Read Chang Naga 1 SAMUEL 14 Bible Online

1 SAMUEL 14 - Chang Naga bible

1 SAMUEL 14

¹Nyetche chalou Sauleibü shou Jonathanei haoeibü insiaubu jungbü heshoubou to laukei, “Kaiya, thi aeto Filistiabü sepai shuong kishang to seti haukho.” Lausikei haoei bou to alen.

²Hobaje Migrona kibü chilang bulong phanga Gibea napheinei Saul kikei, hoba hao yoa kibü müt saongao lak thüng kikei.

³Hobaje Shiloa BUNYUBOUeibü ungshedbou Elieibü shou Finehaseibü shou Ikhabodeibü jaisina Ahitubeibü shou, Ahijaei ungshedbou saopobü hele lean kikei. Hobaje mütshuongei Jonathan haua dogo angeko kikei.

⁴Hobaje Filistiabü sepai tan jungto Jonathan haula ngümjem lam kanglanga khünei jipheinei laanglip che kikei hoba jipheinei laanglip che hoba cheeibü nyen Bozez hoba cheeibü nyen Sene kikei.

⁵Laanglip che Mikmash thedang aenei yungthang aeto longan kikei, hoba che kho Geba thedang ae yungkük thedang ae.

⁶Hobaje Jonathanei haoeibü insiaubu jungbou heshoubou to laukei, “Kaiya, hoba habü akipbü sepai tan yoto seti haukho, aishanga BUNYUBOUei seti shanga kümbulep yinglabü, aishanga juongei ayingsi shishoei khümenla BUNYUBOU thedangaje toknoklabü aki.”

⁷Hobaje haoeibü insiaubu jungbou heshoubouei hao to laukei, “Kaibü maangpona kibü pendou kümashi, no sepeiashi. Chühashi kaibü maangpon phai ngo ka yoa kia.”

⁸Kheijinei Jonathanei laukei, “Chühashi, seti mütshuong danjung haukho, hoba mütshuong la seti haptikho.

⁹Haoenei seti to kün kasi jungto alou shongko kiteishi dogo laualonga kheijinei setiei setti kishang ka akukko loan kiteikho, hoba haoen jungto seti üanglabü.

¹⁰Lausikei haoenei seti to, ‘Kün jungto kaiyang,’ dogo laualonga kheijinei seti anglabü; aishanga BUNYUBOUei haoen setieibü ik to kuakei, hoba seti shanga ho tetsida kilabü.”

¹¹Hobaje haoen lolo Filistiabü sepai tan to lenkei, hoba Filistiabüei laukei, “Chühashi, Ibribü haoen lolo huan kibü khünyet ka longan kia!”

¹²Hobaje sepai tan kabü mütshuongei Jonathan hoba haoeibü insiaubu jungbou to jongaikei, “Kün jungto kaiyang, künei kasi la den che lenkho.” Hobaje Jonathanei haoeibü insiaubu jungbou to laukei, “Kü phai kaiyanga; aishanga BUNYUBOUei haoen Israelbü ik to khümbo kuan kia.”

¹³Hobaje Jonathanei haoeibü youei ikei khomjung angkei, hoba haoeibü insiaubu jungbou hao phainei kikei; hoba Jonathan thedanga haoen tuongkei, hoba haoeibü insiaubu jungbouei hao phainei haoen haitikei.

¹⁴Hobaje shaangla haitibüa Jonathan hoba haoeibü insiaubu jungbouei sekphai tho thünga müt saoche thüng haitikei.

¹⁵Hobaje shaishanga hoba khongthua hoba müt pendou yoa hatbü lühbü kikei; sepai tan hoba sangshibü shuong haoenkei lühkei, hoba kaodak tennyinkei, hibü khünei hatbü lühbü yaang kikei.

¹⁶Hobaje Benjamineibü Gibeaa Sauleibü lapheibü shuongei chühkei, hoba chühashi, shuong linjung satkei, hoba haoen jiji to satkei.

¹⁷Kheijinei Saulei hao yoa kibü müt shuong to laukei, “Tou weanchühashi, hoba haoen ka ao satan apbei chühashi.” Hobaje ladang haoenei weanchühkei, chühashi, Jonathan hoba haoeibü insiaubu jungbou khünei akitei.

¹⁸Hobaje Saulei Ahija to laukei, “Hato Mühghaüeibü Saopobü Busen sungba, aishanga Mühghaüeibü Saopobü Busen kho chaloua Israel shousi shuong yoa kikei.”

¹⁹Hobaje Saulei ungshedbou to joyoko kijinei Filistiabü shaishanga kibü lemenleenbü athakko aei ong yeikei, hoba Saulei ungshedbou to laukei, “Kaibü ik sungngaiashi.”

²⁰Hobaje Saul si hao yoa kibü mütshuong liko yoshaikei, hoba lason to loukei, hoba chühashi, mütpem wekoeibü in lulueibü jenabou khulimbo kikei, hoba khünei panglangbü yaang kikei.

²¹Tou Ibribü shangied Filistiabü yoa kibü shuong aoyou kaijembo kibü kaonyek ka haoen yoa shaishang to angkei khei haoenkei, Saul hoba Jonathan yoa kibü Israelbü to yokei.

²²Kho tegü Israelbü müt pendou aoyou Efraim shongh kaodaka haoen lolo huan kikei, Filistiabü satda dogo ditjinei khei haoenkei lasona haoen phai khaplapbo phai sembei.

²³Hibü kho chaloua BUNYUBOUei Israel khümenkei, hoba lason kho Bethaven danjung haukei.

²⁴Hobaje kho chaloua Israel mütshuong maangto shatlabü thushed kikei, lausikei Saulei mütshuong to theyolanyoko laukei, “Aoei nanganak shongko hoba ngei kü mütpemei dangbou shuong to phok alamtoua shaulayunglaje shedsikhau baushi.” Hibü khünyet aoeikei jepansean achüh.

²⁵Hobaje müt pendou yam to atkei hoba khünei kaoa naodei kikei.

²⁶Hobaje ladang mütshuong yam to lotan kikei, chühashi, naodei yanjung louyenkei, lausikei ao müteikei jembü ikei jembü sembung to thoan ayung, aishanga mütshuongei theyolanyobü to hatkei.

²⁷Lausikei Jonathanei haobouei mütshuong to ngühkhüm kuko theyolanyobü adit, hibü haoei haoeibü ika kibü ju thon kho litian naodei hap to jukettian haoeibü ik haoeibü sembung to thoan jinkei; khoyam haoeibü nyek sa angkei.

²⁸Kheijinei mütshuong yoa cheei jongaikei, “Kabouei mütshuong to kaangkhühtham theyolanyoko laukei, ‘Aoei tat chaloua shaula yunglaje hao shedsikhau baushi;’ hoba mütshuong semthetkei.”

²⁹Kheijinei Jonathanei laukei, “Kübouei kaonyek khon kutida, chühashi, ngeibü nyek lai sa angetnyu yeian ki! Aieilausi ngei ho naodei hansho seanchühkei.

³⁰Mütshuongei haoeneibü dangbou ka haushaibü mühbü shaukei tegüje tat Filistiabü haitibü latetche juongbou yingkhoulabü.”

³¹Hobaje khünyet chalou kho haoenei Mikmash ka Aijalon sühko Filistiabü to wapyokei; hoba mütshuong aeibou semthetan kikei.

³²Hobaje mütshuongei soletbü thük to laangkei hoba sanshuong, masu hoba masu shoushou sungkei, hoba haoeneibü kaoa haitikei, hoba mütshuongei khübü kho sii yoan shaukei.

³³Kheijinei müt atei Saul to ho hai laukei, “Chühashi, mütshuongei sii yoan shaubüei haoenei BUNYUBOU khulimbo shabü shona.” Hobaje haoei laukei, “Kanei yepeiko jungeia, tat kü jungto laang yaangbünyu tongan koutiashi.”

³⁴Hobaje Saulei laukei, “Kan lolo mütshuong yoa lenashi: Mütpem wekoei jembü masu hoba mütpem wekoei san kü jungto sungba hoba khübü kho haitishi, hoba shauashi, hoba sii yoan shaubüei shabü teshon; hoba müt pendouei lulueibü masu hao yoa khüyou sungbakei, hoba khünei khübü haitikei.”

³⁵Hobaje Saulei BUNYUBOU lemshang che kümbei, kho büngbü khangbü lemshang haoei BUNYUBOU to kümbü ki.

³⁶Hobaje Saulei laukei, “Sen Filistiabü phaito tao yankho, hoba ngeyang lang angeshongko senei haoen shikho, hoba senei müt che ongkei tüpyokho.” Hobaje haoenei laukei, “Ka la aiong maikei kümashi.” Kheijinei ungshedbouei laukei, “Sen hanei Mühghaü nyangko haukho.”

³⁷Hobaje Saulei Mühghaü ka songsido phekei. “Ngo Filistiabü phaito shijung yanlep sai? Nyi haoen Israelbü ik to khümbo kulep sai?” Lausikei haoei hao to khünyet ai ajongai.

³⁸Hobaje Saulei laukei, “Hato nyangko kai- ya, kan mütshuongeibü leiyeibü shuong, hoba ho chaloua ainei shedbü ki ngeashi hoba chühashi.

³⁹Aishanga BUNYUBOU nyena, aoei theyolanyoko Israel khümenkei, kho küshou Jonathan yingan kiasikei, hao maimaitham hailabü.” Lausikei müt pendou yoa hao to jongaibü che ongkei akitei.

⁴⁰Kheijinei haoei Israelbü pendou to laukei, “Kan jipheinei kishi, hoba kü shou Jonathan küsi jiaenei kilabü.” Hobaje mütshuongei Saul to laukei, “Ka la ai maikei kho kümashi.”

⁴¹Hibü Saulei laukei, “O BUNYUBOU Israel Mühghaü, aila tat no khangenbou to ajongaida? Kho shedbü kü to ayingsi ngeibü shou Jonathan to kialonga, O BUNYUBOU, Israel Mühghaü, Urim kushi; lausikei ho shedbü ho ka mütli Israel to kialonga, Thummim kushi.” Hobaje jongaibü Jonathan si Saul khulimbo longkei, lausikei mütlije satenkei.

⁴²Hobaje Saulei laukei, “Ngo hoba küshou Jonathan kanglanga phaang pakashi.” Hobaje Jonathan to baukei.

⁴³Kheijinei Saulei Jonathan to laukei, “Nyi ai kümbei kü la lenbü.” Hobaje Jonathanei hao la ngetikei. “Ngei maimaitham ngeibü ika kibü ju thonei naodei hansho seanchühkei, hoba chühashi, ngo haijan.”

⁴⁴Hobaje Saulei laukei, “Mühghaüei khei kümshima, hoba aeikei yingshi; aishanga no maimaitham hailabü, Jonathan!”

⁴⁵Hobaje mütshuongei laukei, “Jonathan aoei ho thüksimin yaangbü sungbakei hao hailep lo! Mühghaüei shiletshi; lang kibou BUNYUBOU nyena laukho: Haoeibü khu ka khulou pem che ongkei kaoa üatlabü; aishanga tat haoei Mühghaü thuibü yoa küma.” Hibü mütshuongei hao dekei, hoba hao ühai.

⁴⁶Kheijinei Filistiabü phaito sembü ka Saul angkei hoba mütshuong haoeneibü kishang to haukei.

⁴⁷Tou ladang Saulei Israel thüka sangle lekei, haoei pendou aenei dangbou shuong khulimbo wapyokei. Moab khulimbo Ammon shousi shuong khulimbo, Edom khulimbo, Zobabü Choba shuong khulimbo hoba Filistiabü khulimbo hoba lae aeto ong hao sepeikei haoei thük hapbei.

⁴⁸Hobaje haoei maangkaangko kümbei hoba Amalekbü shian apbei. Hobaje Israel shibü pendoueibü ik ka khümenkei.

⁴⁹Tou Saulei shousi Jonathan, Ishvi hoba Malkhishua kikei, hoba haoeibü shou yaksa müt nyi nyen hai kikei: Noushounyueibü nyen Merab hoba nashounyueibü nyen Maikel.

⁵⁰Hobaje Sauleibü yak nyen Ahimaazeibü shou Ahinoam kikei, hoba haoeibü se- pai tan leiyeibü kongnyubou kho Sauleibü bou nashoubou Nereibü shou Abner kikei.

⁵¹Hobaje Sauleibü bou nyen Kish kikei, hoba Abnereibü bou Ner, kho Abieleibü shou kikei.

⁵²Hobaje Saul salang sünga Filistiabü khulimbo wapyo kaangbüsekbü kikei. Hibü ladang ong Saulei lakjaibü ayingsi maang kaangbü müt at haplaje haoei lanthükla shanga hao eik la leko kikei.