Read Chichewa Buku Lopatulika Bible 2014 YOBU 15 Bible Online

YOBU 15 - Chichewa Buku Lopatulika Bible 2014 bible

YOBU 15

¹Pamenepo Elifazi wa ku Temani anayankha, nati,

²Kodi mwini nzeru ayankhe ndi kudziwa kouluzika, ndi kudzaza mimba yake ndi mphepo ya kum'mawa?

³Kodi atsutsane ndi mnzake ndi mau akusathandiza? Kapena ndi maneno akusaphindulitsa?

⁴Zedi uyesa chabe mantha, nuchepsa chilingiriro pamaso pa Mulungu.

⁵Pakuti pakamwa pako paphunzitsa mphulupulu zako, nusankha lilime la ochenjerera.

⁶Pakamwa pako pakutsutsa, si ine ai. Inde milomo yako ikuchitira umboni wakukutsutsa.

⁷Kodi ndiwe munthu woyamba kubadwa? Kapena unayamba kulengedwa ndiwe, osati mapiri?

⁸Kodi unamva uphungu wachinsinsi wa Mulungu? Ndipo unadzikokera nzeru kodi?

⁹Udziwa chiyani, osachidziwa ife? Uzindikira chiyani, chosakhala mwa ife?

¹⁰Pakati pa ife pali aimvi, ndi okalambitsa, akuposa atate wako masiku ao.

¹¹Masangalatso a Mulungu akuchepera kodi? Kapena uli nacho chinsinsi kodi?

¹²Mtima wako usonthokeranji nawe? Maso ako aphethiraphethira chifukwa ninji?

¹³Kuti utembenuza mzimu wako utsutsane ndi Mulungu, ndi kulola mau otere atuluke m'kamwa mwako.

¹⁴Munthu nchiyani kuti akhale woyera, wobadwa ndi mkazi kuti akhale wolungama?

¹⁵Taona, Mulungu sakhulupirira opatulika ake; ngakhale m'mwamba simuyera pamaso pake.

¹⁶Koposa kotani nanga munthu wonyansa ndi wodetsa, wakumwa chosalungama ngati madzi.

¹⁷Ndidzakuonetsa, undimvere; chimene ndinachiona, ndidzakufotokozera;

¹⁸chimene adachinena anzeru, adachilandira kwa makolo ao, osachibisa;

¹⁹ndiwo amene analandira okha dzikoli, wosapita mlendo pakati pao.

²⁰Munthu woipa adzipweteka masiku ake onse, ndi zaka zowerengeka zisingikira woopsa.

²¹M'makutu mwake mumveka zoopsetsa; pali mtendere amfikira wakumuononga.

²²Sakhulupirira kuti adzatulukamo mumdima, koma kuti lupanga limlindira.

²³Ayendayenda ndi kufuna chakudya, nati, Chilikuti? Adziwa kuti lamkonzekeratu pafupi tsiku lamdima.

²⁴Nsautso ndi chipsinjo zimchititsa mantha, zimlaka ngati mfumu yokonzekeratu kunkhondo.

²⁵Pakuti amtambasula dzanja lake moyambana ndi Mulungu, napikisana ndi Wamphamvuyonse.

²⁶Amthamangira Iye mwaliuma, ndi zikopa zake zochindikira.

²⁷Popeza anakuta nkhope yake ndi kunenepa kwake, nachita mafunyenye a mafuta m'zuuno zake;

²⁸adzakhala m'midzi yopasuka, m'nyumba zosakhalamo munthu, zoti zisandulika muunda.

²⁹Sadzakhala wolemera, ndi chuma chake sichidzakhalitsa, ndi zipatso zake sizidzachuluka padziko.

³⁰Sadzachoka mumdima; lawi la moto lidzaumitsa nthambi zake; ndipo adzachoka ndi mpumo wa m'kamwa mwake.

³¹Asatame zopanda pake, kudzinyenga nazo; pakuti zopanda pake zidzakhala chombwezera chake.

³²Chidzachitika isanadze nthawi yake; pakuti nthambi yake siidzaphuka.

³³Adzayoyoka zipatso zake zosapsa ngati mpesa, nadzathothoka maluwa ake ngati mtengo wa azitona.

³⁴Pakuti msonkhano wa onyoza Mulungu udzakhala chumba, ndi moto udzapsereza mahema a olandira chokometsera mlandu.

³⁵Aima ndi chovuta, nabala mphulupulu, ndi m'mimba mwao mukonzeratu chinyengo.