Read Chichewa Buku Lopatulika Bible 2014 YOBU 22 Bible Online

YOBU 22 - Chichewa Buku Lopatulika Bible 2014 bible

YOBU 22

¹Pamenepo Elifazi wa ku Temani anayankha, nati,

²Kodi munthu apindulira Mulungu? Koma wanzeru angodzipindulira yekha.

³Kodi Wamphamvuyonse akondwera nako kuti iwe ndiwe wolungama? Kapena kodi apindula nako kuti ukwaniritsa njira zako?

⁴Kodi akudzudzula, nadza nawe kumlandu, chifukwa cha kumuopa kwako?

⁵Zoipa zako sizichuluka kodi? Ndi mphulupulu zako sizikhala zosawerengeka kodi?

⁶Pakuti wamtenga chikole kwa mbale wako wopanda chifukwa, ndi kuvula ausiwa zovala zao.

⁷Sunampatsa wolema madzi amwe, ndi wanjala unammana chakudya.

⁸Koma munthu mwini mphamvu, dziko ndi lake; ndi munthu wovomerezeka, anakhala momwemo.

⁹Unabweza akazi amasiye osawaninkha kanthu, ndi manja a ana amasiye anathyoledwa.

¹⁰Chifukwa chake misampha ikuzinga. Ndi mantha akuvuta modzidzimutsa,

¹¹kapena mdima kuti ungaone, ndi madzi aunyinji akumiza.

¹²Kodi Mulungu sakhala m'mwamba m'tali? Ndipo penyani kutalika kwake kwa nyenyezi, zili m'talitali.

¹³Ndipo ukuti, Adziwa chiyani Mulungu? Aweruza kodi mwa mdima wa bii?

¹⁴Mitambo ndiyo chomphimba, kuti angaone; ndipo amayenda pa thambo lakumwamba.

¹⁵Udzasunga kodi njira yakale, anaiponda anthu amphulupulu?

¹⁶Amene anakwatulidwa isanafike nyengo yao, chigumula chinakokolola kuzika kwao;

¹⁷amene anati kwa Mulungu, Tichokereni; ndipo, Angatichitire chiyani Wamphamvuyonse?

¹⁸Angakhale Iye adadzaza nyumba zao ndi zabwino; koma uphungu wa oipa unditalikira.

¹⁹Olungama achiona nakondwera; ndi osalakwa awaseka pwepwete,

²⁰ndi kuti, Zoonadi, otiukirawo alikhidwa, ndi zowatsalira, moto unazipsereza.

²¹Uzolowerane ndi Iye, nukhale ndi mtendere; ukatero zokoma zidzakudzera.

²²Landira tsono chilamulo pakamwa pake, nuwasunge maneno ake mumtima mwako.

²³Ukabweranso kwa Wamphamvuyonse, udzamanga bwino; ukachotsera chosalungama kutali kwa mahema ako.

²⁴Ndipo utaye chuma chako kufumbi, ndi golide wa ku Ofiri ku miyala ya kumitsinje.

²⁵Ndipo Wamphamvuyonse adzakhala chuma chako, ndi ndalama zako zofunika.

²⁶Pakuti pamenepo udzakondwera naye Wamphamvuyonse, ndi kuweramutsa nkhope yako kwa Mulungu.

²⁷Udzampemphera ndipo adzakumvera; nudzatsiriza zowinda zako.

²⁸Ukatsimikiza mtima kakuti, kadzakhazikikira iwe; ndi kuunika kudzawala pa njira zako.

²⁹Anthu akakugwetsa pansi, udzati, Adzandikweza; ndipo adzapulumutsa wodzichepetsayo.

³⁰Adzamasula ngakhale wopalamula, inde adzamasuka mwa kuyera kwa manja ako.