Read Chichewa Buku Lopatulika Bible 2014 YOBU 34 Bible Online

YOBU 34 - Chichewa Buku Lopatulika Bible 2014 bible

YOBU 34

¹Ndipo Elihu anabwereza kunena, nati,

²Tamverani mau anga, inu anzeru; munditcherere khutu inu akudziwa.

³Pakuti khutu liyesa mau, monga m'kamwa mulawa chakudya.

⁴Tidzisankhire choyeneracho, tidziwe mwa tokha chokomacho.

⁵Pakuti Yobu wanena, Ine ndine wolungama, ndipo Mulungu wandichotsera choyenera ine

⁶Kodi ndidzinamizire? Bala langa nlosapola, ngakhale sindinalakwa.

⁷Wakunga Yobu ndani, wakumwa mwano ngati madzi?

⁸Wakutsagana nao ochita mphulupulu, nayendayenda nao anthu oipa.

⁹Pakuti anati, Munthu sapindula kanthu nako kuvomerezana naye Mulungu.

¹⁰Chifukwa chake mundimvere ine, eni nzeru inu, nkutali ndi Mulungu kuchita choipa, ndi Wamphamvuyonse kuchita chosalungama.

¹¹Pakuti ambwezera munthu monga mwa ntchito yake, napezetsa munthu aliyense monga mwa mayendedwe ake.

¹²Ndithu zoonadi, Mulungu sangachite choipa, ndi Wamphamvuyonse sangaipse mlandu.

¹³Anamuikiza dziko lapansi ndani? Kapena anakonzeratu dziko lonse lokhalamo anthu ndani?

¹⁴Akadzikumbukira yekha mumtima mwake, akadzisonkhanitsira yekha mzimu wake ndi mpweya wake,

¹⁵zamoyo zonse zidzatsirizika pamodzi, ndi munthu adzabwerera kufumbi.

¹⁶Ngati tsono uli nako kuzindikira, tamvera ichi, Tcherera khutu kunena kwanga.

¹⁷Kodi munthu woipidwa nacho chiweruzo adzalamulira? Ndipo kodi utsutsa wolungama ndi wamphamvuyo kuti ngwoipa?

¹⁸Kodi kuyenera kunena kwa mfumu, Wopanda pake iwe, kapena kwa akalonga, Oipa inu?

¹⁹Nanga kwa Iye wosasamalira nkhope za akalonga, wosasiyanitsa pakati pa wolemera ndi wosauka? Pakuti onsewo ndiwo ntchito ya manja ake.

²⁰M'kamphindi akufa, ngakhale pakati pa usiku, anthu agwedezeka, napita, amphamvu achotsedwa opanda dzanja lakuwachotsa.

²¹Pakuti maso ake ali pa njira ya munthu aliyense, napenya moponda mwake monse.

²²Palibe mdima kapena mthunzi wa imfa, kuti ochita zopanda pake abisaleko.

²³Pakuti Mulungu alibe chifukwa cha kulingiriranso za munthu, kuti afike kwa Iye kudzaweruzidwa.

²⁴Aphwanya eni mphamvu osatulutsa kubwalo mlandu wao, naika ena m'malo mwao.

²⁵Pakuti asamalira ntchito zao, nawagubuduza usiku kuti aphwanyike.

²⁶Awakantha ngati oipa, poyera pamaso pa anthu,

²⁷popeza anapatuka, naleka kumtsata, osasamalira njira zake zilizonse.

²⁸M'mwemo anafikitsa kwa Iye kufuula kwa osauka; ndipo anamva Iye kufuula kwa ozunzika.

²⁹Iye akapatsa mpumulo adzamtsutsa ndani? Akabisa nkhope yake adzampenyerera ndani? Chikachitika pa mtundu wa anthu, kapena pa munthu, nchimodzimodzi;

³⁰kuti munthu wonyoza Mulungu asachite ufumu, ndi anthu asakodwe mumsampha.

³¹Pakuti pali wina kodi anati kwa Mulungu, ndasenza kulanga kwanu, ndingakhale sindinalakwa?

³²Chimene sindichiona mundilangize ndi Inu, ngati ndachita chosalungama sindidzabwerezanso.

³³Kodi chilango cha Mulungu chikhale monga muchifuna inu, pakuti muchikana? Musankhe ndi inu, ine ai; m'mwemo monga mudziwa, nenani.

³⁴Anthu ozindikira adzanena nane, inde anthu anzeru onse akundimva adzati,

³⁵Yobu alankhula wopanda kudziwa, ndi mau ake alibe nzeru.

³⁶Mwenzi nayesedwe Yobu kufikira kutha, chifukwa cha kuyankha kwake monga anthu amphulupulu.

³⁷Pakuti pa kuchimwa kwake aonjeza kupikisana ndi Mulungu, asansa manja pakati pa ife, nachulukitsa maneno ake pa Mulungu.