Read Chichewa Buku Lopatulika Bible 2014 YOBU 38 Bible Online

YOBU 38 - Chichewa Buku Lopatulika Bible 2014 bible

YOBU 38

¹Pamenepo Yehova anayankha Yobu m'kamvulumvulu, nati,

²Ndani uyu adetsa uphungu, ndi mau opanda nzeru?

³Udzimangire m'chuuno tsono ngati mwamuna; ndikufunsa, undidziwitse.

⁴Unali kuti muja ndinaika maziko a dziko lapansi? Fotokoza ngati udziwa kuzindikira.

⁵Analemba malire ake ndani, popeza udziwa? Anayesapo chingwe chake ndani?

⁶Maziko ake anakumbidwa pa chiyani? Kapena anaika ndani mwala wake wa pangodya,

⁷muja nyenyezi za m'mawa zinaimba limodzi mokondwera, ndi ana onse a Mulungu anafuula ndi chimwemwe?

⁸Kapena anatseka nyanja ndani ndi zitseko, muja idakamula ngati kutuluka m'mimba,

⁹muja ndinayesa mtambo chovala chake, ndi mdima wa bii nsalu yake yokulunga,

¹⁰ndi kuilembera malire anga, ndi kuika mipikizo ndi zitseko,

¹¹ndi kuti, Ufike mpaka apa, osapitirirapo; apa adzaletseka mafunde ako odzikuza?

¹²Kodi walamulira m'mawa chiyambire masiku ako, ndi kudziwitsa mbandakucha malo ake;

¹³kuti agwire malekezero a dziko lapansi, nakutumule oipa achokeko?

¹⁴Lisandulika ngati dothi lonyata pansi pa chosindikiza, ndi zonse zibuka ngati chovala;

¹⁵ndi kuunika kwa oipa kuletsedwa kuti asakuone, ndi dzanja losamulidwa lithyoledwa.

¹⁶Kodi unalowa magwero a nyanja? Kodi unayendayenda pozama penipeni?

¹⁷Kodi zipata za imfa zinavumbulukira iwe? Kapena kodi unaona zipata za mthunzi wa imfa?

¹⁸Kodi unazindikira chitando cha dziko lapansi? Fotokozera, ngati uchidziwa chonse.

¹⁹Ili kuti njira yomukira pokhala kuunika? Ndi mdima, pokhala pake pali kuti,

²⁰kuti upite nao kumalire ake, kuti uzindikire miseu ya kunyumba yake?

²¹Udziwa, pakuti unabadwa pamenepo, ndi masiku ako achuluka kuwerenga kwao.

²²Kodi unalowa m'zosungiramo chipale chofewa? Kapena unapenya zosungiramo matalala,

²³amene ndiwasungira tsiku la nsautso, tsiku lakulimbana nkhondo?

²⁴Njira ili kuti yomukira pogawikana kuunika, kapena pomwazikira mphepo ya kum'mawa pa dziko lapansi?

²⁵Ndani anachikumbira mchera chimvula, kapena njira ya bingu la mphezi,

²⁶kuvumbitsa mvula pa dziko lopanda anthu, kuchipululu kosakhala munthu,

²⁷kukhutitsa thengo la kunkhwangwala, ndi kuphukitsa msipu?

²⁸Kodi mvula ili naye atate? Kapena wabala ndani madontho a mame?

²⁹Chipale chinatuluka m'mimba ya yani? Ndi chisanu chochokera m'mwamba anachibala ndani?

³⁰Madzi aundana ngati mwala, ndi pamwamba pa nyanja yozama mpogwirana madzi.

³¹Kodi ungamange gulu la Nsangwe? Kapena kumasula zomangira za Akamwiniatsatana?

³²Ungatulutse kodi nyenyezi m'nyengo zao monga mwa malongosoledwe ao? Kapena kutsogolera Mlalang'amba ndi ana ake?

³³Kodi udziwa malemba a kuthambo? Ukhoza kukhazikitsa ufumu wao pa dziko lapansi?

³⁴Kodi udziwa kukwezera mau ako kumitambo, kuti madzi ochuluka akukute?

³⁵Kodi ukhoza kutumiza mphezi kuti zimuke, ndi kunena nawe, Tili pano?

³⁶Ndani analonga nzeru m'mitambomo? Ndani waninkha nyenyezi yotsotsoka luntha?

³⁷Adziwa ndani kuwerenga mitambo mwanzeru, ndi kutsanulira michenje ya kuthambo ndani,

³⁸pokandika fumbi, ndi kuundana zibuma pamodzi?

³⁹Kodi ukhoza kusakira mkango waukazi nyama? Ndi kukwaniritsa chakudya cha misona,

⁴⁰pamene ibwatama m'ngaka mwao, nikhala mobisala kulaliramo?

⁴¹Amkonzeratu khungubwi chakudya chake ndani, pamenepo ana ake afuulira kwa Mulungu, naulukauluka osowa chakudya?