Read Chang Naga 1 SAMUEL 3 Bible Online

1 SAMUEL 3 - Chang Naga bible

1 SAMUEL 3

¹Tou nashou Samuelei Eli thedanga BUNYUBOU khangenko kikei. Hobaje khübü chaloua BUNYUBOUeibü ngüh kho aeibou tetetnyu kikei, mangsang pühko akitei.

²Hobaje ladang Eli hao kishanga lengan kikei, haoeibü nyek yuian kisije haoei hapla athükko kikei.

³Hobaje Mühghaü wanthung monyetko kikei. Hobaje BUNYUBOUeibü lembü chem lan Mühghaüeibü Busen kikei, khünei Samuel ngakla lengan kikei;

⁴Kheijinei BUNYUBOUei Samuel ngako laukei, “Samuel! Samuel!” Hobaje haoei laukei, “Ngo hanei kia!”

⁵Hobaje hao Eli jungto laangjung haukei, hoba laukei, “Nyi ngo ngakei hoba ngo hanei kia!” Lausikei haoei laukei, “Ngei no anga, ngaian yepashi.” Hibü hao ngaikei hoba yepbei.

⁶Hobaje BUNYUBOUei toukei nyibou ngakei, “Samuel!” Hobaje Samuel pikei hoba Eli jungto haukei, hoba laukei. “Nyi ngo ngakei hoba ngo hanei kia.” Lausikei haoei laukei, “Ngei no anga, kü shou; ngaian yepnga- iashi.”

⁷Tou Samuelei BUNYUBOU mo angeko kikei, ayingsi BUNYUBOUeibü ngüh tokei hao to tang mokhitko kikei.

⁸Hobaje toukei BUNYUBOUei sembou Samuel ngakei. Hobaje hao pikei hoba Eli jungto haukei, hoba laukei, “Nyi ngo ngakei hoba ngo hanei kia.” Kheijinei BUNYUBOUei nashou kho ngakei dogo Eliei ngeenkei.

⁹Hibü Eliei Samuel to laukei, “Hauan yepashi, hoba haoei no ngaalonga nyi hai laulabü, ‘Joyoashi, BUNYUBOU, aishanga no khangenbouei ditda.’ ” Hibü Samuel ngaikei hoba hao kishanga yepbei.

¹⁰Hobaje BUNYUBOU kho loukei, hoba lokei, hoba lubü chaloua tegü “Samuel! Samuel!” dogo ngakei. Kheijinei Samuelei laukei, “Joyoashi, aishanga no khangenbouei ditda.”

¹¹Hobaje BUNYUBOUei Samuel to laukei, “Chühashi, ngei Israela kümsilei che kümlabü, laoboua ho ditbü wekoei wiyolabü.

¹²Kho chaloua Eli chemdang shanga ngei laubü pendou khangbü ka khei thonbü sühko ngei Eli khulimbo kümlabü.

¹³Aishanga haoei ngean kibü shedbü shanga ngei haoeibü chemdang ponpen shanga matjemlabü, aieilausi haoeibü shounyiei khüksiuok haoen lolo sungbakei, hoba haoei haosi athanget.

¹⁴Hibü Elieibü chemdangei shed shonbü kho haitibü lembü ayingsi lembü kubüei ponpen shanga dean apla athüklabü lele ngei Eli chemdang to thealana.”

¹⁵Hobaje ngeyang sühko Samuel yepan kikei, hoba BUNYUBOU koukap kouyem shuong ipbei hoba Samuelei Eli to mangsang kho lenla hatkei.

¹⁶Kheijinei Eliei Samuel ngakei hoba laukei, “Kü shou Samuel.” Hobaje haoei laukei, “Ngo hanei kia.”

¹⁷Hobaje haoei laukei, “BUNYUBOUei ka to joyobü kho ai? Ngei ka to sudajada, kho kü to tehu; ka to haoei lenbü pendou nyi denche ongkei hualonga kho tegü ka to tokei aeikei Mühghaüei kümshima.”

¹⁸Hobaje Samuelei hao la pendou lenkei hoba hao ka ai ahu. Hobaje Eliei laukei, “Ho BUNYUBOU ki, hao la ai maikei kho hao la kümtiashi.”

¹⁹Hobaje Samuel chingkei hoba BUNYUBOU hao yoa kikei, hoba haoeibü ngüh che ongkei kaoa üatti.

²⁰Hobaje Dan ka Beersheba sühko Israel pendouei Samuel BUNYUBOU shanga thuseibü yeila pienkei.

²¹Hobaje BUNYUBOU nyibou Shiloa tang khitkei, aishanga BUNYUBOUei jembü lolo Samuel to Shiloa BUNYUBOUeibü ngühei tang khitkei.