Read Chang Naga 1 SAMUEL 21 Bible Online

1 SAMUEL 21 - Chang Naga bible

1 SAMUEL 21

¹Kheijinei Dawid Nob lambo Ahimelek ungshedbou jungto haukei, hoba Dawid to haüyola Ahimelek lühjilühko loukei, hoba Dawid to laukei, “Aila no mütpem ka yoa ao ayoko lai?”

²Hobaje Dawidei Ahimelek to laukei, “Chobaei kü la kümsilei sakkukei, hoba kü to laukei, ‘Laobou kümsilei shanga ngei no hautida, hoba ai ngei ka la sakkukei ao müt lakei tengeti.’ Hobaje ngei heshou shuong hi hi to hautia.

³Hibü tou kaibü ika ai ki? Kü la wentek ngao ayingsi khünei ai ong ki labü.”

⁴Hobaje ungshedbouei Dawid to jongaiko laukei, “Ngeibü ika hanghangko shaubü wentek aki, lausikei heshou shuongei yaksa ka bangan kialonga khünei saopobü wentek kia.”

⁵Hobaje Dawidei ungshedbou to jongaiko laukei, “Maimaitham nyishoubü wakoua ongkei saopoan haudanyu tatbüa sema heshou shuong lai küman asaopola?”

⁶Hibü ungshedbouei hao la saopobü wentek kukei, aishanga Mühghaü thedanga phobü wentek to liman khünei lubü wentek akitei; kho sungenbü chaloua wentek lemabüei jeian phola shanga kho BUNYUBOU thedang ka sungbü kikei.

⁷(Tou khünyet chalou Sauleibü khangenbü shuong yoka che BUNYUBOU thedanga senetan pholabü kikei; kho haoeibü nyen Edombü Doeg, Sauleibü sanlombü konglebou kikei.)

⁸Hobaje Dawidei Ahimelek to laukei, “Khünei kaibü ika aubu ayingsi in aki lo? Aieilausi ngei ngeibü inlou ayingsi insiaubu ajung, aieilausi Chobaeibü kümsilei panteibü longan apbei.”

⁹Hobaje ungshedbouei laukei, “Ela yomanga nyi Filistiabü Goliat haitibü in kho ong ungshedboueibü saopobü neisimei phoshang phai khünei nei cheei shoan kia, nyi kho lekho lausi kho leashi; aishanga khoto limbo lubüje aki.” Hobaje Dawidei laukei, “Kho to maibou lubü aki, kho labü.”

¹⁰Hobaje Dawid meimeijung Saul to hatbü ka khünyettham wenjung satkei, hoba Gatbü Choba Akish jungto haukei.

¹¹Hobaje Akisheibü khangenbü shuongei hao to laukei, “No, ho kaonyek kabü Dawid Choba aying lo? Hao shanga haoenei jongaiyoko tombolakko, ‘Saulei hajar shijo, lausikei Dawidei hajar an haitikei,’ dogo lauko chia atkukei aying lo?”

¹²Hobaje khübü ngüh Dawidei jembü maanga phokei, hoba Gatbü Choba Akish yongko hatko kikei.

¹³Hobaje haoen thedanga haoei haoeibü haang jeileikei, hoba haoeneibü ika haoei langet angan lenkei, hoba koukhün koukapa thangeikei hoba haoeibü sembung ka hesubü haoeibü kaoshang wi to yanjung attikei.

¹⁴Kheijinei Akishei haoeibü sambü shuong to laukei, “Chüh- ashi, müt kho langet angbü dogo kanei hapda. Hibü aila hao kü jungto leibakei?

¹⁵Ngo langet angbüei shaleakei si, ho müt ho kü jungto langet angbü neinoula leibakei lo? Ho müt ho ngeibü chem to lottida si?”