Read Chichewa Buku Lopatulika Bible 2014 YOBU 29 Bible Online

YOBU 29 - Chichewa Buku Lopatulika Bible 2014 bible

YOBU 29

¹Ndipo Yobu anaonjezanso mwambi wake, nati,

²Ha! Ndikadakhala monga m'miyezi yapitayi, monga m'masiku akundisunga Mulungu;

³muja nyali yake inawala pamutu panga, ndipo ndi kuunika kwake ndinayenda mumdima;

⁴monga umo ndinakhala m'masiku anga olimba, muja uphungu wa Mulungu unakhala pahema panga.

⁵Muja Wamphamvuyonse akali nane pamodzi, ndi ana anga anandizinga;

⁶muja popondera ine padakhatamira ndi mafuta amkaka, ndi thanthwe linanditsanulira mitsinje ya mafuta a azitona!

⁷Muja ndinatuluka kunka kuchipata kumudzi, muja ndinakonza pokhala panga kukhwalala,

⁸anyamata anandiona nabisala, okalamba anandinyamukira, nakhala chilili.

⁹Akalonga anadziletsa kulankhula, ndi kugwira pakamwa pao;

¹⁰mau a omveka anali zii, ndi lilime lao linamamatira kumalakalaka ao.

¹¹Pakuti pondimva ine khutu, linandidalitsa; ndipo pondiona diso, linandichitira umboni.

¹²Pakuti ndinapulumutsa wozunzika wakufuula; mwana wamasiye yemwe wosowa mthandizi.

¹³Dalitso la iye akati atayike linandidzera, ndi mtima wa mkazi wamasiye ndinauimbitsa mokondwera.

¹⁴Ndinavala chilungamo, ndipo chinandivala ine; chiweruzo changa chinanga mwinjiro ndi nduwira.

¹⁵Ndinali maso a akhungu, ndi mapazi a otsimphina.

¹⁶Ndinali atate wa waumphawi; ndi mlandu wa iye amene sindinamdziwa ndinafunsitsa.

¹⁷Ndipo ndinathyola nsagwada ya wosalungama, ndi kukwatula chogwidwa kumano kwake.

¹⁸Pamenepo ndinati, Ndidzatsirizika m'chisa changa; ndipo ndidzachulukitsa masiku anga ngati mchenga.

¹⁹Muzu wanga watambalala kufikira kumadzi; ndi mame adzakhala pa nthambi yanga usiku wonse.

²⁰Ulemu wanga udzakhala wosaguga mwa ine, ndi uta wanga udzakhala wosalifuka m'dzanja mwanga.

²¹Anthu anandimvera, nalindira, nakhala chete, kuti ndiwapangire.

²²Nditanena mau anga sanalankhulenso, ndi kunena kwanga kunawakhera.

²³Anandilindira ngati kulindira mvula, nayasama pakamwa pao ngati kulira mvula ya masika.

²⁴Ndinawaseka akapanda kulimbika mtima; ndipo sanagwetse kusangalala kwa nkhope yanga.

²⁵Ndinawasankhira njira yao ndi kukhala mkulu wao. Ndinakhala ngati mfumu mwa ankhondo ake, ngati wotonthoza ofedwa.