Read Chichewa Buku Lopatulika Bible 2014 YOBU 21 Bible Online

YOBU 21 - Chichewa Buku Lopatulika Bible 2014 bible

YOBU 21

¹Pamenepo Yobu anayankha, nati,

²Mvetsetsani mau anga; ndi ichi chikhale chitonthozo chanu.

³Mundilole, ndinene nanenso; ndipo nditanena ine, sekani.

⁴Kodi ine, kudandaula kwanga, ndidandaulira munthu? Ndipo ndilekerenji kupsa mtima?

⁵Ndiyang'anireni, nimusumwe, gwirani pakamwa panu.

⁶Ndikangokumbukira ndivutika mtima, ndi thupi langa lichita nyaunyau.

⁷Oipa akhaliranji ndi moyo, nakalamba, nalemera kwakukulu?

⁸Mbeu zao zikhazikika pamodzi nao pankhope pao, ndi ana ao pamaso pao.

⁹Nyumba zao sizitekeseka ndi mantha, ngakhale ndodo ya Mulungu siiwakhalira.

¹⁰Ng'ombe yao yamphongo imakwera, yosakanika; ng'ombe yao yaikazi imaswa, yosapoloza.

¹¹Atulutsa makanda ao ngati gulu, ndi ana ao amavinavina.

¹²Aimbira lingaka ndi zeze, nakondwera pomveka chitoliro.

¹³Atsekereza masiku ao ndi zokoma, natsikira m'kamphindi kumanda.

¹⁴Koma adati kwa Mulungu, Tichokereni; pakuti sitifuna kudziwa njira zanu.

¹⁵Wamphamvuyonse ndiye yani kuti timtumikire? Ndipo tidzapindulanji pakumpemphera Iye?

¹⁶Taonani, zokoma zao sizili m'dzanja lao; (koma uphungu wa oipa unditalikira.)

¹⁷Ngati nyali za oipa zizimidwa kawirikawiri? Ngati tsoka lao liwagwera? Ngati Mulungu awagawira zowawa mu mkwiyo wake?

¹⁸Ngati akunga ziputu zomka ndi mphepo, ngati mungu wouluzika ndi nkuntho?

¹⁹Mukuti, Mulungu asungira ana ake a munthu choipa chake, ambwezere munthuyo kuti achidziwe.

²⁰Aone yekha chionongeko chake m'maso mwake, namwe mkwiyo wa Wamphamvuyonse.

²¹Pakuti chomsamalitsa nyumba yake nchiyani, atapita iye, chiwerengo cha miyezi yake chitadulidwa pakati?

²²Ngati pali munthu wakumphunzitsa Mulungu nzeru? Popeza Iye aweruza mlandu iwo okwezeka.

²³Wina akufa, wabiriwiri, ali chikhalire ndi chipumulire.

²⁴Mbale zake zidzala ndi mkaka; ndi wongo wa m'mafupa ake uli momwe.

²⁵Koma mnzake akufa ali nao mtima wakuwawa, osalawa chokoma konse.

²⁶Iwo agona chimodzimodzi kufumbi, ndi mphutsi ziwakuta.

²⁷Taonani, ndidziwa maganizo anu, ndi chiwembu mundilingirira moipa.

²⁸Pakuti munena, Ili kuti nyumba ya kalonga? Ndi hema wokhalamo woipa ali kuti?

²⁹Simunawafunsa kodi opita m'njira? Ndipo simusamalira zotsimikiza zao?

³⁰Zakuti munthu woipa asungika tsiku la tsoka? Natulutsidwa tsiku la mkwiyo?

³¹Adzamfotokozera ndani njira yake pamaso pake? Nadzamlipitsa ndani pa ichi anachichita?

³²Potsiriza pake adzapita naye kumanda, nadzadikira pamanda pake.

³³Zibuma za kuchigwa zidzamkomera. Adzakoka anthu onse amtsate, monga anamtsogolera osawerengeka.

³⁴Potero munditonthozeranji nazo zopanda pake, popeza m'mayankho mwanu mutsala mabodza okha?