Read Chang Naga 1 SAMUEL 16 Bible Online

1 SAMUEL 16 - Chang Naga bible

1 SAMUEL 16

¹BUNYUBOUei Samuel to laukei, “Ngei hao Israel thüka Choba lela asungletnyu, nyi Saul shanga lalokche mang haapla? Kaibü ngoulaang thung onangei shentiashi, hoba hauashi, ngei Bethlehembü Jesse jungto no hautilabü; aieilausi ngei kü shanga Choba che haoeibü shousi shuong yoka piena.”

²Hobaje Samuelei laukei, “Ngo lai haula? Saulei kho dida longa haoei ngo haitilabü.” Hobaje BUNYUBOUei laukei, “Ka yoa masu saoen che leiashi, hoba laushi, ‘Ngo BUNYUBOU la haitibü lembü lemla loukei.’

³Hobaje lemshang to Jesse ngaashi, hoba nyi ai kümla ngei ka la lenkho; hoba aoeibü nyen ngei ka la lenlaje nyi hao kü shanga onang naangkujan.”

⁴Hobaje Samuelei BUNYUBOUei ai kümla lenkei kho kümbei, hoba Bethlehem to loukei, Hobaje sangnyu kabü jaishou shuong hao shuokla lühjilühko loukei hoba laukei. “No sangmaia loudaoba lo?”

⁵Hobaje haoei laukei, “Haü sangmai; ngo BUNYUBOU to lemla louakei, kan lolo saüenan kishi, hoba kü yoa lemshang to kaiya.” Hobaje haoei Jesse hoba haoeibü shousi shuong saüentikei hoba lemshang to haoen ngakei.

⁶Hobaje ladang haoen louan kikei haoei Eliab to chühkei hoba laukei, “Maimaitham BUNYUBOUei naangenko pienbü hao thedanga kia.”

⁷Lausikei BUNYUBOUei Sam- uel to laukei, “Haoeibü hesi- haang ayingsi süngsilop to techüh; aieilausi ngei hao asunglet, aishanga BUNYUBOUei mütei tegü achühda, aieilausi mütei tang chühda, lausikei BUNYUBOUei maangpon chühda.”

⁸Kheijinei Jesseei Abinadab ngakei, hoba hao Samuel thedang to dantikei, hoba haoei laukei, “Ho BUNYUBOUei apien.”

⁹Kheijinei Jesseei Shamma nyangko dantikei, hoba haoei laukei, “Hokei BUNYUBOUei api.”

¹⁰Hobaje Jesseei haoeibü shousi müt nyet Samuel thedang to dantikei.

¹¹Kheijinei Samuelei Jesse to phekei, “Kaibü shousi pendou hanei kia yingkao lo?” Hobaje haoei laukei, “Toukei napeibou jouakei, hoba chühashi, haoei san lomda.” Hobaje Samuelei Jesse to laukei, “Ngala hautian leiba aishanga hao hato alou shongko sen asatlabü.”

¹²Hibü Jesseei leila hautikei hoba hao leian loukei. Tou hao son maibü hoba nyek maibü yembü heshou hoba chühmangsühlabü che kikei. Hobaje BUNYUBOUei laukei, “Meimeiashi, hao la onang naangkuashi; aieilausi kho hao ki!”

¹³Kheijinei Samuelei onang jinbü ngoulaang thung sungkei hoba haoeibü jaisinasi yoa onang naangkukei, hoba kho chalou ka jaüan BUNYUBOUeibü soushou hau yaangbüei Dawid thük to loukei. Hibü Samuel meimeijung Rama to haukei.

¹⁴Tou BUNYUBOUeibü soushou Saul ka bangjung satkei hoba BUNYUBOU ka amaibü soushouei hao khonkutikei.

¹⁵Hobaje Saul khangenbü shuongei hao to laukei, “Tou Mühghaü ka amaibü soushouei no khonkutida.

¹⁶Tou küneibü BUNYUBOUei no khangenbou aoyou ka thedanga ki kongkin tuokla maangli maangsang müt che lamla sakbüma, hoba ladang amaibü soushou Mühghaü ka ka thükto loulaje, khei haoei haoeibü ikei kaanglabü hoba no maian aplabü.”

¹⁷Hobaje Saulei haoeibü khangenbü shuong to laukei, “Tou kü shanga maisho kaangbü müt che lambushi hoba hao kü jungto leiba.”

¹⁸Kheijinei heshou shuong yoa cheei jongaikei, “Chühashi, ngei Bethlehembü Jesseeibü shou che kongkin tuokla sangbüdobü müt che hapa, hoba hao hau yaangbü maang kaangbü hoba wapyobü müt, kümaleia tedtangbü hoba maangdühlabü müt, hoba BUNYUBOU hao yoa kia.”

¹⁹Hibü ngühlang künbü Jesse jungto hautikei hoba laukei, “Kaibü shou san yoa kibü kho kü jungto hautibü.”

²⁰Hobaje Jesseei gadua wentek hoba ih shongmok che küntian lonshou che hoba khübü kho hao shou Dawid yoa Saul jungto hautikei.

²¹Hobaje Dawid Saul jungto loukei, hoba hao thea lokei, hoba haoeibü insiaubu jungbou hao yeikei.

²²Hobaje Saulei Jesse jungto ho lauko hautikei, “Ngei ka to sudajada: Dawid kü thea lotiashi, aishanga kü thedanga hao maangshik hapa.”

²³Hobaje ladang amaibü soushou Mühghaü ka Saul thüka kikei, Dawidei kongkin sungjung louan haoeibü ikei tuokkei kheijinei Saul haksoko maian kikei, hoba amaibü soushou hao ka bangkei.