Read Chang Naga 1 SAMUEL 30 Bible Online

1 SAMUEL 30 - Chang Naga bible

1 SAMUEL 30

¹Dawid hoba haoeibü mütshuongei Ziklag sühan phaia sembounyet Amalekbüei Jihuda chaangbou hoba Ziklag shian apbei hoba kho jikan apbukei.

²Hobaje khünei kibü chingbü, nashou, hoba yaksa pendou che ongkei ühaitiko langsenkei hoba haoeneibü lamnyua haukei.

³Hobaje ladang Dawid hoba haoeibü mütshuong sangnyu to loukei, chühashi, kho wanei lonan kikei; hoba haoeneibü yaksi shuong hoba haoeneibü nouyang jayangshousi shuong langsenan kikei.

⁴Kheijinei Dawid si hao yoa kibü mütshuongei haoen to kibü hau akhüm shongko ngüh longko haapbei.

⁵Hobaje Dawideibü yak müt nyi Jezreelbü Ahinoam, hoba Karmelbü Nabaleibü yak latnyu Abigail langsenan kiteikei.

⁶Hobaje Dawid aeibou khonkuko kikei, aieilausi mütshuongei hao to laangei tetla lauyokei; aieilausi müt pendoueibü soushou lulueibü bousu, yaksa shousi shanga mütpem weko maangto shatko kikei; lausikei Dawidei haoeibü Mühghaü BUNYUBOUa hau kingaikei.

⁷Hobaje Dawidei Ahimelekeibü shou Abiathar ungshedbou to laukei, “Ngei ka to sudajada, hato kü jungto ungshedbou saopobü hele sungba.” Hobaje Abiatharei Dawid jungto ungshedbou saopobü hele sungbakukei.

⁸Hobaje Dawidei BUNYUBOU to pheko laukei, “Ngei habü sepai shuong shijung hausi ngei alaphetlep sai?” Hobaje haoei hao to jongaikei, “Shijung hauashi, aieilausi nyi tükde haoen laphetlabü, hoba thük hapbo pendou nyibou hapngailabü.”

⁹Hibü Dawid si hao yoa kibü müt saongao lak kho hao yoa haukei hoba haoen Beor shumang to loukei, hoba haoen at khünei apyokei.

¹⁰Lausikei Dawid yoa saongao leiei shijung haukei, aiei saoan je haoen semthetnyu apbei hoba Beor shumang danjung ohauenko kikei.

¹¹Hobaje haoenei Ijepbü che khongthua hapbei hoba haoenei Dawid jungto hao leibakei, hoba hao la wentek kukei, hoba haoei shaukei; hoba haoenei hao la yunglabü dei kukei.

¹²Hobaje haoenei hao la bukhe linbü wentek ontou che, hoba semlüh shen penyi kukei; hoba haoei shauan phaia hau kingaikei; aieilausi haoei chalou sem hoba langyou sem ashau- ayung.

¹³Hobaje Dawidei hao to laukei, “No lakabü müt, hoba no laka?” Hobaje haoei laukei, “Ngo Ijepbü heshou che. Amalekbü cheeibü sambü hoba ngeibü bunyuei ngo apyokei aieilausi chalou semnyet dana ngo shatko kikei.

¹⁴Künei Kheret chaangbou ae shikei, hoba laobou Jihudabüeibü ki kho shikei, hoba Kaleb chaangbou ae thük shikei, hoba künei Ziklag wanei thean apbukei.”

¹⁵Hobaje Dawidei hao to phekei, “Nyi kho sepai tan yoto ngo leian yanasao?” Hobaje haoei laukei. “Nyi ngo ühaitilabü ayingsi ngeibü bunyu ik to khümbo akulabü dogo Mühghaü nyena thealanashi, hoba kho phaia ngei no sepai tan yoto leian yanlabü.”

¹⁶Hobaje ladang haoei hao leian yankei, chühashi, haoen kaoen pendoua phinnyinan shauyo yungyoko lem liyoko kikei; aieilausi Filistia kaodak si Jihuda kaodak ka haoenei peisilei juong haujung satkei.

¹⁷Hobaje Dawidei haoen ngeyang ka nyibounyet nangnak sühko haitikei hoba heshou saongao lei uta setan satenbü to liman müt che ongkei asaten.

¹⁸Hobaje Amalekbü shuongei sunglangbü pendou Dawidei nyibou hapngaikei, hoba Dawidei haoeibü yak müt nyi ham khümenkei.

¹⁹Hobaje hanbü yaangbü bousu yaksa shou pendou hoba soletbü peisilei yingasikei haoenei sungbü che ongkei aon aleko akitei. Dawidei tükde ong sungngaikei.

²⁰Hobaje Dawidei sanlon si masu pendou sungkei, hoba mütshuongei haoen thedanga nangko ngekkei, “Ho Dawidei soletbü peisilei!”

²¹Hobaje Dawid müt saoan jungto loukei, hoba aoyou aeibou semthetbü ka Dawid phai asemen; haoen kho Besor shumanga apyobü dan kiteikei. Hobaje haoen Dawid hoba hao yoa kibü mütshuong shuokla haukei, hoba ladang Dawid mütshuong nyangko loukei, haoei haoen la salem kukei.

²²Kheijinei Dawid yoa haubü müt amaibü hoba hang- alongbü mütshuongei laukei, “Haoen sen yoa ohaubü, senei soletbü peisilei ka künei haoen la ai akulabü. Lausikei haoen mütpem wekoei lulueibü shousi yaksi leian sungan satla thükkei.”

²³Lausikei Dawidei laukei, “BUNYUBOUei sen la laobou kukei, aoei sen püetkei hoba sen khulimbo loubü sepai tan seneibü ik to khümbo kukei, khoei jaisinasi shuong kanei khei akümlabü.

²⁴Ho kümsilei shangabü aoei kan to ngüha lela! Aieilausi ao peisilei yoa shaishanga setngaida, haoeibü phejan si ao lason to hauda, haoeibü phejan jetei kilabü.”

²⁵Hobaje kho chalou ka tat sühko kho tegü Israelbü shanga ho ngühkhüm ngühkhüh hoba song che la yeiko kümbei.

²⁶Hobaje ladang Dawid Ziklag to loukei, Jihudabü baushi shuong khei haoeibü thangbou shuong jungto soletbü peisilei hautiko laukei, “BUNYUBOUeibü dangbou shuong ka soletbü jongsak kan shangabü sungashi.”

²⁷Bethela kibü shuong jungto hoba yungkük aenei Ramaa kibü jungto hoba Jathera kibü jungto,

²⁸Aroera kibü jungto hoba Sifmota kibü jungto hoba Eshtemoaa kibü jungto,

²⁹hoba Rakala kibü jungto, Jerahmeelbü sangnyu shuonga kibü jungto, Ken sangnyu shuonga kibü shuong jungto,

³⁰Hormaa kibü jungto, Borashana kibü jungto, Athaka kibü jungto,

³¹hoba Hebrona kibü jungto hoba lanei ong Dawid hoba haoeibü mütshuong nongaikei khübü kaonyek pendou jungto hautikei.