Read Chichewa Buku Lopatulika Bible 2014 YOBU 23 Bible Online

YOBU 23 - Chichewa Buku Lopatulika Bible 2014 bible

YOBU 23

¹Koma Yobu anayankha, nati,

²Lero lomwe kudandaula kwanga kumawawa; kulanga kwanga kuposa kubuula kwanga m'kulemera kwake.

³Ha! Ndikadadziwa kumene ndikampeza Mulungu, kuti ndifike kumpando wake!

⁴Ndikadalongosola mlandu wanga pamaso pake, ndikadadzaza m'kamwa mwanga ndi matsutsano.

⁵Ndikadadziwa mau akadandiyankha ine, ndikadazindikira chimene akadanena nane.

⁶Akadatsutsana nane kodi mwa mphamvu yake yaikulu? Iai, koma akadanditcherera khutu.

⁷Apo woongoka mtima akadatsutsana naye; ndipo ndikadapulumuka chipulumukire kwa Woweruza wanga.

⁸Taonani, ndikamka m'tsogolo, kulibe Iye; kapena m'mbuyo sindimzindikira;

⁹akachita Iye kulamanzere, sindimpenyerera; akabisala kulamanja, sindimuona.

¹⁰Koma adziwa njira ndilowayi; atandiyesa ndidzatuluka ngati golide.

¹¹Phazi langa lagwiratu moponda Iye, ndasunga njira yake, wosapatukamo.

¹²Sindinabwerera kusiya malamulo a pa milomo yake; ndasungitsa mau a pakamwa pake koposa lamulo langalanga.

¹³Koma Iye ndiye wa mtima umodzi, adzambweza ndani? Ndi ichi chimene moyo wake uchifuna achichita.

¹⁴Pakuti adzachita chondiikidwiratu; ndipo zambiri zotere zili ndi Iye.

¹⁵Chifukwa chake ndiopsedwa pankhope pake; ndikalingirira, ndichita mantha ndi Iye.

¹⁶Pakuti Mulungu walefula mtima wanga, ndi Wamphamvuyonse wandiopsa.

¹⁷Popeza sindinalikhidwa usanafike mdimawo, ndipo sanandiphimbire nkhope yanga ndi mdima wa bii.