Read Chang Naga 1 SAMUEL 26 Bible Online

1 SAMUEL 26 - Chang Naga bible

1 SAMUEL 26

¹Kheijinei Zifbü shuong Saul jungto Gibea to louan laukei, “Jeshimon thedanga Hakila shongha Dawid hao lolo maimai huan akilo?”

²Kheijinei Saul meimeikei hoba Israelbü pienbü müt hajar sem leian Zif yama Dawid lamla Zif yam to yankei.

³Hobaje Jeshimon nyangko Hakila shongha Saulei shaishang lamlekei. Lausikei Dawid yama kikei, hoba Saul hao phainei yamlamang to louakei dogo haoei hapbei.

⁴Hibü Dawidei lapheibü hautikei, hoba maimaitham Saul loukei dogo ditenkei.

⁵Hobaje Dawid meimeikei hoba Saul sühshang to loukei, hoba Saul hoba haoeibü sepai tan leiyeibü Nereibü shou Abner lanei kikei kho hapbei, hoba Saul maangaenei neichem phanga yepan kikei hoba mütshuongei hao kaijembo shaishang kümbei.

⁶Kheijinei Hitbü Ahimelek to hoba Joabeibü jaisina Zeruiaeibü shou Abishai to Dawidei laukei, “Kü yoa ao Saul jungto shaishang to yanla?” Hobaje Abishaiei laukei, “Ngo ka yoa yanlabü.”

⁷Hibü Dawid hoba Abishai mütshuong jungto nangnak loukei hoba chühashi, Saulei haoeibü aubu haoeibü khu nyangko kaoa jaangtian phoan hao shaishang kommaanga yepan kikei, hoba Abner hoba mütshuong hao kaijembo kikei.

⁸Kheijinei Abishaiei Dawid to laukei, “Tat Mühghaüei kaibü dangbou kaibü ika khümbo kua, hibü tou ka to sudajada, aubu khoei kaoa yonko ngei hao to che ong hankho, ngei hao to nyibou ühünlabü!”

⁹Hobaje Dawidei Abishai to laukei, “Hao tühaiti, aishanga BUNYUBOUei naangenko pienbü khulimbo jembü ik shatsi shedbü akiko kienlep lo?”

¹⁰Dawidei laukei, “BUNYUBOU lang kiabü BUNYUBOUei hao to ngümlabü ayingsi hao hailabü chalouei sühlabü; ayingsi hao lason to haulabü hoba maulabü.

¹¹BUNYUBOUei naangenko pienbü khulimbo ngei kü ik ashatla shiletshima; lausikei tou ngei ka to sudajada, haoeibü khu aedanga kibü aubu si shongmok kho jungashi hoba sen satkho.”

¹²Hibü Dawidei Sauleibü khu ka aubusi shongmok sungkei hoba haoen satkei hoba müt aoeikei ühüp ayingsi kho ange, ayingsi aokei alaksep, aishanga BUNYUBOUei haoen nyeket shitikei.

¹³Kheijinei Dawid naphei to haukei, hoba saabüa shongh khua haoen jungka saan lokei.

¹⁴Hobaje Dawidei mütshuong to hoba Nereibü shou Abner to ngekkei, “Abner, nyi ajongaida lo?” Kheijinei Abnerei jongaiko laukei, “Choba to aoei ngekda?”

¹⁵Hobaje Dawidei Abner to laukei, “No maangkaangbü müt che aying lo? No phatbü Israela ao ki? Khülonga nyi kaibü Choba lombo akitei sai? Aishanga eikshuong yoa cheei kaibü bunyubou mautila atkei.

¹⁶Nyi kümbü ho maibüje aying. BUNYUBOU lang kiabü kan haila muakei; aieilausi BUNYUBOUei naangenko pienbü kanei alomtei. Hobaje tou chühashi, Chobaeibü aubu si haoeibü khu nyangko shongmok kibü kho lanei ki?”

¹⁷Hobaje Saulei Dawideibü ngüh shenkei hoba laukei, “Kü shou Dawid, ho kaibü ngüh sai?” Hobaje Dawidei laukei, “Ho ngeibü ngüh, ngeibü bunyubou, O Choba.”

¹⁸Haoei athakko laukei, “Ailaibü ngeibü bunyubouei jembü sambü shieida? Ngei ai kümbü shanga ayingsi ngeibü ika ai amaibü ki?

¹⁹Hibü tou ngei ka to sudajada, ngeibü bunyubou Chobaei jembü sambüeibü ngüh ditshima. BUNYUBOUei ngo khulimbo no thungeikei dogo yingalonga haoei lembü sungletshima lausikei ho müteibü shousi shuongei yingalonga BUNYUBOU thedanga haoen shedsikhau baushi; aishanga BUNYUBOUeibü pheta ngo ayolabü lele tat ngo shian sattiko laukei, ‘Hauashi, lubü mühghaü shuong lemashi.’

²⁰Kho khei yingsije tou BUNYUBOU thedang ka bangjung hauan ngeibü sii kaoa tesangtima; aishanga atei shongha au lambü hoba keili lambü tegü ngeibü langkei lamla louakei.”

²¹Kheijinei Saulei laukei, “Ngei shabü shona, sepeinyu kangaia, kü shou Dawid, aishanga touje ngei ka to amaibü akümlabü; aishanga tat ka thea ngeibü langkei namsek kikei, chühashi, ngei ngoubü nei noukei, hoba aeibou mashika.”

²²Hobaje Dawidei jongaikei, “O Choba, aubu to chühshi! Hibü heshou shuong yoka müt che louan kho ngailangashi.

²³Hobaje BUNYUBOUei mütpem weko la hao saopobü hoba maanglembü kulabü; aishanga tat BUNYUBOUei no ngeibü ika khümbo kukei, lausikei BUNYUBOUei naangenko pienbü khulimbo ngei ngeibü ik ashat.

²⁴Tat kü thedanga kaibü langkei phokeibü tegü, kho hima bunyubou thedanga phokeitishi, hoba haoei khonsak maangshat pendou ka ngo khümenshima!”

²⁵Hibü Saulei Dawid to laukei, “No haübou yingshi, kü shou Dawid; nyi aiong kümlaje nyi maimaitham thük haplabü.” Hibü Dawid lam to kishang to sepeinyu ngaikei.