Read Chichewa Buku Lopatulika Bible 2014 1 MBIRI 16 Bible Online

1 MBIRI 16 - Chichewa Buku Lopatulika Bible 2014 bible

1 MBIRI 16

¹Ndipo analowa nalo likasa la Mulungu, naliika pakati pa hemalo Davide adaliutsira; ndipo anapereka nsembe zopsereza ndi nsembe zoyamika pamaso pa Mulungu.

²Ndipo atatha Davide kupereka nsembe zopsereza ndi nsembe zoyamika, anadalitsa anthu m'dzina la Yehova.

³Nagwira aliyense wa Israele, wamwamuna ndi wamkazi, yense mtanda wa mkate, ndi nthuli ya nyama, ndi nchinchi ya mphesa zouma.

⁴Ndipo anaika Alevi ena atumikire ku likasa la Yehova, nalalikire, nayamike, nalemekeze Yehova Mulungu wa Israele.

⁵Asafu ndiye mkulu wao, ndi otsatana naye Zekariya, Yeiyele, ndi Semiramoti, ndi Yehiyele, ndi Matitiya, ndi Eliyabu, ndi Benaya, ndi Obededomu, ndi Yeiyele, ndi zisakasa ndi azeze; koma Asafu ndi nsanje zomvekatu;

⁶ndi Benaya ndi Yahaziele ansembe ndi malipenga kosalekeza, ku likasa la chipangano la Mulungu.

⁷Tsiku limenelo tsono Davide anayamba kuwapatsa nyimbo ya kuyamika nayo Yehova; ochita ndiwo Asafu ndi abale ake.

⁸Yamikani Yehova, itanani dzina lake; bukitsani mwa mitundu ya anthu zochita Iye.

⁹Muimbireni, muimbireni zomlemekeza; fotokozerani zodabwitsa zake zonse.

¹⁰Mudzitamandire ndi dzina lake lopatulika; mitima yao ya iwo ofuna Yehova ikondwere.

¹¹Funsirani kwa Yehova ndi mphamvu yake; funani nkhope yake nthawi zonse.

¹²Kumbukirani zodabwitsa zake adazichita, zizindikiro zake, ndi maweruzo a pakamwa pake.

¹³Inu mbeu ya Israele mtumiki wake, inu ana a Yakobo, osankhika ake.

¹⁴Iye ndiye Yehova Mulungu wathu; maweruzo ake akhala pa dziko lonse lapansi.

¹⁵Kumbukirani chipangano chake kosatha, mauwo anawalamulira mibadwo zikwi;

¹⁶chipanganocho anapangana ndi Abrahamu, ndi lumbiro lake ndi Isaki;

¹⁷ndipo anachitsimikizira kwa Yakobo chikhale malemba, chikhale chipangano chosatha kwa Israele;

¹⁸ndi kunena kuti, Ndidzakupatsa iwe dziko la Kanani, gawo la cholandira chako.

¹⁹Pokhala inu anthu owerengeka, inde anthu pang'ono, ndi alendo m'mwemo;

²⁰nayendayenda kuchokera mtundu wina kufikira mtundu wina, kuchokera ufumu wina kufikira anthu ena.

²¹Sanalole munthu awasautse; ndipo anadzudzula mafumu chifukwa cha iwowa;

²²ndi kuti, Musamakhudza odzozedwa anga, musamachitira choipa aneneri anga.

²³Muimbireni Yehova, inu dziko lonse lapansi, lalikirani chipulumutso chake tsiku ndi tsiku.

²⁴Fotokozerani ulemerero wake mwa amitundu, zodabwitsa zake mwa mitundu yonse ya anthu.

²⁵Pakuti Yehova ali wamkulu, nayenera kulemekezedwa kwakukulu; ayenera amuope koposa milungu yonse.

²⁶Pakuti milungu ya mitundu ya anthu ndiyo mafano; koma Yehova analenga zakumwamba.

²⁷Pamaso pake pali ulemu ndi ukulu, m'malo mwake muli mphamvu ndi chimwemwe.

²⁸Mchitireni Yehova, inu mafuko a mitundu ya anthu, mchitireni Yehova ulemerero ndi mphamvu.

²⁹Mchitireni Yehova ulemerero wa dzina lake; bwerani nacho chopereka, ndipo fikani pamaso pake; lambirani Yehova m'chiyero chokometsetsa.

³⁰Njenjemerani pamaso pake, inu dziko lonse lapansi, dziko lokhalamo anthu lomwe lakhazikika, kuti silingagwedezeke.

³¹Kukondwerere kumwamba, ndi dziko lapansi lisekerere; anene mwa amitundu, Yehova achita ufumu.

³²Nyanja ikukume m'kudzala kwake, munda ukondwerere, ndi zonse zili m'mwemo.

³³Pamenepo mitengo yonse ya kunkhalango idzafuula mokondwera pamaso pa Yehova; pakuti akudza kudzaweruza dziko lapansi.

³⁴Yamikani Yehova; pakuti Iye ndiye wabwino; pakuti chifundo chake nchosatha.

³⁵Nimunene, Tipulumutseni, Mulungu wa chipulumutso chathu; mutisokolotse ndi kutilanditsa kwa amitundu, kuti tiyamike dzina lanu loyera, ndi kudzitamandira nacho chilemekezo chanu.

³⁶Alemekezedwe Yehova Mulungu wa Israele, kuyambira kosayamba kufikira kosatha. Ndipo anthu onse anati, Amen! Nalemekeza Yehova.

³⁷Ndipo anasiyako ku likasa la chipangano la Yehova Asafu ndi abale ake, atumikire kulikasa kosalekeza, monga umo mudzafunika tsiku ndi tsiku;

³⁸ndi Obededomu, ndi abale ake makumi asanu ndi limodzi mphambu asanu ndi atatu; ndi Obededomu mwana wa Yedutuni ndi Hosa akhale odikira;

³⁹ndi Zadoki wansembe, ndi abale ake ansembe, ku Kachisi wa Yehova, pa msanje unali ku Gibiyoni;

⁴⁰kupereka nsembe zopsereza kwa Yehova pa guwa la nsembe zopsereza, kosalekeza, m'mawa ndi madzulo, monga mwa zonse zilembedwa m'chilamulo cha Yehova adachilamulira Israele;

⁴¹ndi pamodzi nao Hemani, ndi Yedutuni, ndi osankhika otsalawo, otchulidwa maina, kuyamika Yehova; pakuti chifundo chake nchosatha;

⁴²ndi pamodzi nao Hemani, ndi Yedutuni, ndi malipenga ndi nsanje za iwo akumveketsadi, ndi zoimbira nyimbo za Mulungu; ndi ana a Yedutuni anakhala kuchipata.

⁴³Ndipo anachoka anthu onse, yense kunyumba yake, nabwera Davide kudalitsa nyumba yake.