Read Chichewa Buku Lopatulika Bible 2014 YOBU 13 Bible Online

YOBU 13 - Chichewa Buku Lopatulika Bible 2014 bible

YOBU 13

¹Taonani, diso langa lachiona chonsechi; m'khutu mwanga ndachimva ndi kuchizindikira.

²Chimene muchidziwa inu, inenso ndichidziwa; sindikucheperani.

³Koma ine ndidzanena ndi Wamphamvuyonse, ndipo ndifuna kudzikanira kwa Mulungu.

⁴Koma inu ndinu opanga zabodza, asing'anga opanda pake inu nonse.

⁵Mwenzi mutakhala chete konse, ndiko kukadakhala nzeru zanu.

⁶Tamvani tsono kudzikanira kwanga, tamverani kudzinenera kwa milomo yanga.

⁷Kodi munenera Mulungu mosalungama, ndi kumnenera Iye monyenga?

⁸Kodi mukhalira kumodzi ndi Iye? Mundilimbirana mwa Mulungu.

⁹Nchokoma kodi kuti Iye akusanthuleni? Kodi mudzamnyenga Iye monga munyenga munthu?

¹⁰Adzakudzudzulani ndithu, mukachita tsankho m'tseri.

¹¹Ukulu wake sukuchititsani mantha, ndi kuopsa kwake sikukugwerani kodi?

¹²Zikumbutso zanu ndizo miyambi ya mapulusa; zodzikanira zanu zikunga malinga adothi.

¹³Khalani chete, ndilekeni, kuti ndinene, chondifikira chifike.

¹⁴Ndilumirenji mnofu wanga pamano panga, ndi kupereka moyo wanga m'dzanja langa?

¹⁵Angakhale andipha koma ndidzamlindira; komanso ndidzaumirira mayendedwe anga pamaso pake.

¹⁶Iye adzakhalanso chipulumutso changa, pakuti wonyoza Mulungu sadzafika pamaso pake.

¹⁷Mvetsetsani mau anga, ndi kunenetsa kwanga kumveke m'makutu mwanu.

¹⁸Taonani tsono, ndalongosola mlandu wanga; ndidziwa kuti adzandimasula ndili wolungama.

¹⁹Ndaniyo adzatsutsana nane? Ndikakhala chete, ndidzapereka mzimu wanga.

²⁰Zinthu ziwiri zokha musandichitire, pamenepo sindidzabisalira nkhope yanu.

²¹Mundichotsere dzanja lanu kutali, ndi kuopsa kwanu kusandichititse mantha.

²²Pamenepo muitane, ndipo ndidzayankha; kapena ndinene ndine, ndipo mundiyankhe ndinu.

²³Mphulupulu zanga ndi zochimwa zanga ndi zingati? Mundidziwitse kulakwa kwanga ndi tchimo langa.

²⁴Mubisiranji nkhope yanu, ndi kundiyesa mdani wanu?

²⁵Kodi mudzaopsa tsamba lakungouluka, ndi kulondola ziputu zouma?

²⁶Pakuti mundilembera zinthu zowawa, ndi kundipatsa ngati cholowa mphulupulu za ubwana wanga.

²⁷Mulonganso mapazi anga m'zigologolo, ndi kupenyerera mayendedwe anga onse; mudzilembera malire mopanika mapazi anga.

²⁸Momwemo munthu akutha ngati chinthu choola, ngati chovala chodyedwa ndi njenjete.