Read Chichewa Buku Lopatulika Bible 2014 YOBU 4 Bible Online

YOBU 4 - Chichewa Buku Lopatulika Bible 2014 bible

YOBU 4

¹Pamenepo Elifazi wa ku Temani anayankha, nati,

²Munthu akayesa kunena nawe mau, kodi udzamva nao chisoni? Koma akhoza ndani kudziletsa kunena?

³Taona iwe walangiza aunyinji, walimbitsa manja a ofooka.

⁴Mau ako anachirikiza iye amene akadagwa, walimbitsanso maondo otewa.

⁵Koma tsopano chakufikira iwe, ndipo ukomoka; chikukhudza, ndipo uvutika.

⁶Kodi kulimbika mtima kwako si ndiko kuti uopa Mulungu, ndi chiyembekezo chako si ndiwo ungwiro wa njira zako?

⁷Takumbukira tsopano, watayika ndani wosapalamula konse? Kapena oongoka mtima alikhidwa kuti?

⁸Monga umo, ndaonera, olimira mphulupulu, nabzala vuto, akololapo zomwezo.

⁹Atayika ndi mpweya wa Mulungu, nathedwa ndi mpumo wa mkwiyo wake.

¹⁰Kubangula kwa mkango, ndi kulira kwa mkango waukali kwaletsedwa, ndi mano a misona ya mkango athyoledwa.

¹¹Mkango wokalamba udzifera posowa mkoka, ndi misona ya mkango waukazi imwazika.

¹²Anditengera mau m'tseri, m'khutu mwanga ndinalandira kunong'oneza kwake.

¹³M'malingaliro a masomphenya a usiku, powagwira anthu tulo tatikulu

¹⁴Anandidzera mantha ndi kunjenjemera, nanthunthumira nako mafupa anga onse.

¹⁵Pamenepo panapita mzimu pamaso panga; tsitsi la thupi langa lidati nyaunyau.

¹⁶Unaima chilili, koma sindinatha kuzindikira maonekedwe ake; panali mzukwa pamaso panga; kunali chete, ndipo ndidamva mau akuti,

¹⁷Kodi munthu adzakhala wolungama ndi kuposa Mulungu? Kodi munthu adzakhala woyera woposa Mlengi wake?

¹⁸Taona, sakhulupirira atumiki ake; nawanenera amithenga ake zopusa;

¹⁹kopambana kotani nanga iwo akukhala m'nyumba zadothi, amene kuzika kwao kuli m'fumbi, angothudzulidwa ngati njenjete.

²⁰Kuyambira m'mawa kufikira madzulo athudzuka; aonongeka kosatha, osasamalirako munthu.

²¹Kukometsetsa kwao sikumachotsedwa nao? Amafa koma opanda nzeru.