeibü hau yaangbü hao thükto loukei, hoba hao aeibou maangpokkei.

⁷Hobaje haoei masu pongsu penyi sungbakei hoba khübü kho netla yeiko jemnyinkei, hoba khübü kho Israelbü leilang pendou to ngühlang künbü shuongeibü ika janjan kuan hautiko laukei, “Ao Saul si Samuel phai to aloulaje haoeibü masu to kho tegü kümlabü!” Hobaje pendou thükto BUNYUBOU hatbü lotkei, hoba haoen müt che maimai yeian longkei.

⁸Hobaje haoei haoen Bezeka weanchühkei, hoba Israelbü hajar saongao sem hoba Jihudabü hajar sem kikei.

⁹Hobaje louan kibü ngühlang künbü shuong to haoenei laukei, “Ho hai kanei Jabesh Gileadbü mütshuong to lenjan: Ngiet chanyu kaangbü jiha kan khümenlabü.” Hobaje ngühlang künbü shuong loukei hoba Jabesh mütshuong to laukei, hoba haoen olinko kikei.

¹⁰Hibü Jabesh mütshuongei laukei, “Ngiet kün kan jungto longlabü, hoba kanei kün to maia dogo dambü pendou kümshi.”

¹¹Hobaje nyibounyet Saulei mütshuong tan sem la yeitikei, hoba haoenei shaishang chenyu khüto metu daomaua loukei, hoba Ammonbü shuong ngeyang ka chanyu chajihbou sühko haitikei hoba aoyou joukei haoen linkei; hibü müt nyi ongkei chela akitei.

¹²Hobaje mütshuongei Samuel to laukei, “Saul kün thüka Choba la alelabü dogo laubü shuong kho aoyou? Khübü mütshuong leiba, haoen haitilabü!”

¹³Lausikei Saulei laukei, “Tat müt che ongkei ühaitilabü, aishanga tat BUNYUBOUei Israela khümenbü kua.”

¹⁴Kheijinei Samuelei mütshuong to laukei, “Kaiya, sen Gilgal to haukho, hoba khünei Saul Choba yeibü ngekletakho.”

¹⁵Hobaje müt pendou Gilgal to haukei, hoba khünei haoenei Saul Gilgala Choba yeitikei, hoba khünei haoenei sangmai hakso lembü lembei hoba khünei Saul hoba mütshuong pendou aeibou olinyokei.