Read Chichewa Buku Lopatulika Bible 2014 YOBU 30 Bible Online

YOBU 30 - Chichewa Buku Lopatulika Bible 2014 bible

YOBU 30

¹Koma tsopano iwo osafikana msinkhu wanga andiseka, iwo amene atate ao ndikadawapeputsa, osawaika pamodzi ndi agalu olinda nkhosa zanga.

²Mphamvunso ya m'manja mwao ndikadapindulanji nayo? Ndiwo anthu amene unyamata wao udatha,

³atsala mafupa okhaokha ndi kusowa ndi njala; akungudza nthaka youma kuli mdima wa m'chipululu chopasuka.

⁴Atchera therere lokolera kuzitsamba, ndi chakudya chao ndicho mizu ya dinde.

⁵Anawapirikitsa pakati pa anthu, awafuulira ngati kutsata mbala.

⁶Azikhala m'zigwa za chizirezire, m'maenje a m'nthaka ndi m'mapanga.

⁷Pakati pa zitsamba alira ngati bulu, pansi pa khwisa asonkhana pamodzi.

⁸Ndiwo ana a opusa, inde ana a anthu opanda dzina; anawaingitsa kuwachotsa m'dziko.

⁹Koma tsopano ndasanduka nyimbo ya oterewo, nandiyesa nthanthi.

¹⁰Anyansidwa nane, akhala patali ndi ine, saleka kuthira malovu pankhope panga.

¹¹Pakuti anamasula nsinga zao, nandizunza; anataya chomangira m'kamwa mwao pamaso panga.

¹²Kudzanja langa lamanja anauka oluluka, akankha mapazi anga, andiundira njira zao zakundiononga.

¹³Aipsa njira yanga, athandizana ndi tsoka langa; ndiwo anthu omwewo osowa mthandizi.

¹⁴Akudza ngati opitira pogamuka linga papakulu, pakati pa zopasuka adzigubuduza kundidzera ine.

¹⁵Anditembenuzira zondiopsa, auluza ulemu wanga ngati mphepo; ndi zosungika zanga zapita ngati mtambo.

¹⁶Ndipo tsopano moyo wanga udzitsanulira m'kati mwanga; masiku akuzunza andigwira.

¹⁷Nyengo ya usiku mafupa anga awaza mwa ine, ndi zowawa zondikungudza sizipuma.

¹⁸Mwa mphamvu yaikulu ya nthenda yanga chovala changa chinasandulika, chindithina ngati pakhosi pa malaya anga.

¹⁹Iye anandiponya m'matope, ndipo ndafanana ndi fumbi ndi phulusa.

²⁰Ndifuula kwa Inu, koma simundiyankha; ndinyamuka, ndipo mungondipenyerera.

²¹Mwasandulika kundichitira nkharwe; ndi mphamvu ya dzanja lanu mundizunza.

²²Mundikweza kumphepo, mundiyendetsa pomwepo; ndipo mundisungunula mumkuntho.

²³Pakuti ndidziwa kuti mudzandifikitsa kuimfa, ndi kunyumba yokomanamo amoyo onse.

²⁴Koma munthu akati agwe, satambasula dzanja lake kodi? Akati aonongeke, safuulako kodi?

²⁵Kodi sindinamlirira misozi wakulawa zowawa? Kodi moyo wanga sunachitira chisoni osowa?

²⁶Muja ndinayembekeza chokoma chinadza choipa, ndipo polindira kuunika unadza mdima.

²⁷M'kati mwanga mupweteka mosapuma, masiku a mazunzo andidzera.

²⁸Ndiyenda ndili wothimbirira osati ndi dzuwa ai; ndinyamuka mumsonkhano ndi kufuula.

²⁹Ndili mbale wao wa ankhandwe, ndi mnansi wao wa nthiwatiwa.

³⁰Khungu langa lada, nilindifundukira; ndi mafupa anga awawa ndi kutentha kwao.

³¹Chifukwa chake zeze wanga wasandulika wa maliro, ndi chitoliro changa cha mau a olira misozi.