Read Chichewa Buku Lopatulika Bible 2014 YOBU 31 Bible Online

YOBU 31 - Chichewa Buku Lopatulika Bible 2014 bible

YOBU 31

¹Ndinapangana ndi maso anga, potero ndipenyerenji namwali?

²Pakuti gawo la Mulungu lochokera kumwamba, ndi cholowa cha Wamphamvuyonse chochokera m'mwambamo nchiyani?

³Si ndizo chionongeko cha wosalungama, ndi tsoka la ochita mphulupulu?

⁴Nanga sapenya njira zanga, ndi kuwerenga moponda mwanga monse?

⁵Ngati ndinayanjana nalo bodza, ndi phazi langa linathamangira chinyengo;

⁶andiyese ndi muyeso wolingana, kuti Mulungu adziwe ungwiro wanga.

⁷Ngati phazi langa linapatuka m'njira, ndi mtima wanga unatsata maso anga? Ngati chilema chamamatira manja anga?

⁸Ndibzale ine nadye wina, ndi zondimerera ine zizulidwe.

⁹Ngati mtima wanga wakopeka ndi mkazi, ngati ndalalira pa khomo la mnzanga,

¹⁰mkazi wanga aperere wina; wina namuike kumbuyo.

¹¹Pakuti icho ndi choipitsitsa, ndicho mphulupulu yoyenera oweruza anene mlandu wake.

¹²Pakuti ndicho moto wakunyeka mpaka chionongeko, ndi chakuzula zipatso zanga zonse.

¹³Ngati ndapeputsa mlandu wa kapolo wanga, kapena wa mdzakazi wanga, potsutsana nane iwo,

¹⁴ndidzatani ponyamuka Mulungu? Ndipo pondizonda Iye ndidzamnyankha chiyani?

¹⁵Kodi Iye amene anandilenga ine m'mimba sanamlenge iyenso? Sindiye mmodzi anatiumba m'mimba?

¹⁶Ngati ndakaniza aumphawi chifuniro chao, kapena kutopetsa maso a amasiye,

¹⁷kapena kudya nthongo yanga ndekha, osadyako mwana wamasiye;

¹⁸(pakuti kuyambira ubwana wanga analeredwa ndi ine monga ndi atate; ndipo ndinakhala nkhoswe ya wamasiye chibadwire ine.)

¹⁹Ngati ndinaona wina alinkutayika wopanda chovala, kapena kuti wosowa alibe chofunda;

²⁰ngati ziuno zake sizinandiyamika, ngati sanafunde ubweya wa nkhosa zanga;

²¹ngati ndinasamulira ana amasiye dzanja langa, popeza ndinaona thandizo langa kuchipata;

²²libanthuke phewa langa paphalo, ndi dzanja langa liduke pagwangwa.

²³Pakuti tsoka lochokera kwa Mulungu linandiopsa, ndi chifukwa cha ukulu wake sindinakhoza kanthu.

²⁴Ngati ndayesa golide chiyembekezo changa, ndi kunena ndi golide woyengetsa, ndiwe chikhazikitso changa;

²⁵ngati ndinakondwera popeza chuma changa nchachikulu, ndi dzanja langa lapeza zochuluka;

²⁶ngati ndalambira dzuwa lilikuwala, kapena mwezi ulikuyenda monyezimira;

²⁷ndi mtima wanga wakopeka m'tseri, ndi pakamwa panga padapsompsona dzanja langa;

²⁸ichinso ndi mphulupulu yoyenera oweruza kunena mlandu wake; pakuti ndikadakana Mulungu ali m'mwamba.

²⁹Ngati ndakondwera nalo tsoka la wondida, kapena kudzitukula pompeza choipa;

³⁰ndithu sindinalola m'kamwa mwanga muchimwe, kupempha motemberera moyo wake.

³¹Ngati amuna a m'hema mwanga sanati, ndani adzapeza munthu wosakhuta nyama yomgawira Yobu?

³²Mlendo sakagona pakhwalala, koma ndinatsegulira wam'njira pakhomo panga.

³³Ngati ndakwirira zolakwa zanga monga Adamu, ndi kubisa mphulupulu yanga m'chifuwa mwanga;

³⁴popeza ndinaopa unyinji waukulu, ndi chipepulo cha mafuko chinandiopsetsa; potero ndinakhala chete osatuluka pakhomo panga.

³⁵Ha! Ndikadakhala naye wina wakundimvera, chizindikiro changa sichi, Wamphamvuyonse andiyankhe; mwenzi ntakhala nao mau akundineneza analemberawo mdani wanga!

³⁶Ndithu ndikadawasenza paphewa panga, ndi kudzimangirira awa ngati korona.

³⁷Ndikadamfotokozera chiwerengo cha mopondamo mwanga, ndikadamsenderera Iye ngati kalonga.

³⁸Ngati minda yanga ifuula monditsutsa, ndi nthumbira zake zilira pamodzi;

³⁹ngati ndadya zipatso zake wopanda ndalama. Kapena kutayitsa eni ake moyo wao;

⁴⁰imere minga m'malo mwa tirigu, ndi dawi m'malo mwa barele. Mau a Yobu atha.