Read Chichewa Buku Lopatulika Bible 2014 YOBU 16 Bible Online

YOBU 16 - Chichewa Buku Lopatulika Bible 2014 bible

YOBU 16

¹Pamenepo Yobu anayankha, nati,

²Ndamva zambiri zotere; inu nonse ndinu otonthoza mtima mondilemetsa.

³Kodi adzatha mau ouluzika? Kapena chikuwindula nchiyani kuti uyankha zotere?

⁴Inenso ndikadanena monga inu, moyo wanu ukadakhala m'malo mwa moyo wanga, ndikadalumikizanitsa mau akutsutsana nanu, ndi kukupukusirani mutu wanga.

⁵Koma ndikadakulimbikitsani ndi m'kamwa mwanga, ndi chitonthozo cha milomo yanga chikadatsitsa chisoni chanu.

⁶Chinkana ndinena chisoni changa sichitsika; ndipo ndikaleka, chindichokera nchiyani?

⁷Koma tsopano wandilemetsa Iye; mwapasula msonkhano wanga wonse.

⁸Kundigwira kwanu, ndiko umboni wonditsutsa, kuonda kwanga kundiukira, kuchita umboni pamaso panga.

⁹Iye ananding'amba m'kundida kwake, nakwiya nane, anandikukutira mano; mdani wanga ananditong'olera maso ake.

¹⁰Iwo anandiyasamira pakamwa pao; anandiomba pama ndi kunditonza; asonkhana pamodzi kunditsutsa.

¹¹Mulungu andipereka kwa osulangama, nandiponya m'manja a oipa.

¹²Ndinali mkupuma, koma anandithyola; inde anandigwira pakhosi, nandiphwanya; nandiimika ndikhale chandamali.

¹³Eni mauta ake andizinga, ang'amba impso zanga, osazileka; natsanulira pansi ndulu yanga.

¹⁴Andipasulapasula; andithamangira ngati wamphamvu.

¹⁵Ndadzisokerera chiguduli kukhungu langa. Ndipo ndaipsa mphamvu yanga m'fumbi.

¹⁶Nkhope yanga njodetsedwa ndi kulira misozi, ndi pa zikope zanga pali mthunzi wa imfa;

¹⁷pangakhale palibe chiwawa m'manja mwanga, ndi pemphero langa ndi loyera.

¹⁸Dziko iwe, usakwirire mwazi wanga, ndi kulira kwanga kusowe popumira.

¹⁹Tsopanonso, taona, mboni yanga ili kumwamba, ndi nkhoswe yanga ikhala m'mwamba.

²⁰Mabwenzi anga andinyoza; koma diso langa lilirira misozi kwa Mulungu.

²¹Ha? Munthu akadapembedzera mnzake kwa Mulungu, monga munthu apembedzera mnansi wake!

²²Pakuti zitafika zaka zowerengeka, ndidzamuka kunjira imene sindibwererako.