Read Chang Naga 1 SAMUEL 22 Bible Online

1 SAMUEL 22 - Chang Naga bible

1 SAMUEL 22

¹Hibü Dawid khüka Adullam laangpob lamjung satkei, hoba ladang haoeibü jaisina hoba hao boueibü chempenei ditkei, hao jungto khüto louyenkei.

²Hobaje khonsakbü mütpem weko hoba sanghsiyung thebü mütpem weko hoba maang ühaiko kibü mütpem weko haoen lolo liko hao jungto yoshaikei, hoba haoen thüka hao leiyeibou yeikei hoba hao yoa müt saongao lei thüng kikei.

³Hobaje khüka Dawid Moaba Mizpa to haukei, hoba haoei Moabbü Choba to laukei, “Mühghaüei kü shanga ai kümla kho ngei ange shongko kübou si künyu kan jungto louan kitishima.”

⁴Hobaje haoei haoen Moabbü Choba jungto leian loukei, hoba Dawid lapheishona ki shongko haoen yoa kikei.

⁵Hobaje thuseibou Gadei Da- wid to laukei, “Lapheishona teki kukashi, hoba Jihuda kaodak to atashi.” Kheijinei Dawid kukjung satkei, hoba Heret lamang to loukei.

⁶Hobaje Saulei Dawid hoba hao yoa kibü mütshuong lamena dogo ditkei. Tou Saul haoeibü ika aubu jungan hoba hao yoa khangenbü pendou hao nyangko lotian phoan Rama shongh khua tamarisk bunyu phanga Gibeaa setan kikei.

⁷Hobaje Saulei hao nyangko loan kibü khangenbü shuong to laukei, “Kan Benjamin mütli shuong ditashi. Jesseeibü shouei kan mütpem weko la sek hoba semlühlaak kulep sai, haoei kan pendou hajar thüka leiyeibü hoba saongao thüka leiyeibü yeitilep sai?

⁸Khei kan pendouei ngo khulimbo huon takkei, ladang ngeibü shouei Jesseeibü shou to linyokei kho ngetila ao aki hoba kü shanga maangto shatkubü kan yoa ao aki; ayingsi kü shouei ngo khulimbo ngeibü khangenbü jukan jinan tat chalou tegü thoan kibü kü la angetida lo?”

⁹Kheijinei Saul khangenbou thüka kibü Edombü Doegei jongaiko laukei, “Ahitabeibü shou Ahimelek jungto loubü hapa.

¹⁰Hobaje hao shanga haoei Mühghaü to phekei, hoba hao la shausiyung kukei hoba hao la Filistiabü Goliateibü in kukei.”

¹¹Kheijinei Chobaei Ahitabeibü shou Ahimelek ungshedbou hoba hao boueibü chempen pendou Noba kibü ungshedbou shuong ngala hautikei, hoba haoen pendou Choba jungto loukei.

¹²Hobaje Saulei laukei, “Tou ditashi, no Ahitabeibü shou.” Hobaje haoei jongaikei, “Ngo hanei kia, ngeibü bunyubou.”

¹³Hobaje Saulei hao to laukei, “Haoei ngo khulimbo meimeikei hoba tat chalou tegü kü la thokuan aila kanei ngo khulimbo huon takkei, khei kanei hao la wentek hoba in che kukei, hoba hao shanga Mühghaü to phekei?”

¹⁴Kheijinei Ahimelekei Choba to jongaiko laukei, “Hobaje no khangenbü pendou yoa Dawid tegü kaibü kounyangbou ao ki? Hobaje kaibü langkei thüka leiyeibou lombü ki hoba kaibü chema hangenko kia, hao tegü maanglembü ao ki?

¹⁵Tat ong ngei hao shanga Mühghaü to phekei sai? Kho tegü ladangkei aying; Chobaei jembü khangenbü to ayingsi haoeibü chempen thenbou lenbou to ai shedbü tekümma; aishanga no khangenbouei ho shean alen ayingsi aikei angekei!”

¹⁶Hobaje Chobaei laukei, “Ahimelek, no hoba kaibü chempen shuong pendou tükde hailabü.”

¹⁷Chobaei hao nyangko lobü hao lombü to laukei, “Sepeiashi, hoba BUNYUBOUeibü ungshedbou shuong haitiashi, aieilausi haoeneibü ik Dawid yoa kia; aieilausi hao sada dogo haoenei ngeakei, hoba kho kü la angeti.” Lausikei khangenbü shuongei haoeneibü ik BUNYUBOUeibü ungshedbou shuong to ashaten.

¹⁸Hobaje Chobaei Doeg to laukei, “No sepeiashi, hoba ungshedbou shuong to ik atashi.” Hobaje Edombü Doeg sepeikei hoba haoei ungshedbou shuong to ik atkei, hoba khünyet chalou haoei ungshedbou saopobü hele lebü müt saoleito ngao haitikei.

¹⁹Hobaje ungshedbou shuong sangnyu Nob haoei inei bousu hoba yaksa, shousi hoba senyopbo kibü, masu pongsu shuong hoba gadu hoba sanlon shuong haitikei.

²⁰Hobaje Ahitabeibü shou Ahimelekeibü shousi yoa Abiathar nyenbü müt che satenkei, hoba Dawid yoto satjung haukei.

²¹Hobaje Abiatharei Dawid to BUNYUBOUeibü ungshedbou shuong Saulei haitia dogo lenkei.

²²Hobaje Dawidei Abiathar to laukei, “Ladang Edombü khünei kikei haoei maimaitham Saul to lenlabü dogo ngei khünyet chaloua ngekei; kaboueibü chempen pendou haibü shanga ngeibü on ki.

²³No kü yoa kishi, tehüt, aishanga aoei ngeibü langkei lamda, haoei kaibü langkeikei lamda, aieilausi nokei khümenakei.”