Read Chichewa Buku Lopatulika Bible 2014 2 SAMUELE 22 Bible Online

2 SAMUELE 22 - Chichewa Buku Lopatulika Bible 2014 bible

2 SAMUELE 22

¹Ndipo Davide analankhula kwa Yehova mau a nyimbo iyi tsikuli Yehova anampulumutsa m'dzanja la adani ake onse, ndi m'dzanja la Saulo.

²Ndipo anati, Yehova ndiye thanthwe langa, ndi ngaka yanga, ndi Mpulumutsi wanga, wangadi.

³Mulungu wa thanthwe langa, Iye ndidzamkhulupirira; chikopa changa, ndi nyanga ya chipulumutso changa, nsanja yanga yaitali, ndi populumukirapo panga; Mpulumutsi wanga, mundipulumutsa kuchiwawa.

⁴Ndidzaitana kwa Yehova amene ayenera timtamande; chomwecho ndidzapulumutsidwa kwa adani anga.

⁵Pakuti mafunde a imfa anandizinga, mitsinje ya zopanda pake inandiopsa ine.

⁶Zingwe za kumanda zinandizingira; misampha ya imfa inandifikira ine.

⁷M'kusauka kwanga ndinaitana kwa Yehova, inde ndinakuwira kwa Mulungu wanga; ndipo Iye anamva mau anga ali m'Kachisi wake, ndi kulira kwanga kunafika ku makutu ake.

⁸Pomwepo dziko linagwedezeka ndi kunthunthumira. Maziko a dziko la kumwamba anasunthika. Nagwedezeka, chifukwa Iye anakwiya.

⁹M'mphuno mwake munatuluka utsi, ndi moto wotuluka m'kamwa mwake unaononga; makala anayaka nao.

¹⁰Anaweramitsa miyambanso, natsika; ndipo mdima wandiweyani unali pansi pa mapazi ake.

¹¹Ndipo Iye anaberekeka pa kerubi nauluka; inde anaoneka pa mapiko a mphepo.

¹²Ndipo anayesa mdimawo ngati mahema omzungulira Iye, kusonkhana kwa madzi ndi mitambo yochindikira ya mlengalenga.

¹³Cheza cha pamaso pake makala a moto anayaka.

¹⁴Yehova anagunda kumwamba; ndipo Wam'mwambamwamba ananena mau ake.

¹⁵Ndipo Iye anatumiza mivi, nawawaza; mphezi, nawaopsa.

¹⁶Pamenepo m'munsi mwa nyanja munaoneka, maziko a dziko anaonekera poyera, ndi mtonzo wa Yehova, ndi mpumo wa mpweya wa m'mphuno mwake.

¹⁷Iye anatumiza kuchokera kumwamba nanditenga; Iye ananditulutsa m'madzi aakulu.

¹⁸Iye anandipulumutsa kwa mdani wanga wamphamvu, kwa iwo akudana ndi ine; pakuti anandiposa mphamvu.

¹⁹Anandifikira ine tsiku la tsoka langa; koma Yehova anali mchirikizo wanga.

²⁰Iye ananditulutsanso ku malo akulu; Iye anandipulumutsa, chifukwa akondwera ndi ine.

²¹Yehova anandibwezera monga mwa cholungama changa; monga mwa kuyera kwa manja anga anandipatsa mphotho.

²²Pakuti ndinasunga njira za Yehova, osapatukira ku zoipa kusiya Mulungu wanga.

²³Pakuti maweruzo ake onse anali pamaso panga; ndipo za malemba ake, sindinawapatukira.

²⁴Ndinakhalanso wangwiro kwa Iye, ndipo ndinadzisunga kusachita kuipa kwanga.

²⁵Chifukwa chake Yehova anandibwezera monga mwa cholungama changa; monga mwa kuyera kwanga pamaso pake.

²⁶Ndi chifundo Inu mudzadzionetsa wachifundo, ndi munthu wangwiro mudzadzionetsa wangwiro.

²⁷Ndi oyera mtima mudzadzionetsa woyera mtima; ndi otsutsatsutsa mudzadzionetsa wopotoza.

²⁸Ndipo mudzapulumutsa anthu osautsidwa; koma maso anu ali pa odzikuza kuti muwachepetse.

²⁹Pakuti Inu ndinu nyali yanga, Yehova; ndipo Yehova adzaunika mumdima mwanga.

³⁰Pakuti ndi Inu ndithamangira gulu; ndi Mulungu wanga ndilumphira linga.

³¹Kunena za Mulungu, njira yake ili yangwiro; mau a Yehova anayesedwa; Iye ndiye chikopa kwa onse akukhulupirira Iye.

³²Pakuti Mulungu ndani, koma Yehova? Ndipo thanthwe ndani, koma Mulungu wathu?

³³Mulungu ndiye linga langa lamphamvu; ndipo Iye ayendetsa angwiro mu njira yake.

³⁴Iye asandutsa mapazi ake akunga mapazi a mbawala; nandiika pa misanje yanga.

³⁵Iye aphunzitsa manja anga nkhondo; kotero kuti manja anga alifula uta wamkuwa.

³⁶Ndiponso munandipatsa chikopa cha chipulumutso chanu; ndi kufatsa kwanu kunandikulitsa.

³⁷Munakulitsa kulunza kwanga pansi panga, ndi mapazi anga sanaterereke.

³⁸Ndinapirikitsa adani anga, ndi kuwaononga; ndiponso sindinabwerera mpaka nditawatha.

³⁹Ndinawatha ndi kuwapyoza, kuti sakhoza kuuka, inde anagwa pansi pa mapazi anga.

⁴⁰Pakuti Inu munandimanga m'chuuno ndi mphamvu ya kunkhondo; munandigonjetsera akundiukira.

⁴¹Munatembenuzitsanso adani anga andipatse mbuyo, kuti ndiwalikhe akudana ndi ine.

⁴²Anayang'ana iwo, koma panalibe wopulumutsa; ngakhale kwa Yehova, koma Iye sanawayankhe.

⁴³Pomwepo ndinawasansantha asalale ngati fumbi la padziko, ndinawapondereza ngati dothi la m'makwalala.

⁴⁴Inunso munandipulumutsa ine pa kulimbana kwa anthu anga; munandisunga ndikhale mutu wa amitundu; Anthu amene sindinawadziwa adzanditumikira ine.

⁴⁵Alendo adzandigonjera ine, pakumva za ine, adzandimvera pomwepo.

⁴⁶Alendo adzafota, nadzabwera ndi kunthunthumira otuluka mokwiririka mwao.

⁴⁷Yehova ali ndi moyo; ndipo lidalitsike thanthwe langa; ndipo akulitsidwe Mulungu wa thanthwe la chipulumutso changa;

⁴⁸inde Mulungu wakundibwezera chilango ine, ndi kundigonjetsera anthu a mitundu.

⁴⁹Amene anditulutsa kwa adani anga; inde mundikweza ine pamwamba pa iwo akundiukira; mundipulumutsa kwa munthu wachiwawa.

⁵⁰Chifukwa chake ndidzakuongani Yehova, pakati pa amitundu, ndipo ndidzaimba zolemekeza dzina lanu.

⁵¹Iye apatsa mfumu yake chipulumutso chachikulu; naonetsera chifundo wodzozedwa wake, kwa Davide ndi mbeu yake ku nthawi zonse.