Read Chichewa Buku Lopatulika Bible 2014 YOBU 37 Bible Online

YOBU 37 - Chichewa Buku Lopatulika Bible 2014 bible

YOBU 37

¹Pa ichinso mtima wanga unjenjemera, nusunthika m'malo mwake.

²Mvetsetsani chibumo cha mau ake, ndi kugunda kotuluka m'kamwa mwake.

³Akumveketsa pansi pa thambo ponse, nang'anipitsa mphezi yake ku malekezero a dziko lapansi.

⁴Mau abuma kuitsata, agunda ndi mau a ukulu wake, ndipo sailetsa atamveka mau ake.

⁵Mulungu agunda modabwitsa ndi mau ake, achita zazikulu osazidziwa ife.

⁶Pakuti anena kwa chipale chofewa, Ugwe padziko, momwemonso kwa mvula, ndi kwa mvumbi waukulu.

⁷Atsekereza mokhomera chizindikiro dzanja la munthu aliyense, kuti anthu onse anawalenga adziwe.

⁸Pamenepo zilombo zilowa mobisalamo, nizikhala m'ngaka mwao.

⁹M'chipinda mwake mutuluka kamvulumvulu, ndi chisanu chifuma kumpoto.

¹⁰Mwa kupuma kwake Mulungu apereka chipale, ndi madzi achitando aundana.

¹¹Asenzetsanso mtambo wakuda bii madzi, afunyulula mtambo wokhalamo mphezi yake;

¹²ndipo utembenukatembenuka pakulangiza kwake, kuti uchite zilizonse aulamulira, pa nkhope ya dziko lokhalamo anthu;

¹³ngati aufikitsira dziko lake kulidzudzula, kapena kulichitira chifundo.

¹⁴Tamverani ichi, Yobu. Taimani, mulingirire zodabwitsa za Mulungu.

¹⁵Kodi mudziwa umo Mulungu azilangizira zimenezi, nawalitsa mphezi ya m'mtambo mwake?

¹⁶Kodi mudziwa madendekeredwe ake a mitambo, zodabwitsa za Iye wakudziwa mwangwiro?

¹⁷Kodi mudziwa umo zovala zanu zifundira, pamene dziko lili thuu chifukwa cha mwera?

¹⁸Kodi muyala thambo pamodzi ndi Iye, ndilo lolimba ngati kalirole woyengeka?

¹⁹Mutilangize chimene tidzanena ndi Iye; sitidziwa kulongosola mau athu chifukwa cha mdima.

²⁰Kodi munthu ayenera kumuuza kuti ndifuna kunena, kapena kodi munthu adzakhumba kumezedwa?

²¹Ndipo tsopano anthu sakhoza kupenyerera kuunika pakunyezimira kuthambo, ndi mphepo yapita ndi kuuyeretsa.

²²Kuchokera kumpoto kudzera kuwala konyezimira, Mulungu ali nao ukulu woopsa.

²³Kunena za Wamphamvuyonse, sitingamsanthule; ndiye wa mphamvu yoposa; koma mwa chiweruzo ndi chilungamo chochuluka samasautsa.

²⁴M'mwemo anthu amuopa, Iye sasamalira aliyense wanzeru mumtima.