Read Chang Naga 1 SAMUEL 31 Bible Online

1 SAMUEL 31 - Chang Naga bible

1 SAMUEL 31

¹Tou Filistiabüei Israelbü khulimbo wapyokei, hoba Israel mütshuong Filistiabü thedang ka satyokei, hoba Gilboa shongha leiluan shemtikei,

²hoba Filistiabüei Saul hoba haoeibü shousi shuong khaplapbo shikei, hoba Filistiabüei Sauleibü shousi shuong Jonathan hoba Abinadab hoba Malkhishua haitikei.

³Hobaje lason kho Saul khulimbo kaangan apbei, hoba lau jungbü shuongei hao laphetkei hoba lau jungbü shuongei kaangko leilutikei.

⁴Khünei haoei haoeibü insiaubu jungbü to laukei, “Kaibü in setenashi, hoba khoei ngo wa- pettiashi, aingenyu habü akipbü shuong louan ngo wapeilabü hoba ngo mautilabü.” Lausikei haoeibü insiaubu jungbouei aküm, aieilausi hao aeibou hatko kikei, khei yingsije Saulei haoeibü in sungjung louan khoei hao lolo haingaikei.

⁵Hobaje ladang haoeibü insiaubu jungbouei Saul haibü hapbei haoeikei kho tegü haoeibü inei hao lolo wapngaikei hoba hao yoa haikei.

⁶Kho tegü khünyet chaloua ong Saul si haoeibü shousi müt sem hoba haoeibü insiaubu jungbou hoba haoeibü mütshuong pendou haikei.

⁷Hobaje ladang Israelbü mütshuong thi ae yomanga kibü shuong satkei hoba Saul hoba haoeibü shousi shuong haibü hapbei, haoenei sangnyu shuong apyokei hoba satkei hoba Filistiabü louan khübünei kikei.

⁸Hobaje nyibounyet kho ladang Filistiabüei haitian kibü shuongeibü neisimei saüan chühko loukei, haoenei Gilboa shongha Saul hoba haoeibü shousi sem haitian hapbei.

⁹Hobaje haoenei haoeibü khu thetkei hoba haoeibü insiaubu sungkei. Hobaje heangsho chem to hoba mütshuong jungto ngühlang künla kaijembo kibü Filistiabü kaonyek to hautikei.

¹⁰Hobaje haoenei haoeibü insiaubu Ashtarot chema phokei, hoba haoenei haoeibü mang Beth Shan kümthanga saütian phokei.

¹¹Hobaje ladang Filistiabüei hao shanga khei Saul to kümbü shanga Jabesh Gileada kibü shuongei ditkei,

¹²maangkaangbümüt pendou meimeikei hoba langyang sünga paian Saul si haoeibü shousi shuongeibü mang Beth Shan kümthang ka sungletkei hoba haoen Jabesh to loukei, hoba khünei haoen juokkei.

¹³Hobaje haoenei haoeneibü lo sungjung louan khübü kho tamarisk bunyu phanga khünan phokei hoba chalou nyet mühei nyengkei.