Read Chichewa Buku Lopatulika Bible 2014 YOBU 39 Bible Online

YOBU 39 - Chichewa Buku Lopatulika Bible 2014 bible

YOBU 39

¹Kodi udziwa nyengo yakuswana zinkhoma? Kodi wapenyerera pakuswa mbawala?

²Ukhoza kodi kuwerenga miyezi yakuzipitira, kapena udziwa nyengo yoti ziswane?

³Zithuntha, ziswa, zitaya zowawa zao.

⁴Ana ao akhala ojincha, akulira kuthengo, achoka osabwerera kwa amao.

⁵Ndani walola mbidzi ituluke yaufulu? Anaimasulira mbidzi nsinga zake ndani,

⁶imene ndachiyesa chipululu nyumba yake, ndi dziko lakhulo pokhala pake?

⁷Aseka phokoso la kumudzi, osamva kukuwa kwa wofulumiza nyama za m'goli.

⁸Poyenda ponse pamapiri mpa busa pake; ilondola chachiwisi chilichonse.

⁹Kodi njati idzavomera kukutumikira, idzakhala ku chodyetseramo chako kodi?

¹⁰Kodi ukhoza kumanga njati ndi lamba lake ilime m'mchera? Kapena idzakutsata kodi kufafaniza nthumbira m'zigwa?

¹¹Udzaikhulupirira kodi, popeza mphamvu yake njaikulu? Udzaisiyira ntchito yako kodi?

¹²Kodi udzaitama kuti itute mbeu zako, ndi kuzisonkhanitsira kudwale?

¹³Phiko la nthiwatiwa likondwera, koma mapiko ndi nthenga zake nzofatsa kodi?

¹⁴Pakuti isiya mazira ake panthaka, nimafunditsa m'fumbi,

¹⁵niiwala kuti phazi lingawaphwanye, kapena chilombo chingawapondereze.

¹⁶Iumira mtima ana ake monga ngati sali ake; idzilemetsa ndi ntchito chabe, popeza ilibe mantha;

¹⁷pakuti Mulungu anaimana nzeru, ndipo sanaigawire luntha.

¹⁸Ikafika nthawi yake, iweramuka, iseka kavalo ndi wa pamsana pake.

¹⁹Wampatsa kavalo mphamvu yake kodi? Wamveka pakhosi pake chenjerere chogwedezeka?

²⁰Wamlumphitsa kodi ngati dzombe? Ulemerero wa kumina kwake ngwoopsa.

²¹Apalasa kuchigwa, nakondwera nayo mphamvu yake; atuluka kukomana nao eni zida.

²²Aseka mantha osaopsedwa, osabwerera kuthawa lupanga.

²³Phodo likuti kochokocho panthiti pake, mkondo wonyezimira ndi nthungo yomwe.

²⁴Ndi kunjenjemera kwaukali aimeza nthaka, osaimitsika pomveka lipenga.

²⁵Pomveka lipenga akuti, Hee! Anunkhiza nkhondo ilikudza kutali, kugunda kwa akazembe ndi kuhahaza.

²⁶Kodi kabawi auluka mwa nzeru zako, natambasula mapiko ake kunka kumwera?

²⁷Kodi chiombankhanga chikwera m'mwamba pochilamulira iwe, nichimanga chisanja chake m'mwamba?

²⁸Kwao nku thanthwe, chigona komweko, pansonga pa thanthwe pokhazikikapo.

²⁹Pokhala kumeneko chiyang'ana chakudya; maso ake achipenyetsetsa chili kutali.

³⁰Ana ake akumwa mwazi, ndipo pomwe pali ophedwa, apo pali icho.