Read Chichewa Buku Lopatulika Bible 2014 YOBU 14 Bible Online

YOBU 14 - Chichewa Buku Lopatulika Bible 2014 bible

YOBU 14

¹Munthu wobadwa ndi mkazi ngwa masiku owerengeka, nakhuta mavuto.

²Atuluka ngati duwa, nafota; athawa ngati mthunzi, osakhalitsa.

³Ndipo kodi mumtsegulira maso anu wotereyo, ndi kunditenga kunena nane mlandu Inu?

⁴Adzatulutsa choyera m'chinthu chodetsa ndani? Nnena mmodzi yense.

⁵Popeza masiku ake alembedwa, chiwerengo cha miyezi yake chikhala ndi Inu, ndipo mwamlembera malire ake kuti asapitirirepo iye;

⁶mumleke osamthira maso, kuti apumule, kuti akondwere nalo tsiku lake monga wolembedwa ntchito.

⁷Pakuti akaulikha mtengo pali chiyembekezo kuti udzaphukanso, ndi kuti nthambi yake yanthete siidzasowa.

⁸Ngakhale muzu wake wakalamba m'nthaka, ndi tsinde lake likufa pansi.

⁹Koma pa mnunkho wa madzi udzaphuka, nudzaswa nthambi ngati womera.

¹⁰Koma munthu akufa atachita liondeonde inde, munthu apereka mzimu wake, ndipo ali kuti?

¹¹Madzi achoka m'nyanja, ndi mtsinje ukuphwa, nuuma;

¹²momwemo munthu agona pansi, osaukanso; kufikira miyamba kulibe, sadzaukanso, kapena kuutsidwa pa tulo take.

¹³Ha? Mukadandibisa kumanda, mukadandisunga m'tseri, mpaka wapita mkwiyo wanu. Mukadandiikira nthawi, ndi kundikumbukira.

¹⁴Atafa munthu, adzakhalanso ndi moyo kodi? Ndikadayembekeza masiku onse a nkhondo yanga, mpaka kwafika kusandulika kwanga.

¹⁵Mukadaitana, ndipo ndikadakuyankhani; mukadakhumba ntchito ya manja anu.

¹⁶Koma tsopano muwerenga moponda mwanga; kodi simuyang'anitsa tchimo langa?

¹⁷Cholakwa changa chaikidwa m'thumba lokhomedwa chizindikiro; ndipo mumanga pamodzi mphulupulu zanga.

¹⁸Ndipo zoonadi, likagwa phiri, latha; ndi thanthwe lisunthika m'malo mwake.

¹⁹Madzi anyenya miyala; zosefukira zao zikokolola fumbi la nthaka; ndipo muononga chiyembekezo cha munthu.

²⁰Mumlaka chilakire, napita iye; musintha nkhope yake, mumuuza achoke.

²¹Ana ake aona ulemu osadziwa iye; napeputsidwa, koma osazindikira za iwo.

²²Koma thupi lake limuwawira yekha, ndi mtima wake umliritsa yekha.