Read Chang Naga 1 SAMUEL 24 Bible Online

1 SAMUEL 24 - Chang Naga bible

1 SAMUEL 24

¹Tou ho longkei, ladang Saul Filistiabü shibü ka longaikei, hao to, “Chühashi, Dawid Engedi yama kia” dogo lenkei.

²Kheijinei Saulei shanenbü müt hajar sem Israel ka sungkei, hoba Yaoeibü Laangchema Dawid si hao mütshuong lamla haukei.

³Hobaje lama hao sanlombüeibü laangpob che kishang to loukei, hoba Saulje setla atkei. Tou Dawid hoba hao mütshuong laangpob maangkabouatham kikei.

⁴Hobaje Dawideibü mütshu- ongei hao to laukei, “Chühashi, BUNYUBOUei ka to, ‘Chühashi, ngei kaibü dangbou kaibü ik to khümbo kulabü, hoba nyi ka thedanga ai maikei kho kümlabü’, dogo laubü chalou kho tat ki.” Kheijinei Dawid meimeikei hoba huphanga Sauleibü neimok liplangkei.

⁵Hobaje phaila Dawidei jembü maangpona meiyoukei, aieilausi haoei Sauleibü neihuom liplangkei.

⁶Hobaje haoeibü mütshuong to laukei, “Mühghaüei pienbü ngeibü bunyubou to ho kümlabü, hao Mühghaüei pienbü dogo ngean hao khulimbo ngei ikshatla ngo shiletkeima.”

⁷Hibü Dawidei habü ngühei haoeibü mütshuong shiletkei hoba Saul khulimbo meimeila asakku, hoba Saul laangpob ka pikei hoba jembü lam to haukei.

⁸Dawid kei phaila pikei hoba Saul phaito ngekko laukei, “Ngeibü bunyubou Choba!” Hobaje Saulei hao to chühkei, hoba Dawidei haoeibü thenyek soumo kuko kao ae khüpetkei,

⁹hoba laukei, “Chühashi, Dawidei ka to amaibü kümla lamda dogo laubü ngüh nyi aila ditda?

¹⁰Chühashi, lai BUNYUBOUei no tat laangpoba kü ik to khümbo kukei; tat kaibü nyekei hapa hoba ateije no haitila kü to phekei, lausikei ngeibü nyekei ka to phokeiko khümenkei, hoba ngei laukei, ‘Ngei ngeibü bunyu khulimbo ngeibü ik ashatlabü, aieilausi hao BUNYUBOUei pienbü ki.’

¹¹Tokei Abou, chühashi, haü, ngeibü ika kaibü neihuom youae nei chühashi; khoei ngei kaibü neihuom youae nei lipan apbukei hoba no ühaiti dogo lenda, ngeibü ika amaibü ayingsi ngühkhüm lulimbü aki dogo nyi ngeashima; hoba nyi ngeibü langkei lela shieisikei ngei kakhu limbo shabü ashon.

¹²Seti kanglanga BUNYUBOUei mat jemshima, hoba ka shanga BUNYUBOUei phok lamshima; lausikei ngeibü ikje ka to ashatlabü.

¹³Shangied tetenbü ngüha laubü tegü, ‘Amaibü ka amaibü kümsilei longda;’ lausikei ngeibü ik ka thükto ashatlabü.

¹⁴Israelbü Chobaei ao shijung longkei? Nyi ao shieida? Kei haibü phai si keili phai?

¹⁵Hibü BUNYUBOU matjembou yingshi, hoba seti kanglanga matjem kushi, hoba chühashi, hoba kü la yingkubü yingshi, hoba kaibü ik ka ngo khümenshima.”

¹⁶Hobaje ladang Dawidei habü ngüh Saul to joyobü nangkei khei Saulei laukei, “Ho kaibü ngüh lo, kü shou, Dawid?” Hobaje Saulei ngüh longkei hoba haapbei.

¹⁷Kheijinei haoei Dawid to laukei, “Kü to je no saopobou ki, aishanga ngei ka la amaibü kusi nyije kü la maibü kungaikei.

¹⁸Hobaje tat nyi kü to maian jungeikei dogo nyi ngetia; aishanga BUNYUBOUei ngo kaibü ika khümbo kuasidogokei nyi ngo ühaiti.

¹⁹Aishanga müt cheei jembü dangbou haüyojinei haoei hao litilep si? Hibü nyi tat kü to kümbü kho BUNYUBOUei ka la maibü pailettishima.

²⁰Hobaje tou chühashi, ngei ngekei, khei no maimaitham Choba yeilabü hoba Israel sangle kaibü ika yaülabü.

²¹Hibü tou khei nyi kü phainei ngeibü lilabü wapan üpbulabü hoba nyi küboueibü chemdang ka ngeibü nyen amautikulabü dogo BUNYUBOU nyena thealanashima.”

²²Hibü Dawidei Saul to khei kümlabü dogo thekeilankei, hoba Saul chem to ngaikei; lausikei Dawid si haoeibü mütshuong hushang to ngaikei.