Read Chang Naga 1 SAMUEL 17 Bible Online

1 SAMUEL 17 - Chang Naga bible

1 SAMUEL 17

¹Tou Filistiabü sangjak wapyola liko yoshaikei, hoba haoen Sokoa liko yoshaikei, laobou Jihudabüeibü kikei, hoba Efes Dammima Soko si Azeka kanglanga shaikei.

²Hobaje Saul si Israel mütshuong liko yoshaian Ela yomanga shaikei hoba Filistiabü to wapyola lin küman likei.

³Hobaje Filistiabü shongha ji pheinei lokei hoba Israelbü shongha ji pheinei lokei; hoba haoen kanglanga yomang che kikei.

⁴Hobaje Filistiabü shaishang ka lajamleibou che nyenei Goliat, Gatbü che longkei, ao thong iknop lak hoba ikkam che kikei.

⁵Hobaje haoei khua chinam khun che hanan kikei, hoba nameibü mangyuk yukan kikei, hoba mangyuk kho chinam shekel hajar ngao atsheibü kikei.

⁶Hobaje haoeibü youa youeibü hele hoba haoeibü phakshok kanglanga chinam aubu kikei.

⁷Hobaje haoeibü aubu sembung kho neitakbüeibü jim tegü kikei, hoba haoeibü aubu phongkung nam shekel saongao lak atsheibü kikei, hoba haoeibü aih jungbü che thedang to haukei.

⁸Hobaje hao lokei, hoba Israelbü sepai tan to ngekkei hoba haoen to laukei, “Aila kan lason lin küman lola longkei? Ngo Filistiabü che hoba kan Sauleibü khangenbü shuong aying lo? Kan shanga kanei müt che pienashi, hoba hao kü jungto louyantiashi.

⁹Haoei kü to wapyola thükalonga hoba ngo haitialonga kheijinei kün kaneibü sambüla yeilabü, lausikei ngei hao thükalonga hoba hao haitialonga kheijinei ngeibü sambü yinglabü, hoba kün khangenlabü.”

¹⁰Hobaje Filistia bouei laukei, “Tat ngei Israelbü sepai tan khulimbo huiletda, küsi liko wapyola kü la müt che kuashi.”

¹¹Ladang Saul hoba Israelbü pendouei Filistia boueibü ngüh kho ditkei, haoen aeibou mokkei hoba hatkei.

¹²Tou Dawid kho Jihudaa Bethlehem Efratbü nyenei Jesseeibü shou kikei, hoba haoei bousu shou müt set kikei. Hobaje Jesse kho Saul haanga baushi, mütshuong yoa haangkhu onbü müt che kikei.

¹³Hobaje Jesseeibü jaishoubou müt semje Saul yoa lason to hauan kikei, hoba lason to haubü haoeibü shousi sem kho nyen Eliab, jaishoubou hoba hao thenkabou Abinadab hoba semboubü kho Shamma.

¹⁴Hobaje Dawid napeiboutham kikei, hoba jaishou müt sem kho Saul phai sembei.

¹⁵Tou Bethlehema hao boueibü sanlon pangteila Dawid Saul jungka hau longei dogo paikei.

¹⁶Hobaje Filistiabü ngeyang si chasem aei aei nyangko loukei hoba Goliatei chalou saonyi longyoko lokei.

¹⁷Hobaje Jesseei hao shou Dawid to laukei, “Tou kajaisi shuong shanga wentek ngoubü efa che hoba wentek an kho sungan khübü kho tongde kajaisi shuong shaishang to jungan hauashi.

¹⁸Hobaje habü sendei onbü an hajar thüka leiyeibü jungto jungan hauashi hoba kajaisi shuong lai ong kida chühashi, hoba haoen lai ong kidaje no longeijinei shangashatbü ngühlang sungba.

¹⁹Tou Saul si kaijaisi shuong hoba Israel müt shuong pendou Ela yomanga Filistiabü to wapyoko kia.”

²⁰Hobaje Dawid ngeyang enyu pikei hoba lombü la san phoyokukei hoba Jesseei laubü tegü jungkei, hoba haukei, hoba sepai tan san sana la phangko hauko kijinei thangtetlabü kümbü sühko hao haukei.

²¹Hobaje Israelbü si Filistiabü haoen lason san sana theshuokyoko kikei.

²²Hobaje Dawidei haoeibü on kho lombü la phokukei hoba sepai tan yoto laangjung haukei, hoba louan haoeibü jaisi shuong la salem kukei.

²³Hobaje haoei haoen to joyoko kijinei, chühashi, Gata Filistiabü lajamleibou nyenei Goliat, Filistiabü san ka longkei hoba shaangla tegü jeteibü ngüh laukei, hoba Dawidei khübü kho ditkei.

²⁴Hobaje Israelbü pendouei ladang haoenei müt kho hapbei hao jungka satkei hoba aeibou hatko kikei.

²⁵Hobaje Israel mütshuongei laukei, “Tou angko kibü müt kho kanei haplao? Maimaitham Israelbü huiletla hao longakei, hoba aoei hao haitilaje Chobaei haoeibü nyaksinam yaangbüei keitilabü hoba hao la haoeibü nouyangshou kulabü. Hobaje hao boueibü sanglea hopatham kilabü.”

²⁶Hobaje hao nyangko loan kibü mütshuong to Dawidei joyoko laukei, “Aoei ho Filistiabü haitilaje hoba Israel ka himou apbulaje hao to ai kümla? Aishanga langkibü Mühghaüeibü sepai tan khulimbo huiletbou akipbü Filistiabü ho ao?”

²⁷Hobaje mütshuongei hao to jongaiko laukei, “Hao haitibou müt khüto kho khei kümlabü.”

²⁸Hobaje haoei mütshuong to joyojinei haojai jaishoubou Eliabei ditkei hoba Dawid to Eliab khauangkei hoba laukei, “No aila louyankei? hoba sanlon shisho kho aola phoyokukei? No lilibü hoba kaibü maang amaibü ngei ngekei; aishanga no lason to chühla louyankei.”

²⁹Hobaje Dawidei laukei, “Ngei tou ai kümbei? Kho ngüh che ong aying lo?”

³⁰Hobaje haoei hao jungka lubü aeto sepeikei, hoba kho tegü laukei, hoba mütshuongei nyiboukei shaangla tegü ong jongaikei.

³¹Hobaje ladang Dawidei joyobü ngüh shuong ditkei, haoenei khübü kho Saul la ngetikei, hoba haoei hao ngala hautikei.

³²Hobaje Dawidei Saul to laukei, “Hao shangabü aokei maang apbo teki! No khangenbou haulabü hoba ho Filistiabü to wapyolabü.”

³³Hobaje Saulei Dawid to laukei, “Ho Filistiabü khulimbo hao to wapyola no haula athük; aieilausi no nashou che ong, hoba hao nashoudangka thama wapyobü müt che ki.”

³⁴Hobaje Dawidei Saul to laukei, “No khangenbouei hao boueibü sanlon lombei, hoba sanshuong yoka ladang molosaonyu cheei ayingsi sap cheei san che langkei,

³⁵ngo kho phaito haukei hoba kho haitikei hoba khoeibü sembung ka kho khümenkei. Hobaje ladang hao kü jungto longeikei, ngei haoeibü kaoshang wia jungkei hoba hao to setkutikei hoba hao haitikei.

³⁶No khangenbouei molosaonyu si sap ham haitikei, hoba ho akipbü Filistia bouei langkibü Mühghaüeibü sepai tan nyikusije haoen jetei phatko kilabü.”

³⁷Hobaje Dawidei laukei, “Molosaonyu si sapeibü ik ka ngo khümenbü BUNYUBOUei haoei ngo Filistiabü ik ka khümenlabü.” Hobaje Saulei Dawid to laukei, “Hauashi, BUNYUBOU ka yoa kilabü.”

³⁸Hobaje Saulei haoeibü hele Dawid la lekukei.

³⁹Hobaje Dawidei haoeibü in haoeibü hele thüka lekei, hoba jim akibüa hao haula haujembei; aieilausi haoei khübü haang ühaangyep, hoba Dawidei Saul to laukei, “Ngo habü yoa haula athük; aieilausi ngei habü ho haang ühaangyep.” Hobaje Dawidei hao ka khübü kho hangletkei.

⁴⁰Hobaje haoei haoeibü ika julo jungkei, hoba shumang ka laang tongtongbü pemngao hao shanga pienkei, hoba haoei jungbü sanlombü nyingkou, khei haoeibü phekhon nyingkoua jinkei; hoba haoeibü ika laang tetbü nyampük phekhon kikei, hoba hao Goliat bou nyangko haukei.

⁴¹Hobaje Filistiabü loukei, hoba Dawid nyangko loukei, hoba haoeibü aih jungbou hao thedang to haukei.

⁴²Hobaje ladang Filistia bouei kaijembo chühkei hoba Dawid hapbei haoei haola nyikukei; aieilausi hao nashou che ong hoba thong maibü hoba hesisao maibü che kikei.

⁴³Hobaje Filistia bouei Dawid to laukei, “No kü jungto julo jungan loulabü ho ngo kei lo?” Hobaje Filistia bouei haoeneibü mühghaü shuong phongko Dawid to khükko laukei.

⁴⁴Hobaje Filistia bouei Dawid to laukei, “Kü jungto kaiya, hoba ngei kaibü phe mühkabü au la hoba yammei la kulabü.”

⁴⁵Kheijinei Dawidei Filistia bou to laukei, “No kü jungto in jungan, aubu jungan, javelin jungan louda, lausikei ngoje nyi nyikubü Israel sepai tan Mühghaü, Thükenbou BUNYUBOU nyena ka jungto louda.

⁴⁶Tat chalou BUNYUBOUei no ngeibü ik to khümbo kulabü, hoba ngei ka to ngümlabü hoba ka ka kaibü khu wapan apbulabü hoba Filistiabü tan haibü mang ngei müh kabü au hoba yammei la kulabü, khoei kaodak pendouei Israela Mühghaü che kia dogo ngelabü.

⁴⁷Hobaje hanei kambü shuong pendouei BUNYUBOUei insiaubuei akhümenda dogo ngelabü; aishanga lason kho BUNYUBOUeibü hoba haoei küneibü ikto no kulabü.”

⁴⁸Hobaje ladang Filistia bou kho meimeijung Dawid to shuok- yola loukei, Dawid tongde haukei hoba Filistia bou shuokyola sepai tan aeto laangkei.

⁴⁹Hobaje Dawidei haoeibü ik nyingkou to phekattikei hoba khüka laang che sungenkei, hoba kho wenan litikei, hoba Filistia bou la khüngjaa tetkei, hoba laang kho haoeibü khulo to atkei, hoba haoeibü the khümbo kaoa tuongkei.

⁵⁰Hibü Dawidei Filistia bou to laang litibü phekhon cheei thük hapbei, hoba Filistia bou to tetkei hoba hao haitikei, lausikei Dawideibü ika in akitei.

⁵¹Kheijinei Dawid laangjung haukei hoba Filistia bou thüka lokei, hoba haoeibü in setenan khoei haoeibü khu thetkei. Hobaje ladang Filistiabüei haoeneibü hau kibü müt haibü ngekei haoen linjung satkei.

⁵²Kheijinei Israel hoba Jihudabü mütshuongei hau pendouei ngekko meimeikei hoba Gat sühko Filistiabü shuong kho haoenei shijung haukei; hibü leilubü Filistiabü mütshuong kho lama Sharaim ka Gat hoba Ekron sühko tuongkei.

⁵³Hobaje Israel shousi shuong Filistiabü phai shijung haubü ka longeikei hoba haoenei haoen shaishang shikei.

⁵⁴Hobaje Dawidei Filistia boueibü khu sungkei hoba kho Jerusalem to sungbakei lausikei haoei haoeibü insiaubu haoeibü neichema phokei.

⁵⁵Hobaje ladang Filistiabü khulimbo Dawid haubü Saulei hapbei, haoei Abner sepai san tan leibou to laukei, Abner ho heshoubou ho aoeibü shou? Hobaje Abnerei laukei, “O Choba, ngei lenla athük.”

⁵⁶Hobaje Chobaei laukei, “Heshoubou kho aoeibü shou yingkeije nyi pheyoshi.”

⁵⁷Hobaje Filistiabü haitibü ka Dawid longeijinei Abnerei hao leijung loukei hoba hao Saul jungto haoeibü ika Filistia boueibü khu jungan leian loukei.

⁵⁸Hobaje Saulei hao to laukei, “Heshoubou, no aoeibü shou?” Hobaje Dawidei jongaikei, “Ngo Bethlehembü no khangenbou Jesseeibü shou.”