Read Chichewa Buku Lopatulika Bible 2014 YOBU 28 Bible Online

YOBU 28 - Chichewa Buku Lopatulika Bible 2014 bible

YOBU 28

¹Koma kuli mtapo wa siliva, ndi malo a golide amene amuyenga.

²Chitsulo achitenga m'nthaka, ndi mkuwa ausungunula kumwala.

³Munthu athawitsa mdima, nafunafuna mpaka malekezero onse, miyala ya mdima wa bii ndi ya mthunzi wa imfa.

⁴Aboola mgodi posiyana patali pokhala anthu; aiwalika ndi phazi lopitapo; apachikika kutali ndi anthu, nalendewalendewa.

⁵Kunena za nthaka, kuchokera momwemo mumatuluka chakudya, ndi m'munsi mwake musandulizika ngati ndi moto.

⁶Miyala yake ndiyo malo a safiro, ndipo ili nalo fumbi lagolide.

⁷Njira imeneyi palibe chiombankhanga chiidziwa; lingakhale diso la kabawi losapenyapo.

⁸Nyama zodzikuza sizinapondapo, ngakhale mkango waukali sunapitapo.

⁹Munthu atambasulira dzanja lake kumwala; agubuduza mapiri kuyambira kumizu.

¹⁰Asema njira pakati pa matanthwe, ndi diso lake liona chilichonse cha mtengo wake.

¹¹Atseka mitsinje ingadonthe; natulutsira poyera chobisikachi.

¹²Koma nzeru, idzapezeka kuti? Ndi luntha, malo ake ali kuti?

¹³Munthu sadziwa mtengo wake; ndipo silipezeka m'dziko la amoyo.

¹⁴Pozama pakuti, Mwa ine mulibe; ndi nyanja ikuti, Kwa ine kulibe.

¹⁵Silipezeka ndi golide, sayesapo siliva mtengo wake.

¹⁶Sailinganiza ndi golide wa Ofiri, ndi sohamu wa mtengo wake wapatali kapena safiro.

¹⁷Golide ndi krustalo sizilingana nayo; ndi kusinthana kwake, siisinthanika ndi zisambiro za golide woyengetsa.

¹⁸Korali kapena ngale sizikumbukikapo. Mtengo wake wa nzeru uposa wa korali wofiira.

¹⁹Topazi wa Kusi sufanana nayo, sailinganiza ndi golide wolongosoka.

²⁰Koma nzeru ifuma kuti? Ndi luntha, pokhala pake pali kuti?

²¹Popeza pabisikira maso a zamoyo zonse, pabisikiranso mbalame za m'mlengalenga.

²²Chionongeko ndi Imfa zikuti, Tamva mbiri yake m'makutu mwathu.

²³Mulungu ndiye azindikira njira yake, ndiye adziwa pokhala pake.

²⁴Pakuti apenyerera malekezero a dziko lapansi, naona pansi pa thambo ponse;

²⁵pamene anaikira mphepo muyeso wake, nayesera madzi miyeso;

²⁶pakuchitira mvula lamulo, ndi njira yoyendamo mphezi ya bingu;

²⁷pamenepo anaiona nzeru, naifotokozera; anaikonza, naisanthula.

²⁸Koma kwa munthu anati, Taonani, kuopa Ambuye ndiko nzeru; ndi kupatukana nacho choipa ndiko luntha.