Read Chichewa Buku Lopatulika Bible 2014 YOBU 12 Bible Online

YOBU 12 - Chichewa Buku Lopatulika Bible 2014 bible

YOBU 12

¹Pamenepo Yobu anayankha, nati,

²Zoonadi inu ndinu anthu, ndi nzeru idzafa pamodzi ndi inu.

³Koma inenso ndili nayo nzeru monga inu. Sindingakuchepereni; ndani sadziwa zonga izi?

⁴Ndine ngati munthu wosekedwa ndi mnansi wake, ndinaitana kwa Mulungu, ndipo anandiyankha; munthu wolungama wangwiro asekedwa.

⁵Munthu wosatekeseka apeputsa tsoka mumtima mwake, limlindira woterereka mapazi ake.

⁶Mahema a achifwamba akhala mumtendere, ndi iwo oputa Mulungu alimbika mtima; amene Mulungu amadzazira dzanja lao.

⁷Tafunsira tsono kwa nyamazo, zidzakulangiza, ndi mbalame za m'mlengalenga, zidzakuuza.

⁸Kapena ulankhule ndi dziko lapansi, lidzakulangiza; ndi nsomba za kunyanja, zidzakufotokozera.

⁹Ndaniyo sadziwa nazo izi zonse; kuti dzanja la Yehova lichita ichi?

¹⁰M'dzanja mwake muli mpweya wa zamoyo zonse, ndi mzimu wa munthu aliyense.

¹¹M'khutumu simuyesa mau, monga m'kamwa mulawa chakudya chake?

¹²Kwa okalamba kuli nzeru, ndi kwa a masiku ochuluka luntha.

¹³Kwa Iye kuli nzeru ndi mphamvu; uphungu ndi luntha ali nazo.

¹⁴Taona, agamula, ndipo palibe kumanganso; amtsekera munthu, ndipo palibe kumtsegulira.

¹⁵Taona atsekera madzi, naphwa; awatsegulira, ndipo akokolola dziko lapansi.

¹⁶Kwa Iye kuli mphamvu ndi nzeru. Wonyengedwa ndi wonyenga yemwe ali ake.

¹⁷Apita nao maphungu atawafunkhira, napulukiritsa oweruza milandu.

¹⁸Amasula chomangira cha mafumu, nawamangira nsinga m'chuuno mwao.

¹⁹Apita nao, ansembe atawafunkhira, nagubuduza amphamvu.

²⁰Amchotsera wokhulupirika kunena kwake. Nalanda luntha la akulu.

²¹Atsanulira mnyozo pa akalonga, nawansezera olimba lamba lao.

²²Avumbulutsa zozama mumdima, natulutsa mthunzi wa imfa ukhale poyera;

²³achulukitsa amitundu, nawaononganso; abalalikitsa amitundu, nawabwezanso.

²⁴Awachotsera akulu a anthu a padziko mtima wao, nawasokeretsa m'chipululu chopanda njira.

²⁵Iwo ayambasa mumdima mopanda kuunika, ndipo awayendetsa dzandidzandi.