Read Chang Naga 1 SAMUEL 12 Bible Online

1 SAMUEL 12 - Chang Naga bible

1 SAMUEL 12

¹Kheijinei Samuelei mütshuong pendou to laukei, “Chühashi, kanei kü to lenbü pendoua ngei kaneibü ngüh ditkua, hoba kan thüka Choba che phokua.

²Hobaje tou, chühashi, kan thedanga Choba kho paida, hoba ngo baushi, hoba khu thua, hoba chühashi, ngeibü shousi shuong kan yoa kia hoba ngo mütao ka tat sühko ngo kan thedanga paia.

³Ngo hanei kia, ngo khulimbo BUNYUBOU thedanga aukabü kuashi, ngei aoeibü masu sungkei, ayingsi ngei aoeibü gadu sungkei, ayingsi ngei aoka yepeijaweko nam sungkei? Ngei ao khonkutiko jungeikei? Ayingsi ngei aoka besa, ayingsi nguok che lekei? Kükhu limbo aukabü kuashi, hoba kho ngei kanla kungaikho.”

⁴Hobaje haoenei laukei, “Nyi küneibü nam lepan alekei ayingsi khon asakti, aoeibü ik kakei aikei alekei.”

⁵Hobaje haoei haoen to laukei, “Kanei ngeibü ika aikei ühüp dogo kan khulimbo BUNYUBOU aukabü kia.” Hobaje haoenei laukei, “Hao aukabü kia.”

⁶Hobaje Samuelei mütshuong to laukei, “Mosa si Aron pienbü hoba kaneibü pisibousi shuong Ijep kaodak ka leiyenbü kho BUNYUBOU ki.

⁷Tou khei yingsije BUNYUBOU thedanga haoei kan to hoba kaneibü pisibousi shuong to kümbü, BUNYUBOU saopobü kümsilei shuong shanga pendou ngei kan yoa janyolabü kan loan kiteishi.

⁸Ladang Jakob Ijep to loukei hoba pisibousi shuongei BUNYUBOU to ngekkei, kheijinei BUNYUBOUei Mosa si Aron hautikei, aoyouei kaneibü pisibousi shuong Ijep ka leiyenkei, hoba ho kaoa kitikei.

⁹Lausikei haoenei BUNYUBOU maan apbei hoba haoei haoen Hazor si Sisera ik to hoba Filistiabü ik to hoba Moabbü Choba ik to yaakkei, hoba haoenei haoen khulimbo wapyokei.

¹⁰Hobaje haoenei BUNYUBOU to ngekkei hoba laukei, ‘Künei shed shona, aieilausi künei BUNYUBOU inleda, hoba Baal shuong hoba Ashtarot khangenkei; lausikei tou kün dangbou ik ka khümenshima, hoba künei no khangenlabü.’

¹¹Hobaje BUNYUBOUei Gideon, Barak, Jeftha hoba Samuel hautikei, hoba pendou aeka kaneibü dangbou ik ka kan khümenkei, hoba kan khümet- angetbüa kida.

¹²Hobaje ladang Ammonbü Choba Nahash kan khulimbo louko hapbei BUNYUBOU kaneibü Mühghaü kaneibü Choba kibü chaloua kanei laukei, ‘Aying, kün thüka songdak la Choba che khamda.’

¹³“Hibü tou kanei ao Choba pienkei hoba ao kanei hikei, chühashi, BUNYUBOUei kan thüka Choba che phokuakei.

¹⁴Kanei BUNYUBOU to soumo hatlabü hoba hao khangenlabü, hoba hao to ngüha lelabü. Hobaje haoei sakkubü khulimbo alonglabü yingalonga maiakei.

¹⁵Lausikei kanei BUNYUBOUeibü ngüha alelabü, lausikei BUNYUBOUei sakkubü khulimbo longko dogo yingalonga kheijinei BUNYUBOUeibü ik kan khulimbo hoba kaneibü Choba khulimbo kilabü.

¹⁶Hibü tou loan kishi hoba kan thedanga BUNYUBOUei laobou kümlaje kho chalou yaangbü to chühshi.

¹⁷Tat whet youshou latbü aying lo? BUNYUBOUei langmak si lang yantilabü lele ngei hao to phelabü, kanei Choba che phebüa kanei kümbü kho kümsilei amaibü yaangbü che dogo kanei ngelabü hoba haplabü.”

¹⁸Hibü Samuelei BUNYUBOU to ngakei, hoba BUNYUBOUei kho chaloua langmak hoba lang yantikei; hoba müt pendouei BUNYUBOU si Samuel to aeibou hatkei.

¹⁹Hobaje müt pendouei Samuel to laukei, “Kün ühaila shanga BUNYUBOU kaibü Mühghaü to no khangenbou shanga welauashi, aishanga küneibü shabü pendoua kün shanga Choba che hibü kho kümsilei amaibü kün lolo künngaia.”

²⁰Hobaje Samuelei mütshuong to laukei, “Tehüt, kanei maimaitham habü amaibü pendou küma khei yingsikei BUNYUBOU phaisembü ka tesepei, lausikei kanei maangpon khümboei BUNYUBOU khangenashi;

²¹Ku akubü ayingsi akhümenlabü amlangbü peisilei shuong phai sepeinyu tengai.

²²Aishanga BUNYUBOUei haoeibü nyen yaangbü shanga jembü mütli anangletlabü, aieilausi BUNYUBOUei jembü shanga kan mütli che yeitila maangangan kia.

²³Tokei aeilaleko kü shangaje kan shanga welaukula nangbüei BUNYUBOU khulimbo shabü ashonla Mühghaüei ngo shiletshima, lausikei ngei kaneibü lamnyu maibü hoba tükdebüa lenlabü.

²⁴BUNYUBOU to soumo hatashi, hoba kaneibü maangpon khümboei maimaithama hao khangen- ashi; aishanga kan shanga haoei lai kümsilei yaang kümbei damanchühshi.

²⁵Lausikei kanei toukei amaiko kümbo laualonga, kan hoba kaneibü Choba ham maulabü.”