Read Chichewa Buku Lopatulika Bible 2014 YOBU 10 Bible Online

YOBU 10 - Chichewa Buku Lopatulika Bible 2014 bible

YOBU 10

¹Mtima wanga ulema nao moyo wanga, ndidzadzilolera kudandaula kwanga, ndidzalankhula pakuwawa mtima wanga.

²Ndidzati kwa Mulungu, Musanditsutse; mundidziwitse chifukwa cha kutsutsana nane.

³Chikukomerani kodi kungosautsa, kuti mupeputsa ntchito yolemetsa manja anu, ndi kuti muwalira pa uphungu wa oipa?

⁴Muli nao maso a thupi kodi? Mupenya kodi monga umo apenyera munthu?

⁵Masiku anu akunga masiku a munthu kodi, zaka zanu zikunga masiku a munthu;

⁶kuti mufunsa mphulupulu yanga, ndi kulondola choipa changa;

⁷chinkana mudziwa kuti sindili woipa, ndipo palibe wakupulumutsa m'dzanja lanu?

⁸Manja anu anandiumba, nandiulunga monsemu, koma mufuna kundiononga.

⁹Mukumbukire kuti mwandiumba ngati dothi; ndipo kodi mudzandibwezera kufumbi?

¹⁰Simunanditsanula kodi ngati mkaka, ndi kundilimbitsa ngati mase?

¹¹Munandiveka khungu ndi mnofu, ndi kundilumikiza mafupa ndi mitsempha.

¹²Mwandipatsa moyo, ndi kundikomera mtima, ndi masamalidwe anu anasunga mzimu wanga.

¹³Koma izi munazibisa mumtima mwanu; ndidziwa kuti ichi muli nacho.

¹⁴Ndikachimwa mundipenya; ndipo simudzandimasula mphulupulu yanga.

¹⁵Ndikakhala woipa, tsoka ine; ndikakhala wolungama, sindidzakweza mutu wanga; ndadzazidwa ndi manyazi, koma penyani kuzunzika kwanga.

¹⁶Ndipo mutu wanga ukadzikweza, mundisaka ngati mkango; mubweranso ndi kudzionetsera modabwitsa kwa ine.

¹⁷Mundikonzeranso mboni zonditsutsa, ndi kundichulukitsira mkwiyo wanu; nkhondo yobwerezabwereza yandigwera.

¹⁸Potero munandibadwitsa chifukwa ninji? Mwenzi nditapereka moyo wanga, lisanandione diso.

¹⁹Ndikadakhala monga ngati sindikadakhala; akadanditenga pobadwapo kunka nane kumanda.

²⁰Masiku anga satsala owerengeka nanga? Lindani. Bandilekani kuti nditsitsimuke pang'ono,

²¹ndisanachoke kunka kumene sindikabweranso, ku dziko la mdima ndi la mthunzi wa imfa.

²²Dziko la mdima bii ngati mdima wandiweyani, dziko la mthunzi wa imfa losalongosoka, kumene kuunika kukunga mdima.