Read Chichewa Buku Lopatulika Bible 2014 YOBU 18 Bible Online

YOBU 18 - Chichewa Buku Lopatulika Bible 2014 bible

YOBU 18

¹Pamenepo Bilidadi wa ku Suki anayankha, nati,

²Musaka mau kufikira liti? Zindikirani, ndi pamenepo tidzanena.

³Tiyesedwa bwanji ngati nyama za kuthengo, ndi kukhala odetsedwa pamaso panu?

⁴Iwe wodzing'amba mumkwiyo mwako, kodi dziko lapansi lisiyidwe chifukwa cha iwe? Kapena thanthwe lisunthike m'malo mwake?

⁵Inde, kuunika kwa woipa kudzazima, ndi lawi la moto wake silidzawala.

⁶Kuunikaku kudzada m'hema mwake, ndi nyali yake ya pamwamba pake idzazima.

⁷Mapondedwe ake amphamvu adzasautsidwa, ndi uphungu wakewake udzamgwetsa.

⁸Pakuti aponyedwa m'ukonde ndi mapazi ake, namaponda pamatanda.

⁹Msampha udzamgwira kuchitende, ndi khwekhwe lidzamkola.

¹⁰Msampha woponda umbisikira pansi, ndi msampha wa chipeto panjira.

¹¹Zoopetsa zidzamchititsa mantha monsemo, nadzampirikitsa kumbuyo kwake.

¹²Njala idzatha mphamvu yake, ndi tsoka lidzamkonzekeratu pambali pake.

¹³Zidzatha ziwalo za thupi lake, mwana woyamba wa imfa adzatha ziwalo zake.

¹⁴Adzazulidwa kuhema kwake kumene anakhulupirira; nadzatengedwa kunka naye kwa mfumu ya zoopsa.

¹⁵Adzakhala m'hema mwake iwo amene sali ake; miyala ya sulufure idzawazika pokhala pake.

¹⁶Mizu yake idzauma pansi, ndi nthambi yake idzafota m'mwamba.

¹⁷Chikumbukiro chake chidzatayika m'dziko, ndipo adzasowa dzina kukhwalala.

¹⁸Adzamkankha achoke kukuunika alowe kumdima; adzampirikitsa achoke m'dziko lokhalamo anthu.

¹⁹Sadzakhala naye mwana kapena chidzukulu mwa anthu a mtundu wake, kapena wina wotsalira kumene anakhalako.

²⁰Akudza m'mbuyo adzadabwa nalo tsiku lake, monga aja omtsogolera anagwidwa mantha.

²¹Zoonadi, zokhalamo osalungama zitero, ndi malo a iye amene sadziwa Mulungu ndi awa.