Read Chang Naga 1 SAMUEL 13 Bible Online

1 SAMUEL 13 - Chang Naga bible

1 SAMUEL 13

¹Saul Choba kümla khangjinei hao po khujin kikei, hoba haoei Israela po saonyito nyi songdakkei.

²Hobaje Saulei hao shanga müt hajar sem pienkei, hajar nyije Saul yoa Mikmasa hoba Bethel shongha kikei, hoba joubü mütshuong haoei mütpem weko lulueibü neichem to ngaitikei.

³Hobaje Gebaa Filistiabü sepai tan Jonathanei thükkei hoba Filistiabüei kho ditkei. Hobaje Saulei kaonyek pendoua teklaang metko laukei, “Ibribü ditashi.”

⁴Hobaje Israelbü pendouei Saulei Filistiabü thüka dogo laubü hoba tokei Filistiabü yoa Israelbü mangsenyobü kikei dogo ditkei. Hobaje mütshuong Saul phainei Gilgala liko kamshaian kikei.

⁵Hobaje Filistiabüei Israelbü to wapyola liko yoshaikei, kailong hajar khujin, koli sepai hajar lak; hoba mütshuong yungkoa phetsen tegü tan juong kikei, hoba haoen angkei hoba Mikmasa Beth-aven chaangbou aenei shaikei.

⁶Ladang Israel mütshuongei ailai ong akümbo apbei, (aieilausi mütshuong kho thushedei sühan kikei,) kheijinei mütshuong haoen lolo laang phanga khünnyeta laanga hoba püngkhüna huan apbei.

⁷Tou Ibribü atje Jordan danan Gad hoba Gilgala kikei, hoba müt pendouei lühjilühko hao phai sembei.

⁸Hobaje Samuelei takletnyu phokubü jih sühkei, haoei chalou nyet haiko kikei, lausikei Samuel Gilgal to alou; hoba mütshuong hao ka linjung satan kikei.

⁹Hobaje Saulei laukei, “Kü jungto hato juokbü lembü hoba sangmai lembü sungba.”

¹⁰Hobaje haoei juokbü lembü wansilengko chühsi Samuel loukei hoba hao la salem kula Saul hao shuokla haukei.

¹¹Hobaje Samuelei laukei, “Nyi ai kümbei?” Hobaje Saulei laukei, “Aieilausi kü jungka mütshuong linjung satbü ngei hapbei, hoba jih takletbüa no alou, hoba Filistiabü Mikmasa haoen liko kamshaian kikei.”

¹²Hibü ngei laukei “Tou Filistiabüei kü thükto Gilgal to louyenada hoba ngei BUNYUBOU to asuaja, hibü ngei ngo lolo khonsakko juokbü lembü kukei.”

¹³Hobaje Samuelei Saul to laukei, “Nyi ngoualoua küma; nyi BUNYUBOU kaibü Mühghaüei sakkubü laobou haoei ka la sakkukei kho aküm; aishanga kaibü sangle Israel thüka ponpen shanga BUNYUBOUei kümbuan kikhoulabü.

¹⁴Lausikei tou kaibü sangle thonlabü; BUNYUBOUei hao shanga hao maangsembü müt che lama hoba BUNYUBOU haoei jembü mütli thüka leiyeibü yingla piena, aieilausi BUNYUBOUei laobou ka la sakkukei nyi ajungei.”

¹⁵Hobaje Samuel meimeikei hoba Gilgal ka Benjamineibü Gibea to angkei, hoba Saulei hao yoa kibü müt saongao lak thüng wekei.

¹⁶Hobaje Saul hoba haoeibü shou Jonathan hoba hao yoa kibü mütshuong Benjamineibü Gebeaa kikei. Lausikei Filistiabü Mikmasa shaikei.

¹⁷Hobaje sangshibü shuong Filistiabü shaishang ka tan sem la yeian longkei, tan che Ofra to haubü lamnyu Shual kaodak aeto sepeikei;

¹⁸hoba lubü tan Beth Horon lam to sepeikei, hoba lubü tan yam aeto Zebaim yomang to chühan hautiko leilang aeto sepeikei.

¹⁹Tou Israel kaodak pendoua in yaübü akitei, aishanga Filistiabüei laukei, “Ibribüei haoen lolo insiaubu yaütiashi.”

²⁰(Lausikei Israelbü pendou mütpem weko lulueibü youlatjin, namshou, hoba lulueibü chak, hoba lulueibü shap ula Filistiabü jungto yankei.

²¹Khei yingsikei shap shanga hoba youlatjin, künshem shanga hoba pheyaüjin shanga hoba Choba chak shanga hoba takjin jinla haoeneibü ujin kikei.)

²²Hobaje lason chaloua Saul si haoshou Jonathan ika kibü to liman aoeibü ika kei in ayingsi aubu akitei.

²³Hobaje Filistiabü sepai tan Mikmash ngümjem lam to satkei.