Read Chang Naga 1 SAMUEL 4 Bible Online

1 SAMUEL 4 - Chang Naga bible

1 SAMUEL 4

¹Hobaje Samueleibü ngüh Israelbü pendou jungto loukei. Tou Filistiabü khulimbo Israelbü lason to haukei, hoba Ebenezera shaikei, hoba Filistiabü Apheka shaikei.

²Hobaje Filistiabüei haoen lolo Israelbü khulimbo lin küman kikei hoba ladang haoen lasona haüyokei, Filistiabü thedanga Israelei athük hapbei, hoba haoenei lason lashuok wapyoshanga müt hajar lei thüng haitikei.

³Hobaje ladang mütshuong shaishang to louko kikei, Israelbü jaishou shuongei laukei, “Filistiabü thedanga tat BUNYUBOUei aila shemtikei? BUNYUBOUeibü thebülanbü saopobü Busen kho sen yoa haulabü lele hoba dangbou shuong ik ka sen khümenlabü lele Shilo ka senei sungbakho.”

⁴Hibü mütshuongei Shilo to ngühlang künbü hautikei hoba khüka Thükenbou BUNYUBOUeibü theyolanyobü Busen laobou kaakyembü kherabim thüka setda, haoenei sungbakei, hoba Elieibü shou müt nyi, Hofni si Finehas kho Mühghaüeibü theyolanyobü Busen yoa kikei.

⁵Hobaje ladang BUNYUBOUeibü theyolanyobü saopobü Busen kho shaishang to lotkei, Israelbü pendouei ngühlang yaangbüei tenkeitenko ngekkei.

⁶Hobaje ladang Filistiabüei ngekbü ngühlang ditkei haoenei laukei. “Ibribüei shaishanga ngekbü ngüh yaangbü tetlabü ai?” Hobaje BUNYUBOUeibü Busen shaishang to sungbaan kikei dogo haoenei ditenkei.

⁷Hobaje Filistiabü shuong hatko kikei, aishanga haoenei laukei, “Shaishang to mühghaü louakei.” Hobaje haoenei laukei, “Ügütü, aieilausi shangied hai akitei!

⁸Ügütü, habü hau yaangbü mühghaü shuong ik ka aoei sen khümenla? Shieikoe phang phang pendouei Ijepbü to yama sühtibü kho khübü mühghaü ki.

⁹Ibribü thedanga kan aaola ayeila hau kiashi, hoba kan lolo bousu tegü kishi, hoba wapyoashi!”

¹⁰Hobaje Filistiabüei wapyokei, hoba Israelbüei athük, hoba haoen mütpem weko lulueibü neichem lamjung satkei. Hobaje haitibü juong kikei; aishanga Israelbü hajar khujin youei wapyobü müt tuongkei.

¹¹Hobaje Mühghaüeibü Busen sunglangkei, hoba Elieibü shounyi, Hofni si Finehas kei haitikei.

¹²Hobaje lason ka Benjaminbü ka müt che laangjung haukei, hoba khünyet chaloutham jembü nei jitnyinan haoeibü khua tham kakan Shilo to loukei.

¹³Hobaje ladang hao loukei, chühashi, bakhün nyangko Eliei chema setshanga limchühko setan kikei; aishanga Mühghaüeibü Busen shanga haoeibü maangpon lühjilühko kikei. Hobaje ladang müt kho sangnyu to lotkei hoba kho lenkei, sangnyubü khümbo haapyokei.

¹⁴Hobaje ladang Eliei lemenbü ngühlang ditkei haoei laukei, “Ho lemenbü ngühlang tetlabü ai?” Hobaje müt kho panteiko loukei hoba Eli to lenkei.

¹⁵(Tou Eli po anjinngaoto set kikei, hoba haoeibü nyek yuian kikei. Hibü haoei achühenko kikei.)

¹⁶Hobaje müt khoei Eli to laukei, “Lason shuong ka loubü kho ngo hoba ngo tat lason shuong yoka satjung loukei.” Hobaje haoei laukei, “Lai yingkei kü shou?”

¹⁷Hobaje ngühlang künan loubou khoei jongaikei hoba laukei, “Filistiabü thedang ka Israelbü lina hoba tokei mütli yoa haitibü juong kikei, hoba kaibü shounyi, Hofni si Finehas haia hoba Mühghaü Busen sunglanga!”

¹⁸Hobaje ladang haoei Mühghaü Saopobü Busen shanga lenkei, bakhün nyangko haoeibü setshang ka phai to atkei, hoba haoeibü ngüm leiluan hao haikei. Haoei Israel po saonyi matjembei.

¹⁹Hobaje haoeibü shou Fine- haseibü yak mang akongko shou bukla nyangko kikei, hoba ladang saoei Mühghaü Busen langa hoba saoeibü laoeibü bou hoba saoeibü lao haia dogo ngühlang ditkei saoei sao lolo khüpetkei hoba chemnoukei, hoba na hapbei aishanga sao khonkubü sao thük to loukei.

²⁰Hobaje sao hailabü chaloua sao to thuibü yaksa shuongei sao to laukei, “Tehüt, aishanga nyi bousu shou che bukkua.” Lausikei saoei ajongai, ayingsi saoei kho adam.

²¹Hobaje, “Israel ka soneikangbü banga,” dogo lauko saoei nashou kho Ikhabod dogo nyenkei; aieilausi Mühghaü Busen sunglangkei hoba saoeibü laoeibü bou hoba saoeibü lao maukei.

²²Hobaje saoei laukei, “BUNYUBOUeibü soneikangbü Israel ka banga; aishanga Mühghaü Busen sunglangkua.”