Read Chichewa Buku Lopatulika Bible 2014 YOBU 27 Bible Online

YOBU 27 - Chichewa Buku Lopatulika Bible 2014 bible

YOBU 27

¹Ndipo Yobu anaonjezanso mwambi wake, nati,

²Pali Mulungu, amene anandichotsera zoyenera ine, ndi Wamphamvuyonse, amene anawawitsa moyo wanga,

³pakuti moyo wanga wonse ukali mwa ine, ndi mpweya wa Mulungu m'mphuno mwanga;

⁴milomo yanga siilankhula chosalungama, ndi lilime langa silitchula zachinyengo.

⁵Sindivomereza konse kuti muli olungama; mpaka kufa ine sinditaya ungwiro wanga.

⁶Ndiumirira chilungamo changa, osachileka; chikhalire moyo ine, mtima wanga sunditonza.

⁷Mdani wanga akhale ngati woipa, ndi iye amene andiukira ngati wosalungama.

⁸Pakuti chiyembekezo cha wonyoza Mulungu nchiyani pomlikhatu Mulungu, pomchotsera moyo wake?

⁹Kodi Mulungu adzamvera kufuula kwake, ikamdzera nsautso?

¹⁰Kodi adzadzikondweretsa naye Wamphamvuyonse, ndi kuitana kwa Mulungu nthawi zonse?

¹¹Ndidzakulangizani za dzanja la Mulungu; chokhala ndi Wamphamvuyonse sindidzachibisa.

¹²Taonani, inu nonse munachiona; ndipo mugwidwa nazo zopanda pake chifukwa ninji?

¹³Ili ndi gawo la munthu woipa kwa Mulungu, ndi cholowa cha akupsinja anzao achilandira kwa Wamphamvuyonse.

¹⁴Akachuluka ana ake, ndiko kuchulukira lupanga, ndi ana ake sadzakhuta chakudya.

¹⁵Akumtsalira iye adzaikidwa muimfa, ndi akazi ake amasiye sadzalira maliro.

¹⁶Chinkana akundika ndalama ngati fumbi, ndi kukonzeratu zovala ngati dothi;

¹⁷azikonzeretu, koma wolungama adzazivala, ndi wosalakwa adzagawa ndalamazo.

¹⁸Amanga nyumba yake ngati kangaude, ndi ngati wolindira amanga dindiro.

¹⁹Agona pansi ali wachuma, koma saikidwa; potsegula maso ake, wafa chikomo.

²⁰Zoopsa zimgwera ngati madzi; nkhuntho umtenga usiku.

²¹Mphepo ya kum'mawa imtenga, nachoka iye; nimkankha achoke m'malo mwake.

²²Pakuti Mulungu adzamponyera zoopsa, osamleka; kuthawa akadathawa m'dzanja lake.

²³Anthu adzamuombera manja, nadzamuimbira mluzu achoke m'malo mwake.