Read Chichewa Buku Lopatulika Bible 2014 YOBU 11 Bible Online

YOBU 11 - Chichewa Buku Lopatulika Bible 2014 bible

YOBU 11

¹Pamenepo anayankha Zofari wa ku Naama, nati,

²Kodi mau ochulukawa sayenera kuwayankha? Ndi munthu wa milomo ayenera kuyesedwa wolungama?

³Kodi zotamanda zako ziwatseke anthu pakamwa? Useka kodi, wopanda munthu wakukuchititsapo manyazi?

⁴Pakuti unena, Chiphunzitso changa nchoona, ndipo ndili woyera pamaso pako.

⁵Koma, ha? Mwenzi atanena Mulungu, ndi kukutsegulira milomo yake motsutsa;

⁶nakufotokozere zinsinsi za nzeru, popeza zipindikapindika machitidwe ao! Chifukwa chake dziwa kuti Mulungu akuiwalira mphulupulu zina.

⁷Kodi ukhoza kupeza Mulungu mwa mufunafuna? Ukhoza kupeza Wamphamvuyonse motsindika?

⁸Kumpeza kutalika ngati kumwamba, ungachitenji? Kuzama ngati kumanda, ungadziwenji?

⁹Muyeso wake utalikira utali wake wa dziko lapansi, chitando chake chiposa cha nyanja.

¹⁰Akapita, nakatsekera, nakatulutsa bwalo la mlandu, adzamletsa ndani?

¹¹Pakuti adziwa anthu opanda pake, napenyanso mphulupulu, ngakhale saisamalira.

¹²Koma munthu wopanda pake asowa nzeru, ngakhale munthu abadwa ngati mwanawabulu.

¹³Ukakonzeratu mtima wako, ndi kumtambasulira Iye manja ako;

¹⁴Mukakhala mphulupulu m'dzanja lako, uichotseretu kutali, ndi chisalungamo chisakhale m'mahema mwako.

¹⁵Popeza pamenepo udzakweza nkhope yako opanda banga; nudzalimbika osachita mantha;

¹⁶pakuti udzaiwala chisoni chako, udzachikumbukira ngati madzi opita.

¹⁷Ndipo moyo wako udzayera koposa usana; kungakhale kuli mdima kudzakhala ngati m'mawa.

¹⁸Ndipo udzalimbika mtima popeza pali chiyembekezo; nudzafunafuna, ndi kugona mosatekeseka.

¹⁹Inde udzagona pansi, wopanda wina wakukunjenjemeretsa, ndipo ambiri adzakupembedza.

²⁰Koma maso a oipa adzagoma, ndi pothawirapo padzawasowa, ndipo chiyembekezo chao ndicho kupereka mzimu wao.