Read Chang Naga 1 SAMUEL 7 Bible Online

1 SAMUEL 7 - Chang Naga bible

1 SAMUEL 7

¹Hibü Kiriath Jearimbü loukei hoba BUNYUBOUeibü Saopobü Busen künan angkei, hoba shongha Abinadabeibü chem to sungbakei, hoba BUNYUBOUeibü Saopobü Busen phola haoeibü shou Eleazar saüenan phokei.

²Hobaje Kiriath Jeariama Saopobü Busen kibü chalou jih lounyu haukei khei po saoche thüng, hoba Israelbü pendou BUNYUBOU jungto sepeikei.

³Hobaje Samuelei Israelbü pendou to joyoko laukei, “Kanei BUNYUBOU jungto kaneibü maang- pon pendouei sepeikho laualonga kholonga kan yoka küksithang mühghaü shuong hoba Ashtarot apashi, hoba BUNYUBOU jungto kaneibü maangpon lamleashi, hoba hao to khangenashi, hoba haoei kan Filistiabü ik ka khümenlabü.”

⁴Kheijinei Israelbüei Baalim hoba Ashtarot apbei hoba BUNYUBOU khangenkei.

⁵Hobaje Samuelei laukei, “Israelbü pendou Mizpa to yoshaiashi, hoba ngei kan shanga BUNYUBOU to welaulabü.”

⁶Hobaje haoenei Mizpa to liko yoshaikei hoba haoenei dei khushaikei hoba kho BUNYUBOU thedanga jonan jinkukei hoba kho chaloua mühei nyengkei hoba khünei laukei, “BUNYUBOU thedanga künei shabü shona.” Hobaje Samuelei Mizpaa Israelbü matjembei.

⁷Hobaje ladang Filistiabüei Israelbü Mizpaa liko yoshaiakei dogo ditkei, Filistiabü songdakbü shuong Israelbü khulimbo longkei. Hobaje ladang Israelbüei kho ditkei haoenei Filistiabü to hatko kikei.

⁸Hobaje Israelbüei Samuel to laukei, “Sen Filistiabü ik ka khümenla shanga BUNYUBOU seneibü Mühghaü to athakko ngekashi.”

⁹Hobaje Samuelei senyungbü san shoushou che sungkei, hoba kho juokbü lembü pendou shanga BUNYUBOU to lembei hoba Samuelei BUNYUBOU to Israelbü shanga ngekkei hoba BUNYUBOUei hao to jongaikei.

¹⁰Ladang Samuel juokbü lembü lembo kikei, kheijinei Filistiabüei Israelbü khulimbo lason wapyola nyangko loukei, lausikei kho chaloua Filistiabü thükto BUNYUBOUei ngüh yaangbüei phangkei hoba haoen panglangtikei, hoba Israelbü thedanga haoen thüktikei.

¹¹Hobaje Israel mütshuong Mizpa ka haukei, hoba haoen Bethkar phang to alou shongko haoen to wapbei.

¹²Kho phaia Samuelei laang che sungbakei hoba kho Mizpa si Shen kanglanga phokei, hoba kho nyen Ebenezer dogo nyenkei, hoba laukei, “Han sühko BUNYUBOUei sen to thuia.”

¹³Kho tegü Filistiabü thükkei, hoba haoen touje Israelbü leilang to alou. Hobaje Samuel salang sünga BUNYUBOU Filistiabü khulimbo kikei.

¹⁴Hobaje Filistiabüei Israel ka sungbü sangnyu shuong Ekron ka Gat sühko Israelbü la nyibou kungaikei, hoba Filistiabü ik ka Israelbüei haoeneibü kaonyek khümenan phokei. Hobaje Israelbü si Amorbü kanglanga sangmai kikei.

¹⁵Hobaje Samuelei haoeibü salang sünga Israel matjembei.

¹⁶Hobaje haoei po weko theneithenko Bethel, Gilgal hoba Mizpa peanchühkei; hoba khübü kaonyek pendoua haoei Israel matjembei.

¹⁷Hobaje hao Rama to ngaikei, aieilausi khünei haoeibü chem kikei, hoba khünei haoei Israel matjembei, hoba haoei BUNYUBOU la lemshang che dangkukei.