Read Chang Naga 1 SAMUEL 18 Bible Online

1 SAMUEL 18 - Chang Naga bible

1 SAMUEL 18

¹Hobaje ladang Dawid si Saul ngüh joyobü thonkei, khei Jonathanei Dawid to soushou maangpon chela yeikei hoba Jonathanei jembü langkei tegü hao to sanoukei.

²Hobaje kho chalou khünei Saulei Dawid hao yoa phokei hoba touje hao boueibü chem to ohauti.

³Kheijinei Jonathan si Dawid theyolanyobü che kümbei, aieilausi haoei hao to jembü tegü sanoukei.

⁴Hobaje Jonathanei hao to kibü hele kho hangletkei, hoba kho Dawid la kukei, hoba haoeibü hele, haoeibü in, haoeibü lau, hoba haoeibü mepou yoan kukei.

⁵Hobaje Saulei Dawid lato ong hautilaje khüto hao ngüha leko haukei, hoba hao lolo songsido kiko jungeikei. Hobaje Saulei haoeibü wapyobü mütshuong thüka phokei, hoba tokei Saul khangenbü shuong thedanga kho maibü kikei.

⁶Hobaje haoen longeijinei, Dawidei Filistiabü haitibü ka longeijinei Israelbü sangle pendou ka yaksa shuong chia lauko hoba tombolakko Saul Choba shuokla busen, kongkin pithung yoa olinbüei chisichia pekyoko atyoko longkei.

⁷Hobaje yaksa shuongei haoeneibü kongkin, pithung metyobüa pekyoko chia atkei hoba laukei. “Saulei hajar haitikei, lausikei Dawidei hajar an haitikei.”

⁸Hobaje Saul aeibou khauangkei hoba kho laubüei hao aolinti, hoba haoei laukei, “Haoenei Dawid la hajar an yeitikukei hoba haoenei kü la hajar ong yeitikukei; hoba touje Choba sangle aying dangaje haoei lubü ai hapla?”

⁹Hobaje khünyet ka jaüan Saulei Dawid to nyekto shatkei hoba maang alembo apbei.

¹⁰Nyibounyet BUNYUBOU ka shabü soushouei Saul thük to hau yaangbüei loukei, hoba Dawidei chalou angboua haoei kümbü tegü haoeibü ikei kongkin kaangjinei chem maanga haoei dalabü ngüh angkei, hoba Saul haoeibü ika aubu kikei.

¹¹Hobaje Saulei aubu suan litikukei, aishanga haoei laukei, “Ngei khei Dawid kümthanga nimnim hanettilabü.” Hobaje Dawidei nyinei sühko hao jungka thekan sattikei.

¹²Hobaje Saulei Dawid to hatko kikei. Aieilausi BUNYUBOU hao yoa kikei, hoba Saul jungkaje bangan kikei.

¹³Hibü Saulei hao ka hao kuktikei, hoba hajar che thüka hao leiyeibou yeitikei, hoba mütshuong thedanga hao hau longei dogo lekei.

¹⁴Hobaje Dawidei jembü kümsilei pendoua sangkodoko jungeikei, hoba BUNYUBOU hao yoa kikei.

¹⁵Hobaje ladang haoei jembü lolo aeibou sangkodoko jungeikei dogo Saulei chühenkei, haoei hao to hatjihatko lokei.

¹⁶Lausikei Israel si Jihuda pendouei Dawid to sanoukei, aieilausi haoen thedanga hao hau longei dogo lekei.

¹⁷Kheijinei Saulei Dawid to laukei, “Kü shou noushounyu hanei kia, sao ka la yakla lela kulabü, kü shanga hau aei kiashi, hoba BUNYUBOUeibü lason wap- yoashi.” Aishanga Saulei laukei, “Hao thükto ngeibü ik tütkho, lausikei Filistiabü ik hao to attikho.”

¹⁸Hobaje Dawidei Saul to laukei, “Ngo Chobaeibü kounyang yeilabü lele Israela ngo ao hoba ngeibü langkei ayingsi kün chem- penkei ai?”

¹⁹Lausikei ladang Sauleibü nouyangnyu Merab Dawid la kulabü jih sühkei sao Meholabü Adriel la yakla lela kuan apbei.

²⁰Hobaje Sauleibü shou Maikelei Dawid to sanoukei, hoba haoenei Saul to lenkei, hoba khoei hao olintikei.

²¹Hobaje Saulei laukei, “Hao shanga Maikel sung che kilabü, hoba Filistia büeibü ik hao khulimbo kilabü lele ngei hao la sao kulabü.” Hibü Saulei Dawid to laukei, “No tat ngeibü haishoubou yeilabü.”

²²Hobaje Saulei hao khangenbü la sakkuko laukei, “Dawid to chemphanga joyoashi, hoba lenashi, chühashi, Chobaei ka to olinda, hoba haoeibü khangenbü pendouei no sanouda, hibü tou Chobaeibü kounyang yeishima.”

²³Hobaje Sauleibü khangenbü shuongei khübü ngüh Dawideibü noua thenan lenkei. Hobaje Da- widei laukei, “Ngo shalebü müt che dogo hapan Chobaeibü kounyang yeilabü kho kan thedangaje sosotham tegütham damda lo?”

²⁴Hobaje Sauleibü khangenbü shuongei hao to Dawidei ho tegü hai laukei dogo lenkei.

²⁵Hobaje Saulei laukei, “Kanei Dawid to, ‘Chobaei lubü ai munam amangsühda, lausikei Filistiabüeibü phekhop saongao Chobaeibü dangbou shuong phoklam mangsühda,’ dogo laujan.” Tou Saulei Dawid Filistiabüeibü ikei tuongtila dambei.

²⁶Hobaje ladang hao khangenbü shuongei habü ngüh Dawid to lenkei, khoei Chobaeibü kounyang yeila Dawid maisho olintikei, hoba chalou shuong kho apenjinei

²⁷Dawid hoba hao mütshuong meimeijung haukei hoba Filistiabü saoan haitikei; hoba Dawidei haoeneibü phekhop sungbakei hoba hao lolo Chobaeibü haishoubou yeila Choba shanga haoen la penko kukei. Hobaje Saulei haoeibü shou Maikel yakla lela hao la kukei.

²⁸Hobaje BUNYUBOU Dawid yoa kikei dogo Saulei hapbei hoba ngekei, hoba Sauleibü shou Maikelei hao to sanoukei.

²⁹Hobaje Saulei tokei Dawid to aei hatko kikei, hoba athakko Dawideibü dangbou kikei.

³⁰Kheijinei Filistiabü leiyeibü shuong longkei, hoba haoen ladüngnei longkei khüjochenei Dawidei Sauleibü khangenbü pendou to aei songsido kiko jungeikei. Hibü haoeibü nyen aei hangenkei.