Read Chichewa Buku Lopatulika Bible 2014 YOBU 36 Bible Online

YOBU 36 - Chichewa Buku Lopatulika Bible 2014 bible

YOBU 36

¹Elihu anabwereza, nati,

²Mundilole pang'ono, ndidzakuuzani, pakuti ndili naonso mau akunenera Mulungu.

³Ndidzatenga nzeru zanga kutali, ndidzavomereza kuti Mlengi wanga ndi wolungama.

⁴Pakuti zoonadi, mau anga sali abodza, wakudziwitsa mwangwiro ali nanu.

⁵Taonani, Mulungu ndiye mwini mphamvu, ndipo sapeputsa munthu; mphamvu ya nzeru zake ndi yaikulu.

⁶Sasunga woipa akhale ndi moyo, koma awaninkha ozunzika zowayenera iwo.

⁷Sawachotsera wolungama maso ake, koma pamodzi ndi mafumu pa mpando wao awakhazika chikhazikire, ndipo akwezeka.

⁸Ndipo akamangidwa m'nsinga, nakakodwa ndi zingwe za mazunzo,

⁹pamenepo awafotokozera ntchito zao, ndi zolakwa zao, kuti anachita modzikuza.

¹⁰Awatseguliranso m'khutu mwao kuti awalangize, nawauza abwerere kuleka mphulupulu.

¹¹Akamvera ndi kumtumikira, adzatsiriza masiku ao modala, ndi zaka zao mokondwera.

¹²Koma akapanda kumvera adzatayika ndi lupanga, nadzatsirizika osadziwa kanthu.

¹³Koma iwo a mtima wakunyoza Mulungu, akundika mkwiyo, akawamanga Iye, safuulira.

¹⁴Iwowa akufa akali biriwiri, ndi moyo wao utayika ngati odetsedwa.

¹⁵Apulumutsa wozunzika mwa kuzunzika kwake, nawatsegulira m'khutu mwao mwa kupsinjika kwao.

¹⁶Inde akadakukopani muchoke posaukira, mulowe kuchitando kopanda chopsinja; ndipo zoikidwa pagome panu zikadakhala zonona ndithu.

¹⁷Koma mukadzazidwa nazo zolingirira oipa, zolingirirazo ndi chiweruzo zidzakugwiranibe.

¹⁸Pakuti muchenjere, mkwiyo ungakunyengeni muchite mnyozo; ndipo usakusokeretseni ukulu wa dipoli.

¹⁹Chuma chanu chidzafikira kodi, kuti simudzakhala wopsinjika, kapena mphamvu yanu yonse yolimba?

²⁰Musakhumbe usiku, umene anthu alikhidwe m'malo mwao.

²¹Chenjerani, musalunjike kumphulupulu; pakuti mwaisankha iyi mutazunzidwa.

²²Taonani, Mulungu achita mokwezeka mu mphamvu yake, mphunzitsi wakunga Iye ndani?

²³Anamuikira njira yake ndani? Adzati ndani, Mwachita chosalungama?

²⁴Kumbukirani kuti mukuze ntchito zake zimene anaziimbira anthu.

²⁵Anthu onse azipenyerera, anthu aziyang'anira kutali.

²⁶Taonani, Mulungu ndiye wamkulu, ndipo sitimdziwa; chiwerengo cha zaka zake nchosasanthulika.

²⁷Pakuti akweza madontho a mvula, akhetsa mvula ya m'nkhungu yake

²⁸Imene mitambo itsanulira, nivumbitsira anthu mochuluka.

²⁹Pali munthu kodi wodziwitsa mayalidwe a mitambo, ndi kugunda kwa msasa wake?

³⁰Taonani, Iye ayala kuunika kwake pamenepo. Navundikira kunsi kwake kwa nyanja.

³¹Pakuti aweruza nazo mitundu ya anthu apatsa chakudya chochuluka.

³²Akutidwa manja ake ndi mphezi, nailamulira igwere pofunapo Iye.

³³Kugunda kwake kulalikira za Iye, zoweta zomwe zilota mtambo woyandikira.