Read Chang Naga 1 SAMUEL 28 Bible Online

1 SAMUEL 28 - Chang Naga bible

1 SAMUEL 28

¹Khübü chaloua Filistiabü Israel to wapyola sepai tan yoshaikei, hoba Akishei Dawid to laukei, “Nyi maisho ngeashi, no hoba kaibü mütshuong, kü yoa sepai tan yoa haulabü.”

²Hobaje Dawidei Akish to laukei, “Maiakei, kaibü sambouei ai kümla kho nyi ngelabü.” Hobaje Akishei Dawid to laukei, “Maiakei, ponpen ngeibü khu lombou no yeitilabü.”

³Tou Samuel haikei, hoba Israelbü pendouei mang haapbei hoba khei hao jembü sangnyu Ramaa khünkei, hoba kaonyek ka Saulei sou kibü seibü hoba seibüyaübü shuong shian sattian kikei.

⁴Hobaje Filistiabü shuong liko yoshaikei hoba louan Shunama shaikei hoba Saulei Israelbü pendou liko yoshaitikei.

⁵Hobaje Saulei Filistiabü sepai tan hapjinei hao hatko kiteikei, hoba haoeibü maangpon aeibou lühkei.

⁶Hobaje Saulei BUNYUBOU to phekei, lausikei BUNYUBOUei mangha yingsikei, Urimei yingsikei, ayingsi thuseibü danko yingsikei hao to ajongai.

⁷Kheijinei Saulei haoeibü sambü shuong to laukei, “Sou kibü yaksa che, ngo sao jungto haula hoba sao ka pheyolabü lele kü la lambüma.” Hobaje haoeibü sambü shuongei hao to laukei, “Chühashi, Endora sou kibü seibüyaübü manghtakbü yaksa che kia.”

⁸Hobaje Saulei hao lolo jeileian lubü neisimei lean hao hoba hao yoa müt nyi leian haukei, hoba nangnak yaksanyu jungto haukei, hoba haoei laukei, “Ngei ka to sudajada, kaibü seiei ngei ka to ao ao nyen lenlaje, longtishima.”

⁹Hobaje yaksanyu khoei hao to laukei, “Chühashi, Saulei ai kümbei nyi ngeakei, haoei lai sei kakbü hoba seibüyaübü kaonyek ka wapan apbei, hibü nyi ngo haitila aila ngeibü langkei shanga sung sankuda?”

¹⁰Kheijinei Saulei sao to BUNYUBOU nyena thekolanko laukei, “BUNYUBOU lang kian ho kümsilei shanga ka to ai shieikoe akilabü.”

¹¹Kheijinei yaksanyuei laukei, “Ngei ka la ao longtikula?” Hobaje haoei laukei, “Kü jungto Samuel longtibü.”

¹²Hobaje yaksanyuei Samuel hapjinei saoei kaang ngekkei hoba yaksanyu khoei Saul to laukei, “Aila nyi ngo huonettikei? Aiei no Saul yingkei!”

¹³Hobaje Chobaei sao to laukei, “Tehüt, nyi ai hapbei?” Hobaje yaksanyuei Saul to laukei, “Ngei kao ka mühghaü che longko hapda.”

¹⁴Hobaje haoei sao to laukei, “Hao chühla lai yingkei?” Hobaje saoei laukei, “Baushi müt che longda hoba haoei neisimei che lean kia.” Hobaje kho Samuel dogo Saulei ngean apbei, hoba souhat lenkei.

¹⁵Hobaje Samuelei Saul to lenkei, “Aila nyi ngo naangjamtiko leian longtikei?” Hobaje Saulei jongaikei, “Ngo aeibou maangshata kia, aishanga Filistiabü ngo khulimbo wapyoda hoba Mühghaü kü jungka bangjung sada, hoba touje kü to thuseibüei yingsikei, mangh danko yingsikei ajongaida; hibü ngei ai kümla kho kü la ngetila ngei no ngakei.”

¹⁶Hobaje Samuelei laukei, “BUNYUBOU ka ka banga dogo, hoba no khulimbo yeia dogo ngean aila nyi kü to pheda?

¹⁷“Ngei lenbü tegü BUNYUBOUei ka to küma; aishanga kaibü ik ka BUNYUBOUei sangle jitnyina hoba kho kaibü lepbou Dawid la kua.

¹⁸Aieilausi nyi BUNYUBOUeibü ngüh ale, hoba hao hatlamoklabü khauang longbü Amalek khulimbo nyi aküm, khoei BUNYUBOUei ho kümsilei ka to tat kümbei.

¹⁹Tokei BUNYUBOUei Israelbü yoa no yoan Filistiabü ik to kukei. Hobaje ngiet no hoba kaibü shousi kü yoa kilabü, tokei BUNYUBOUei Israelbü sepai shuong Filistiabü ik to kulabü.”

²⁰Kheijinei Saul kaoa shingetnyu tuongkei, hoba Samueleibü ngüh to aeibou hatko kikei, tou hao hau akiko apbei; aieilausi chalou che sünga hoba kho lang- yang sünga haoei ashauayung.

²¹Hobaje yaksanyu kho Saul jungto loukei hoba hao aeibou khonkuda dogo hapbei, hoba hao to laukei, “Chühashi, kaibü samnyuei kaibü ngüha lea. Hobaje ngei ngeibü langkei ngeibü ika lea, hoba nyi kü to joyobü ngüh ngei ngüha lea.

²²Hibü ngei tou ka to sudajada, nyikei kaibü samnyueibü ngüh ditbüma, hoba ka thedanga wentek haken che phokula sakkubuma; hoba no kaibü lama haujinei no hau kila shaushima.”

²³Lausikei haoei asunglet hoba laukei, “Ngei ashaulabü.” Lausikei haoeibü sambü shuong hoba yaksanyu haoen yoshaian hao suletkei, hoba haoei haoeneibü ngüha lekei. Hibü kao ka hao memeikei hoba shena setkei.

²⁴Hobaje yaksanyuei chema masu shoushou netthembü che kikei, hoba kho haoei panteiko haitikei, hoba saoei wenon sungjung louan seman khoei tokai ajinbü wentek kümbei.

²⁵Hobaje saoei kho Saul hoba haoeibü sambü shuong jungto sungbakei hoba haoenei shaukei. Kheijinei haoen meimeikei hoba khüyoutham satkei.