Read Chang Naga 1 SAMUEL 5 Bible Online

1 SAMUEL 5 - Chang Naga bible

1 SAMUEL 5

¹Filistiabüei Mühghaü Busen sungkei hoba haoenei kho Ebenezer ka Ashdod to sungbakei.

²Hobaje Filistiabüei Mühghaü Busen sungatkei, hoba kho Dagon chem to sungatkei hoba kho Dagon nyangko phokei.

³Hobaje ladang Ashdodbü kho nyibounyet ngeyang enyu pikei, chühashi, BUNYUBOUeibü Busen junga Dagon the khüman tuongan kikei. Hobaje haoenei Dagon hejung louan nyibou haoeibü kaoena phokei.

⁴Lausikei ladang haoenei nyibounyet ngeyang enyu chühkei, BUNYUBOUeibü Busen thedanga Dagon the khüman kaoa tuongan kikei, hoba Dagoneibü khu si haoeibü ik penyi ham wa- pan apan kaoa atan kikei.

⁵Hibü tat sühko Dagon ungshedbou shuong ayingsi Dagon chem to loubü aoeikei Ashdoda Dagon phoshang kaoa anakeida.

⁶Lausikei Ashdodbü thüka BUNYUBOUeibü ikok atsheitham kikei, hoba haoei haoen mautikei, hoba boklimei Ashdod hoba kho leilang thük to meitikei.

⁷Hobaje ladang Ashdodbüei kho khei hapbei haoenei laukei, “Israel Mühghaüeibü Busen yoa akilabü; aishanga sen thükto hoba Dagon seneibü mühghaü thükto haoeibü ikok atsheibü kia.”

⁸Hibü haoenei ngühlang hautian Filistiabü songdakbü pendou haoen jungto leishaikei hoba laukei, “Israel Mühghaü Busen shanga senei ai kümla?” Hobaje haoenei jongaikei, Israel Mühghaü Busen kho Gat jungto sunglangtiashi. Hobaje Israel Mühghaü Busen haoenei khüto sungjung haukei.

⁹Lausikei haoenei kho kuktian phaia BUNYUBOUeibü ik sangnyu khulimbo kikei hoba sangnyu aeibou panglangyoko kikei hoba haoei sangnyubü mütshuong yaangbü hanbü pendou to meitikei, hoba bokshat mou haoen to longtikei.

¹⁰Hibü haoenei Mühghaü Busen kho Ekron to hautikei. Hobaje Mühghaü Busen Ekron to loujinei Ekronbüei ngekko laukei, “Sen hoba sen mütli shemtila Israel Mühghaü Busen sen jungto sungbakuakei.”

¹¹Hibü haoenei hautikei hoba Filistiabü songdakbü pendou leishaikei hoba haoenei laukei, “Israel Mühghaü Busen hautian apashi. Khoei sen hoba sen mütli ashemtila Israel Mühghaü Busen kho nyibou haoen kishang to ngaitian apashi.” Aishanga sangnyu pendoua aeibou panglangyoko kikei. Mühghaü ik khünei aeibou kaangan kikei.

¹²Hobaje ühaiko kibü müt mouei sühkei, hoba sangnyu lemenyobüei müha onlangkei.