Read Chichewa Buku Lopatulika Bible 2014 YOBU 33 Bible Online

YOBU 33 - Chichewa Buku Lopatulika Bible 2014 bible

YOBU 33

¹Komatu, Yobu, mumvere maneno anga, mutcherere khutu mau anga.

²Taonani tsono, ndatsegula pakamwa panga, lilime langa lanena m'kamwa mwanga.

³Maneno anga awulula chiongoko cha mtima wanga, ndi monga umo idziwira milomo yanga idzanena zoona.

⁴Mzimu wa Mulungu unandilenga, ndi mpweya wa Wamphamvuyonse umandipatsa moyo.

⁵Ngati mukhoza, mundiyankhe; mulongosolere mau anu pamaso panga, mukonzeke.

⁶Taonani, ndikhala kwa Mulungu ngati inu; inenso ndinaumbidwa ndi dothi.

⁷Taonani, kuopsa kwanga simudzachita nako mantha; ndi ichi ndikusenzetsani sichidzakulemererani.

⁸Zedi mwanena m'makutu mwanga, ndinamvanso mau a kunena kwanu, akuti,

⁹Ndine woyera ine, wopanda kulakwa, ndine wosapalamula, ndilibe mphulupulu.

¹⁰Taonani, Iye apeza zifukwa zoti anditsutse nazo, andiyesa mdani wake;

¹¹amanga mapazi anga m'zigologolo, ayang'anira poyenda ine ponse.

¹²Taonani, ndidzakuyankhani m'mene muli mosalungama; pakuti Mulungu ndiye wamkulu woposa munthu.

¹³Mutsutsana ndi Iye chifukwa ninji? Popeza pa zake zonse sawulula chifukwa.

¹⁴Pakuti Mulungu alankhula kamodzi, kapena kawiri, koma anthu sasamalira.

¹⁵M'kulota, m'masomphenya a usiku, pakuwagwera anthu tulo tatikulu, pogona mwatcheru pakama,

¹⁶pamenepo atsegula makutu a anthu, nakomera chizindikiro chilangizo chao;

¹⁷kuti achotse munthu ku chimene akadachita, ndi kubisira munthu kudzikuza kwake;

¹⁸kuti amletse angaonongeke, ndi moyo wake ungatayike ndi lupanga.

¹⁹Alangidwanso ndi zowawa pakama pake, ndi kulimbana kowawa kosapuma m'mafupa ake.

²⁰M'mwemo mtima wake uchita mseru ndi mkate, ndi moyo wake pa chakudya cholongosoka.

²¹Mnofu wake udatha, kuti sungapenyeke; ndi mafupa ake akusaoneka atuluka.

²²Inde wasendera kufupi kumanda, ndi moyo wake kwa akuononga.

²³Akakhala kwa iye mthenga, womasulira mau mmodzi mwa chikwi, kuonetsera munthu chomuyenera;

²⁴pamenepo Mulungu amchitira chifundo, nati, Mlanditse, angatsikire kumanda, Ndampezera dipo.

²⁵Mnofu wake udzakhala see, woposa wa mwana; adzabwerera kumasiku a ubwana wake.

²⁶Apembedza Mulungu, ndipo amkomera mtima; m'mwemo aona nkhope yake mokondwera; ndipo ambwezera munthu chilungamo chake.

²⁷Apenyerera anthu, ndi kuti, ndinachimwa, ndaipsa choongokacho, ndipo sindinapindula nako.

²⁸Koma anandiombola ndingatsikire kumanda, ndi moyo wanga udzaona kuunika.

²⁹Taona, izi zonse azichita Mulungu kawiri katatu ndi munthu,

³⁰kumbweza angalowe kumanda, kuti kuunika kwa moyo kumuwalire.

³¹Tcherani khutu, Yobu, mundimvere ine; mukhale chete, ndipo ndidzanena ine.

³²Ngati muli nao mau mundiyankhe. Nenani, pakuti ndifuna kukulungamitsani.

³³Ngati mulibe mau, tamverani ine; mukhale chete, ndipo ndidzakuphunzitsani nzeru.