Read Chichewa Buku Lopatulika Bible 2014 YOBU 41 Bible Online

YOBU 41 - Chichewa Buku Lopatulika Bible 2014 bible

YOBU 41

¹Kodi ukhoza kukoka Leviyatani ndi mbedza? Kapena kukanikiza kalandira wake ndi chingwe?

²Kodi ukhoza kumanga m'mphuno ndi mlulu? Kapena kuboola nsagwada wake ndi mbedza?

³Kodi idzachulukitsa mau akukupembedza? Kapena idzanena nawe mau ofatsa?

⁴Kodi idzapangana ndi iwe, kuti uitenge ikhale kapolo wako wachikhalire?

⁵Kodi udzasewera nayo ngati mbalame? Kapena udzaimangira anamwali ako kuti aiwete?

⁶Kodi opangana malonda adzaitsatsa? Adzaigawana eni malonda?

⁷Kodi udzadzaza khungu lake ndi ntchetho, kapena mutu wake ndi miomba?

⁸Isanjike dzanja lako; ukakumbukira nkhondoyi, sudzateronso.

⁹Taona, chiyembekezo chako cha pa iyo chipita pachabe. Kodi sadzatenga nkhawa munthu pakungoiona?

¹⁰Palibe wolimba mtima kuti adzaiputa. Ndipo ndaniyo adzaima pamaso pa Ine?

¹¹Ndaniyo anayamba kundipatsa Ine kuti ndimthokoze? Zilizonse pansi pa thambo ponse ndi zanga.

¹²Sindikhala chete osatchula ziwalo za ng'onayo, ndi mbiri ya mphamvu yake, ndi makonzedwe ake okoma.

¹³Ndani adzasenda chovala chake chakunja? Adzalowa ndani kumizere iwiri ya mano ake?

¹⁴Adzatsegula ndani zitseko za pakamwa pake? Mano ake aopsa pozungulira pao.

¹⁵Mamba ake olimba ndiwo kudzitama kwake; amangika pamodzi ngati okomeredwatu.

¹⁶Alumikizana lina ndi linzake, mphepo yosalowa pakati pao.

¹⁷Amamatirana lina ndi linzake, agwirana osagawanikana.

¹⁸Pakuyetsemula ing'anipitsa kuunika, ndi maso ake akunga zikope za m'mawa.

¹⁹M'kamwa mwake mutuluka miuni, mbaliwali za moto zibukamo.

²⁰M'mphuno mwake mutuluka utsi, ngati nkhali yobwadamuka ndi moto wa zinyatsi

²¹mpweya wake uyatsa makala, ndi m'kamwa mwake mutuluka lawi la moto.

²²Kukhosi kwake kukhala mphamvu, ndi mantha avumbuluka patsogolo pake.

²³Nyama yake yopsapsala igwirana ikwima pathupi pake yosagwedezeka.

²⁴Mtima wake ulimba ngati mwala, inde ulimba ngati mwala wa mphero.

²⁵Ikanyamuka, amphamvu achita mantha; chifukwa cha kuopsedwa azimidwa nzeru.

²⁶Munthu akaiyamba ndi lupanga, ligoma; ngakhale nthungo, kapena muvi, kapena mkondo.

²⁷Chitsulo ichiyesa phesi, ndi mkuwa ngati mtengo woola.

²⁸Muvi suithawitsa, miyala ya pachoponyera iisandutsa chiputu.

²⁹Zibonga ziyesedwa chiputu, iseka kuthikuza kwake kwa nthungo.

³⁰Kumimba kwake ikunga mapale akuthwa, itasalala kuthope ngati chopunthira.

³¹Ichititsa nthubwinthubwi pozama ngati nkhali, isanduliza nyanja ikunge mafuta.

³²Ichititsa mifunde yonyezimira pambuyo pake; munthu akadati pozama pali ndi imvi.

³³Pa dziko lapansi palibe china cholingana nayo, cholengedwa chopanda mantha.

³⁴Ipenya chilichonse chodzikuza, ndiyo mfumu ya zodzitama zonse.