Read Chang Naga 1 SAMUEL 15 Bible Online

1 SAMUEL 15 - Chang Naga bible

1 SAMUEL 15

¹Kheijinei Samuelei Saul to laukei, “BUNYUBOUei jembü mütli thüka hoba Israelbü thüka Choba lelabü lele no naangenko pienla ngo hautikei; hibü tou BUNYUBOUeibü ngüha leashi.

²Hai, Thükenbou BUNYUBOUei lauda: Amalekbüei Israelbü to ai kümbei khei hao Ijep ka longjinei haoei lama thangetbü shanga ngei Amalekbü shieikoelabü.

³Tou hauan Amalek shiashi, hoba haoenei kibü pendou khümbomeiko soashi, hoba haoen tejouti. Bousu yaksa ham, hoba nasak si senyopbü, masu si san, hoba ut si gadu pendou haitiashi.”

⁴Hobaje Saulei mütshuong ngakei, hoba Telaima haoen weanchühkei, youeibü sepai hajar saoan, hoba Jihudabü müt hajar an.

⁵Hobaje Saul Amalekbü sangnyu to loukei, hoba yomanga hao thokei.

⁶Hobaje Saulei Kenbü to laukei, “Hauashi, bangashi, Amalekbü yoa ngei kan mautisi amaibüla haoen yoka kan yanan apashi, aieilausi Israelbü Ijep ka longjinei kanei Israel shousi shuong to sanou lenkei.” Hibü Kenbü Amalekbü yoka bangjung satkei.

⁷Hobaje Saulei Amalekbü shuong Havila ka Shur sühko (kho Ijep chaang ae sühko) thükkei.

⁸Hobaje haoei Amalekbü Choba Agag langsenkei, hoba inlouei mütshuong lemailela shemtikei.

⁹Lausikei Saul hoba hao mütshuongei Agag hoba sanlon maiboutham hoba masu hoba amenbü shuong hoba sanlon shoushou shuong hoba ai maikei pendou joutikei hoba khübü kho lemailela ashemti, lausikei ajanjan pendou amaibü hoba nangletbü kho lemailela mautikei.

¹⁰Kheijinei Samuel jungto BUNYUBOUeibü ngüh hai lauko loukei.

¹¹“Ngei Saul Choba yeitibü shanga ngo maang shaleda, aieilausi hao kü phai asemda, hoba ngei sakkubü haoei aküm.” Hobaje Samuel khauangkei, hoba langyang sünga haoei BUNYUBOU to ngekkei.

¹²Hobaje Samuel ngeyang enyu Saul to haüyola haukei, lausikei hao la lenkei, “Saul Karmel to haua, hoba chühashi, haoei jembü shanga nyenhang che yaüakei hoba sepeinyu louan Gilgal to yana.”

¹³Hobaje Samuel Saul jungto loukei, hoba Saulei hao to laukei, “No BUNYUBOUei haükushi, ngei BUNYUBOUei sakkubü küma.”

¹⁴Hobaje Samuelei laukei, “Ngeibü nouei sanlon wibü hoba masu pongsu wibü laobou ngei ditda kho tetlabü ai?”

¹⁵Hobaje Saulei jongaikei, “Haoenei Amalekbü ka khübü kho sungkei; aishanga BUNYUBOU ka Mühghaü la haitibü lembü kula shanga mütshuongei sanlon hoba masu maiboutham jouan phokei, hoba joubü kho künei lepde shemtia.”

¹⁶Kheijinei Samuelei Saul to laukei, “Khei kiteishi, BUNYUBOUei miou kü la ai lenkei ngei ka la lenkho.” Hobaje haoei hao to laukei, “Lenashi.”

¹⁷Hobaje Samuelei laukei, “Nyi no kaibü nyeka hanbü tegü yingasikei, no Israel phang thüka chungthem la yeitikei ayinglo? Hobaje BUNYUBOUei no Israel thüka Choba yeila naangenko pienkei.

¹⁸Hobaje BUNYUBOUei no kümsilei che to hautikei, hoba laukei, ‘Hauashi, hoba haoen amauti shongko haoen khulimbo wapyoashi.’

¹⁹Kholonga aila nyi BUNYUBOUeibü ngüha ale, lausikei makletbü peisilei shieiko laangkei, hoba BUNYUBOU thedanga ai amai kho kümbei?”

²⁰Hobaje Saulei Samuel to laukei, “Haü, ngei BUNYUBOUeibü ngüha lea, hoba BUNYUBOUei kü la lenbü lam to haua, hoba Amalekbü Choba Agag sungbaa hoba Amalekbü lepde shemtia.

²¹Lausikei mütshuongei sanlon hoba masu pongsu kongnyu peisilei maulabü shuong Gilgala BUNYUBOU kaibü Mühghaü la haitibü lembü kula sungkei.”

²²Lausikei Samuelei laukei, “BUNYUBOUei ngüha lebü to olinbü tetche juokbü lembü hoba haitibü lembü lemshanga BUNYUBOUei olinbü kisai? Chühashi, ngüha lebü kho haitibü lembü tokei khaibou hoba ngüh ditbü kho sanlon paangeibü haabü tokei maibou.

²³Aishanga khulimbo meimeibü kho seibüyaübü shabü tegü ki, nyi BUNYUBOUeibü ngüh asungletsije haoeikei no Choba lela asunglet.”

²⁴Hobaje Saulei Samuel to laukei, “Ngei shabü shona, aishanga ngei BUNYUBOU hoba kaibü sakkubü ngühkhüm leilua aieilausi ngo mütshuong to hatkei hoba haoeneibü ngüha lekei.

²⁵Hibü tou ngei ka to sudajada, ngeibü shedbü shabü apbu, hoba ngei BUNYUBOU to lemla kü ae sepeikaima.”

²⁶Hobaje Samuelei Saul to laukei, “Ngo ka ae asepeilabü; aieilausi nyi BUNYUBOUeibü ngüh asunglet, hoba BUNYUBOUei no Israel thüka Choba lela asunglet.”

²⁷Hobaje Samuel satla sepeijinei haoei haoeibü neithona senetkei hoba kho jitnyinkei.

²⁸Hobaje Samuelei hao to laukei, “BUNYUBOUei tat ka jaüan Israel sangle jittheda, hoba kho kaibü lepbou ka to maibou che la kua.

²⁹Hobaje tokei Israel Soneikangbouei ayepeilabü ayingsi maangpon asepeilabü; aieilausi maangpon sepeilabü lele hao müt che aying.”

³⁰Kheijinei haoei laukei, “Ngei shabü shona, khei yingsikei ngei ka to sudajada, kü mütli jaishou shuong thedanga hoba Israel to ngeibü soumo lenbüma, hoba BUNYUBOU kaibü Mühghaü to ngei lemenlabü lele kü aeto sepeinyu kaima.”

³¹Hibü Samuel Saul phai nyibou sepeinyu ngaikei, hoba Saulei BUNYUBOU to lembei.

³²Kheijinei Samuelei laukei, “Amalekbü Choba Agag kü jungto hato leian kai.” Hobaje Agag hao jungto olinangko loukei, hoba Agagei laukei, “Maimaitham haibü khauekbü dankhümda!”

³³Hobaje Samuelei laukei, “Kaibü inei yaksa shuong shousi akiko aptibü tegü yaksa shuong yoa kaibü nyu shousi akilabü.” Hobaje Gilgala BUNYUBOU thedanga Samuelei Agag netla yeiko wapnyinkei.

³⁴Kheijinei Samuel Rama to haukei, hoba Saul jembü chem to Sauleibü sang Gibea to haukei.

³⁵Hobaje Samuel Saul jungto hao ühai shongko touje alou; lausikei Samuelei Saul shanga mang haapbei, hoba BUNYUBOUei Saul Israel thüka Choba yeitibü shanga phokeiko kikei.