Read Chang Naga 1 SAMUEL 19 Bible Online

1 SAMUEL 19 - Chang Naga bible

1 SAMUEL 19

¹Saulei haoshou Jonathan si hao khangenbü shuong to Dawid haitila lenkei.

²Hobaje Sauleibü shou Jonathanei Dawid to aeibou maangshikko kikei. Hobaje Jonathanei Dawid to ho hai laukei, “Kü bou Saulei no haitila lamda, hibü tou ngei ka to sudajada, no lolo ngeyang maangsangko kishi, hoba hushang chenei kishi, hoba no lolo hushi.

³Hobaje ngo no kishang khongthua thinei kübou nyangko lolabü, hoba ngei ka shanga kübou to joyolauyolabü, hoba ngei denche ditalonga ngei ka la lenlabü.”

⁴Hobaje Jonathanei haobou Saul to Dawid shangabü maibü lenyokei, hoba hao to laukei, “Chobaei jembü khangenbou Dawid to khulimbo shabü tejungei; aieilausi haoei no khulimbo shedbü ajungei, hoba haoeibü kümsilei ka aedanga maibü ki.

⁵Aishanga haoei haoeibü langkei haoeibü ika phokei, hoba Filistiabü to wapyokei, hoba BUNYUBOUei Israel pendou shanga thüksimin yaangbü sungbakei. Hobaje kho nyi hapa, hoba olinyokei; kholonga ai ayingnyu nyi aila Dawid haitiko shedbü akibü sii khulimbo shabü shonla?”

⁶Hobaje Saulei Jonathaneibü ngüh ditkei hoba Dawid ühaitilabü dogo BUNYUBOU nyena theletlanletkei.

⁷Hobaje Jonathanei Dawid ngakei, hoba habü pendou Jonathanei hao to lenkei. Hobaje Jonathanei Dawid Saul jungto leibakei, hoba shangied tegü hao hao junga kikei.

⁸Hobaje tokei nyibou wapyo kikei, hoba Dawid haukei hoba Filistiabü to wapyokei, hoba haoenei juong haitikei, hoba hao thedang ka haoen linkei.

⁹Hobaje Saulei haoeibü ika aubu jungan chema setan kijinei amaibü soushou BUNYUBOU ka hao thüka kikei, hoba Dawidei haoeibü ikei kongkin tuokkei.

¹⁰Hobaje Saulei Dawid to kümthanga nimnim aubuei sula lambei, lausikei Saul thedang ka hao shetjung satkei, hoba haoei aubu kho kümthanga suan yontikei, hoba Dawid satenkei, hoba khüyou satenkei.

¹¹Hobaje Dawideibü chem komlabü hoba ngeyangje hao haitila Saulei ngühlang künbü shuong Dawideibü chem to hautikei, hoba Dawideibü yak Maikelei hao to hai laukei, “No kaibü langkei tao akhümenlonga ngietje no hailabü.”

¹²Hibü Maikelei koulom danko Dawid tonan yantikei, hoba hao haukei hoba satkei, hoba satenkei.

¹³Hobaje Maikelei heangsho noksa sungjung louan kho yepshanga tentian phokei, hoba kho neiei yuklepan khua loneibü wi phokukei.

¹⁴Hobaje ladang Saulei ngühlang künbü shuong Dawid sungla hautikei, saoei laukei hao shatko kia.

¹⁵Hobaje Saulei ngühlang künbü shuong hai lauko Dawid chühla hautikei, “Ngei hao haitila shanga hao kü jungto shena lengba.”

¹⁶Hobaje ladang ngühlang künbü shuong chem maang to lotkei, chühashi, shena heangsho noksa hoba loneibü wi kikei.

¹⁷Hobaje Saulei Maikel to laukei, “Aila nyi ngo hai khüpettida? Hobaje hao satenlabü lele ngeibü dangbou aila sattikei?” Hobaje Maikelei Saul to jongaiko laukei, “Haoei kü to laukei, ‘Ngo sattikai, ngei no aila haitila.’ ”

¹⁸Tou Dawid satkei hoba satenkei, hoba Rama to Samuel jungto loukei, hoba hao la Saulei kümbü pendou lenkei, hoba Samuel haosi ham hauan Naiota kikei.

¹⁹Hobaje Saul to ho hai lenkei, “Chühashi, Dawid Ramaa Naiota kia.”

²⁰Hobaje Saulei ngühlang künbü Dawid leian loula hautikei, hoba thuseibü danei hoba haoen thüka Samuel leibou lean thusei ngüh tetenko lauyobü haoenei hapbei; Mühghaü soushou haoen thükto lotkei hoba haoeneikei thusei ngüh tetenko joyokei.

²¹Hobaje ladang kho Saul to lenkei, haoei lubü ngühlang künbü shuong hautikei hoba haoeneikei tetenbü ngüh laukei, hoba toukei sembou la Saulei ngühlang künbü shuong hautikei, hoba haoeneikei tetenbü ngüh laukei.

²²Kheijinei toukei hao Rama to haukei, hoba Sekua kibü deikhün yaangbü to loukei, hoba haoei pheko laukei, “Samuel si Dawid lan ki?” Hobaje cheei laukei, “Chühashi, haoen Ramaa Naiot sanga kia.”

²³Hobaje hao Ramaa kibü Naiot ae khüto haukei, hoba Mühghaü Soushou hao thüktokei loukei, hoba hao haujinei hao Ramaa kibü Naiot asüh shongko thusei ngüh tetenko laukei.

²⁴Hobaje haoeikei jembü neisimei hangletan phokei, hoba haoeikei Samuel thedanga thusei ngüh tetenko laukei; hoba khünyet chalou sünga hoba khüyou langyang sünga mütkong lekeikei. Hibü haoenei laukei, “Thuseibü yoa Saulkei yokei sai?”