Read Chichewa Buku Lopatulika Bible 2014 YOBU 19 Bible Online

YOBU 19 - Chichewa Buku Lopatulika Bible 2014 bible

YOBU 19

¹Koma Yobu anayankha, nati,

²Mudzasautsa moyo wanga kufikira liti, ndi kundithyolathyola nao mau?

³Kakhumi aka mwandichititsa manyazi; mulibe manyazi kuti mundiumira mtima.

⁴Ndipo ngati ndalakwa ndithu, kulakwa kwanga kuli ndi ine ndekha.

⁵Ngati inu mudzikuza ndithu pa ine, ndi kunditchulira mtonzo wanga kuti munditsutse nao.

⁶Dziwani tsopano kuti Mulungu wandikhotetsera mlandu wanga, nandizinga ndi ukonde wake.

⁷Taonani, ndifuula kuti, Chiwawa! Koma sandimvera; ndikuwa, koma palibe chiweruzo.

⁸Iye ananditsekera njira kuti ndisapitireko, naika mdima poyendapo ine.

⁹Anandivula ulemerero wanga, nandichotsera korona pamutu panga.

¹⁰Nandigamula ponsepo, ndipo ndamukatu; nachizula chiyembekezo changa ngati mtengo.

¹¹Wandiyatsiranso mkwiyo wake, nandiyesera ngati wina wa adani ake.

¹²Ankhondo ake andidzera pamodzi, nandiundira njira yao, nandimangira misasa pozinga hema wanga.

¹³Iye anandichotsera abale anga kutali, ndi odziwana nane andiyesa mlendo konse.

¹⁴Anansi anga andisowa, ndi odziwana nane bwino andiiwala.

¹⁵Iwo a m'nyumba mwanga ndi adzakazi anga andiyesa mlendo; ndine wachilendo pamaso pao.

¹⁶Ndikaitana kapolo wanga, sandibwezera mau, chinkana ndimpembedza pakamwa panga.

¹⁷Mpweya wanga unyansira mkazi wanga, chinkana ndinampembedza ndi kutchula ana a thupi langa.

¹⁸Angakhale ana ang'ono andipeputsa, ndikanyamuka, andinena;

¹⁹mabwenzi anga enieni onse anyansidwa nane; ndi onse ndakondana nao asandulika adani anga.

²⁰Fupa langa laumirira pa khungu langa ndi mnofu wanga, ndipo ndapulumuka ndili nazo nkhama za mano anga.

²¹Ndichitireni chifundo, ndichitireni chifundo, mabwenzi anga inu; pakuti dzanja la Mulungu landikhudza.

²²Mundilondola bwanji ngati Mulungu, losakukwanirani thupi langa?

²³Ha! Akadalembedwa mau anga! Ha! Akadalembedwa m'buku!

²⁴Akadawazokota pathanthwe chikhalire, ndi chozokotera chachitsulo ndi kuthira ntovu!

²⁵Koma ndidziwa kuti Mombolo wanga ali ndi moyo, nadzauka potsiriza pafumbi.

²⁶Ndipo khungu langa litaonongeka, pamenepo wopanda thupi langa, ndidzapenya Mulungu,

²⁷amene ndidzampenya ndekha, ndi maso anga adzamuona, si wina ai. Imso zanga zatha m'kati mwanga.

²⁸Mukati, Tiyeni timlondole! Popeza chifukwa cha mlandu chapezeka mwa ine;

²⁹muchite nalo mantha lupanga; pakuti mkwiyo utenga zolakwa za lupanga, kuti mudziwe pali chiweruzo.