Read Chichewa Buku Lopatulika Bible 2014 YOBU 40 Bible Online

YOBU 40 - Chichewa Buku Lopatulika Bible 2014 bible

YOBU 40

¹Ndipo Yehova anabwereza kwa Yobu, nati,

²Kodi wodzudzulayo atsutsane ndi Wamphamvuyonse? Wochita makani ndi Mulungu ayankhe.

³Pamenepo Yobu anayankha Yehova nati,

⁴Taonani, ndakhululuka ine, ndidzakubwezerani mau otani? Ndigwira pakamwa.

⁵Ndalankhula kamodzi, koma sindidzayakha; inde kawiri, koma sindionjezanso.

⁶Ndipo Yehova anamyankha Yobu m'kamvulumvulu, nati,

⁷Dzimangire m'chuuno tsono ngati mwamuna; ndidzakufunsa, undidziwitse.

⁸Chingakhale chiweruzo changa udzachithyola kodi? Udzanditsutsa kuti ndili woipa kodi, kuti ukhale wolungama ndiwe?

⁹Kodi uli nalo dzanja ngati Ine Mulungu? Kapena ukhoza kugunda ndi mau ngati Ine?

¹⁰Udzikometsere tsono ndi ukulu ndi kukuzika, nuvale ulemu ndi ulemerero.

¹¹Tsanulira mkwiyo wako wosefuka, nupenyerere aliyense wodzikuza ndi kumchepetsa.

¹²Upenyerere aliyense wodzikuza, numtsitse, nupondereze oipa pomwe akhala.

¹³Uwakwirire pamodzi m'fumbi, uzimange nkhope zao pobisika.

¹⁴Pamenepo inenso ndidzakuvomereza, kuti dzanja lakolako lamanja likupulumutsa.

¹⁵Tapenya tsono mvuu ndinaipanga pamodzi ndi iwe, ikudya udzu ngati ng'ombe.

¹⁶Tapenya tsono, mphamvu yake ili m'chuuno mwake, ndi kulimbalimba kwake kuli m'mitsempha ya m'mimba yake.

¹⁷Igwedeza mchira wake ngati mkungudza; mitsempha ya ntchafu zake ipotana.

¹⁸Mafupa ake akunga misiwe yamkuwa; ziwalo zake zikunga zitsulo zamphumphu.

¹⁹Iyo ndiyo chiyambi cha machitidwe a Mulungu; wakuilenga anaininkha lupanga lake.

²⁰Pakuti mapiri aiphukitsira chakudya, kumene zisewera nyama zonse za kuthengo.

²¹Igona pansi patsinde pa mitengo yamthunzi, pobisala pabango ndi pathawale.

²²Mitengo yamthunzi iiphimba ndi mthunzi wao, misondodzi ya kumtsinje iizinga.

²³Taona madzi a mumtsinje akakula, siinjenjemera; ilimbika mtima, ngakhale Yordani atupa mpaka pakamwa pake.

²⁴Ikakhala maso, munthu adzaigwira kodi? Kapena kuboola m'mphuno mwake ili m'khwekhwe?