Read Chang Naga 1 SAMUEL 27 Bible Online

1 SAMUEL 27 - Chang Naga bible

1 SAMUEL 27

¹Lausikei Dawidei jembü maanga daman laukei, “Tou ngo nyetche chalouje Sauleibü ika maulabü.” Filistiabü kaonyek to satetlanglabü to liman kü shanga aikei maibou aki; hoba Israelbü leilang pendoua ngo lamla shanga Saul haolo anglabü kho tegü haoeibü ik ka ngo satenlabü.

²Hibü Dawid meimeian hao yoa kibü müt saongao sem leian Gatbü Choba Maokeibü shou Akish jungto meimeijung haukei.

³Hobaje Dawid Gata Akish yoa kikei, hoba haoeibü mütli shuong mütpem weko jembü chempen yoa khei Dawid kei haoeibü yak müt nyi Jezreelbü sao Ahinoam hoba Karmelbü sao Abigail, Nabaleibü yak latnyu yoa kikei.

⁴Hobaje Saul to Dawid Gat to satjung haua dogo ngetikei, hoba haoei touje hao alam.

⁵Hobaje Dawidei Akish to laukei, “Tou ngei ka thedanga onou hapalonga, sangnyu yoa hanei ngo kilabü lele kishang che kü la haoenei kutishima; aishanga kaibü sambü aila Chobaeibü chema ka yoa kila?”

⁶Kheijinei khünyet chalou Akishei hao la Ziklag kukei, khoei tat sühko Ziklag Jihudabü Choba shangabü ki.

⁷Hobaje Dawid Filistiabü kaodaka kibü süngabü kho po che lit lei.

⁸Hobaje Dawid si hao mütshuong angkei hoba Geshurbü, Girzbü hoba Amalekbü shikei, aishanga Telam ka Shur, khei shangied Ijep kaodak to haubü kaodaka khübü phangshuong kiteikei.

⁹Hobaje Dawidei kaodak kho shikei, hoba bousu yaksa che ongkei lang aphoku, hoba sanlon shuong, masu shuong, gadu shuong, ut shuong hoba neisimei pendou sunglangkei hoba hao sepeinyu Akish jungto longeikei.

¹⁰Hobaje Akishei laukei, “Kanei tat aosang shikei?” Hobaje Dawidei laukei, “Jihuda yungkük khulimbo hoba Jerahmeel yungkük khulimbo hoba Ken yungkük khulimbo.”

¹¹Hobaje Dawidei bousu yingsikei yaksa yingsikei Gat to haoen sungbalabü lele langkei üpyo, khei ayinglonga, “Dawidei hai kümbei,” dogo haoenei sen shangabü laueikulabü dogo dambei. Filistia kaodaka kibü jihsiphai sünga haoei kho hangsilama jungeikei.

¹²Hobaje Akishei Dawid to mailembo hao lolo laukei, “Haoei jembü mütli Israel la hao maisho mangsentia, khoei hao ponpen ngeibü sambü kilabü.”